ଜେନେଭା: ବିଶ୍ୱର ଅଧା ହସ୍ପିଟାଲରେ ଚିକିତ୍ସା କ୍ଷେତ୍ରରେ ଜରୁରୀ ସ୍ବଚ୍ଛତା ଆପଣାଯାଉ ନାହିଁ। ଏଥିଯୋଗୁ ପ୍ରାୟ ୪ ବିଲିୟନ୍ ଲୋକ ସଂକ୍ରମିତ ହେବା ଆଶଙ୍କା ସୃଷ୍ଟି ହୋଇଛି ବୋଲି ଜାତିସଂଘ ପକ୍ଷରୁ କୁହାଯାଇଛି। ଏହି ସ୍ବାସ୍ଥ୍ୟସେବା ସୁବିଧାରେ ରୋଗୀଙ୍କ ପାଇଁ ପାଣି ଓ ସାବୁନ କିମ୍ବା ହ୍ୟାଣ୍ଡଓ୍ବାଶ୍ର ବ୍ୟବସ୍ଥା କରାଯାଇ ନାହିଁ। ଏପରିକି ଟଏଲେଟ୍ ବ୍ୟବସ୍ଥା ମଧ୍ୟ ନାହିଁ। ପ୍ରାୟ ୩.୮୫ ବିଲିୟନ ଲୋକ ଏହି ହସ୍ପିଟାଲଗୁଡ଼ିକୁ ଚିକିତ୍ସା ପାଇଁ ଆସୁଥିବାରୁ ସେମାନେ ସଂକ୍ରମିତ ହେବା ଆଶଙ୍କା ଉପୁଜିଛି। ସେମାନଙ୍କ ମଧ୍ୟରୁ ୬୮୮ ନିୟୁତ ଲୋକ ପରିଚ୍ଛନ୍ନ ସେବା ଆଦୌ ପାଇ ନ ଥାନ୍ତି ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ ଏବଂ ୟୁନିସେଫ୍ ପକ୍ଷରୁ ଆୟୋଜିତ ଏକ ମିଳିତ କାର୍ଯ୍ୟକ୍ରମରେ କୁହାଯାଇଛି।
ସ୍ବାସ୍ଥ୍ୟସେବା ପ୍ରତିଷ୍ଠାନଗୁଡ଼ିକରେ ମିଳୁଥିବା ସୁବିଧା ଓ ଚିକିତ୍ସାର ସ୍ବଚ୍ଛତାରେ ଆଦୌ ସାଲିସ୍ କରାଯାଇପାରିବ ନାହିଁ ବୋଲି ଡବ୍ଲ୍ୟୁଏଚ୍ଓର ମାରିଆ ନେଇରା କହିଛନ୍ତି। ମହାମାରୀରୁ ଆରୋଗ୍ୟ, ନିରାକରଣ ଓ ମୁକାବିଲା ପ୍ରସ୍ତୁତି ପାଇଁ ଏଥିରେ ଉନ୍ନତି କରାଯିବା ଜରୁରୀ। ସ୍ବଚ୍ଛଜଳ, ପରିଚ୍ଛନ୍ନ ପାଇଖାନା ଓ ହସ୍ପିଟାଲଗୁଡ଼ିକରୁ ବାହାରୁଥିବା ବର୍ଜ୍ୟବସ୍ତୁର ସୁରକ୍ଷିତ ପରିଚାଳନା ଭଳି ମୌଳିକ କ୍ଷେତ୍ରରେ ନିବେଶ ନ ବଢ଼ାଇଲେ ସ୍ବଚ୍ଛତା ହାସଲ କଷ୍ଟକର। ୪୦ ଦେଶରୁ ସଂଗୃହୀତ ତଥ୍ୟ ହସ୍ପିଟାଲଗୁଡ଼ିକର ବିପଜ୍ଜନକ ଚିତ୍ରକୁ ଦର୍ଶାଉଛି। ରିପୋର୍ଟରେ ଆହୁରି କୁହାଯାଇଛି ଯେ, ଏଭଳି ଅବ୍ୟବସ୍ଥା ଯୋଗୁ ଗର୍ଭବତୀ ମା, ନବଜାତ ଶିଶୁମାନେ ମୃତ୍ୟୁ ଆଡ଼କୁ ଠେଲି ହୋଇଯାଉଛନ୍ତି। ପ୍ରତିବର୍ଷ ପ୍ରାୟ ୬ଲକ୍ଷ ୭୦ ହଜାର ନବଜାତ ଶିଶୁ ଏହି କାରଣରୁ ପ୍ରାଣ ହରାଉଥିବା ଏଥିରେ ଉଲ୍ଲେଖ କରାଯାଇଛି। ସାରା ବିଶ୍ୱ କଥା ଦେଖିଲେ ସହରାଞ୍ଚଳରେ ୩% ଓ ଗ୍ରାମାଞ୍ଚଳରେ ୧୧% ହସ୍ପିଟାଲକୁ ଜଳଯୋଗାଣ ବ୍ୟବସ୍ଥା କରାଯାଇ ନାହିଁ। ବର୍ଜ୍ୟବସ୍ତୁର ଉପଯୁକ୍ତ ପରିଚାଳନା କରା ନ ଯିବା କାରଣରୁ ହସ୍ପିଟାଲ ପରିବେଶ ଖରାପ ହେବାରେ ଲାଗିଛି ବୋଲି ଜାତିସଂଘ ନିଜ ରିପୋର୍ଟରେ ଉଦ୍ବେଗ ପ୍ରକାଶ କରିଛି।
