ନୂଆଦିଲ୍ଲୀ,୧୭ ।୩: ସାରା ଦେଶରେ ଏଚ୩ଏନ୨ ଇନଫ୍ଲୁଏନ୍ଞା ଭାଇରସରେ ଜାନୁୟାରୀ ୧ରୁ ଏବେ ପର୍ଯ୍ୟନ୍ତ ୪୫୦ରୁ ଅଧିକ ସଂକ୍ରମିତଙ୍କୁ ଚିହ୍ନଟ କରାଗଲାଣି । ମଧ୍ୟ ପ୍ରଦେଶରେ ବି ଏଚ୩ଏନ୨ ଇନଫ୍ଲୁଏନଞ୍ଜାର ପ୍ରଥମ ଘଟଣା ସାମ୍ନାକୁ ଆସିଛି । ରାଜ୍ୟର ରାଜଧାନୀ ଭୋପାଳରେ ଜଣେ ଯୁବକଙ୍କ ଏହି ପରୀକ୍ଷା କରାଯାଇଥିବା ବେଳେ ଗୁରୁବାର ତାଙ୍କ ରିପୋର୍ଟ ପଜିଟିଭ ଆସିଛି । ସ୍ୱାସ୍ଥ୍ୟ ବିଭାଗର ଅଧିକାରୀ ଏହି ସୂଚନା ଦେଇଛନ୍ତି ।
ଭୋପାଳର ମୁଖ୍ୟ ଚିକିତ୍ସା ଓ ସ୍ୱାସ୍ଥ୍ୟ ଅଧିକାରୀ ଡାକ୍ତର ପ୍ରଭାକର ତିୱାରି ମିଡିଆକୁ କହିଛନ୍ତି ଯେଉଁ ଯୁବକଙ୍କ ନିକଟରେ ଏଚ୩ଏନ୨ ଦେଖାଦେଇଛି ତାଙ୍କର ବୟସ ୨୦ରୁ ୨୫ ବର୍ଷ ମଧ୍ୟରେ । ତେବେ ତାଙ୍କଠାରେ ଏହାର କୌଣସି ଲକ୍ଷଣ ଦେଖାଯାଇ ନାହିଁ ।
ସ୍ୱାସ୍ଥ୍ୟ ବିଭାଗର ଅଧିକାରୀ କହିଛନ୍ତି ଯୁବକ କାଶ ଓ ଜ୍ୱରଥିବା ଅଭିଯୋଗ କରିଥିଲେ, ଏହାପରେ ତାଙ୍କର ସ୍ୱାବ ସାମ୍ପଲ ଟେଷ୍ଟ ପାଇଁ ପଠାଯାଇଥିଲା । ଗୁରୁବାର ତାଙ୍କ ରିପୋର୍ଟ ପଜିଟିଭ ଆସିଛି । ଏମାନେ କହିଛନ୍ତି ଭୋପାଳର ବୌରାଗଡ ଅଞ୍ଚଳରେ ରହୁଥିବା ସଂକ୍ରମିତଙ୍କୁ କୌଣସି ହସ୍ପିଟାଲରେ ଭର୍ତ୍ତି କରାଯାଇନାହିଁ, ତାଙ୍କର ଘରେ ହିଁ ଚିକିତ୍ସା ଚାଲିଛି ।
