ଅସ୍ତରଙ୍ଗ,୩୦ା୫(ମମତା ଜେନା)ପୁରୀ ଜିଲା ଅସ୍ତରଙ୍ଗ ବ୍ଲକ ପଡ଼ିଆରେ ବୁଧବାର ଆୟୋଜିତ ଭାଜପାର ବିଜୟ ସଂକଳ୍ପ ସମାବେଶରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ଶାସକ ଦଳ ଉପରେ ଗର୍ଜିଛନ୍ତି। ସେ କହିଛନ୍ତି, କାକଟପୁର ନିର୍ବାଚନମଣ୍ଡଳୀ ସ୍ବାଭିମାନର ମାଟି, ଏଠି ଲୋକେ ଯାହାକୁ ଭୋଟ୍ ଦେଇ ବାଛିଥିଲେ ସେ ରବର ଷ୍ଟାମ୍ପ୍। କାକଟପୁରବାସୀ ଏବେ ଏକ ହୁଅ-ଭାଜପା ଜିତିଲେ ବିକାଶ ଦେଖିବ। ଉପକୂଳ ରାଜପଥ ସମେତ ପ୍ରସ୍ତାବିତ ବନ୍ଦର ପ୍ରତି ରାଜ୍ୟ ସରକାର ଗୁରୁତ୍ୱ ନ ଦେବାରୁ କାମ ଆଗେଇପାରୁନାହିଁ। ରାଜ୍ୟରେ ଭାଜପା ସରକାର ଆସିଲେ କାକଟପୁର ନିର୍ବାଚନମଣ୍ଡଳୀରେ ବିକାଶ ଘଟିବ। ମତ୍ସ୍ୟଜୀବୀ ତାଙ୍କର ପ୍ରକୃତ ସହାୟତା ପାଇବେ, ଧାନର ମୂଲ୍ୟ ବଢିବ, ଅଞ୍ଚଳର ଯୁବବର୍ଗ ବାହାରକୁ ଆଉ ଦାଦନ ଖଟିବାକୁ ଯିବେନାହିଁ ବୋଲି ପ୍ରଧାନ କହିଛନ୍ତି। ରାଜ୍ୟ ସରକାରଙ୍କୁ ଟାର୍ଗେଟ କରି ସେ କହିଥିଲେ, ରାଜ୍ୟରେ ସିନ୍ଧି ଚୋର ପଶିଛି, ସବୁ ନେଇ ପଳାଇବ। ରାଜ୍ୟରେ ତାମିଲ୍ ଶାସନ ଭଳି କାକଟପୁର ଶାସନ ଆଉ କାହା ଦ୍ୱାରା ପରିଚାଳିତ ହୋଇ ବିକାଶ କ୍ଷେତ୍ରରେ ପ୍ରତିବନ୍ଧକ ସୃଷ୍ଟି ହୋଇଛି। ଧାନ, ପାନ ଓ ମୀନର ଅଞ୍ଚଳ ଆଜି ପ୍ରଭାବିତ। ପିଇବା ପାଇଁ ବିଶୁଦ୍ଧ ପାନୀୟଜଳ ମିଳୁନି। ଲୋକଙ୍କ ସମସ୍ୟା ପୂରଣ ହେଉନି।
ତାମିଲ୍ ହଟାଇ ଭାଜପା ସରକାର ଗଠନ କରିବାକୁ ଯାଉଥିବାବେଳେ କାକଟପୁର ନିର୍ବାଚନମଣ୍ଡଳୀବାସୀ ଏକ ହୁଅ, ବିକାଶ ଦେଖିବ ବୋଲି ପ୍ରଧାନ କହିଥିଲେ। କାକଟପୁରରୁ ପାରିବାରିକ ଶାସନ ଓ ଗୁମାସ୍ତାଗିରି ହଟାଇ ଭାଜପା ବିଧାୟକ ପ୍ରାର୍ଥୀ ବାଇଧର ମଲ୍ଲିକ ଏବଂ ଏମ୍ପି ପ୍ରାର୍ଥୀ ବିଭୁପ୍ରସାଦ ତରାଇଙ୍କୁ ପଦ୍ମ ଚିହ୍ନରେ ଭୋଟ ଦେବାକୁ ସେ ନିବେଦନ କରିଥିଲେ। ଜିତିଲେ କାକଟପୁର ନିର୍ବାଚନମଣ୍ଡଳୀ ରାଜ୍ୟରେ ଏକ ନମ୍ବର ହେବ, ଯାହା ବିକାଶ ଦରକାର ସେଥିରେ ସହଯୋଗ କରିବେ ବୋଲି ପ୍ରଧାନ ପ୍ରତିଶ୍ରୁତି ଦେଇଥିଲେ। ପ୍ରବଳ ଜନସମାଗମ ଦେଖି ଏଇଠୁ ଅଙ୍କ ଛିଡ଼ିଗଲା, କାକଟପୁରରେ ଭାଜପା ଜିତିବା ସୁନିଶ୍ଚିତ ବୋଲି କହିଥିଲେ। କେନ୍ଦ୍ର ସରକାରଙ୍କ ବିଭିନ୍ନ ଯୋଜନା, ଭାଜପାର ଇସ୍ତାହାର ଗ୍ୟାରେଣ୍ଟି ଆଦି ସମ୍ପର୍କରେ ସେ ଭୋଟରଙ୍କୁ ଜଣାଇଥିଲେ। ସମାବେଶରେ ଜଗତ୍ସିଂହପୁର ଏମ୍ପି ପ୍ରାର୍ଥୀ ବିଭୁପ୍ରସାଦ ତରାଇ, କାକଟପୁର ବିଧାୟକ ପ୍ରାର୍ଥୀ ବାଇଧର ମଲ୍ଲିକ, ପୂର୍ବତନ ବିଧାୟକ ସୁରେନ୍ଦ୍ର ସେଠୀ, ଜିଲା ଭାଜପା କାର୍ଯ୍ୟକାରିଣୀ ସଦସ୍ୟ ମଙ୍ଗଳା ପ୍ରସାଦ ସାମନ୍ତରାୟ, ଅସ୍ତରଙ୍ଗ ପଞ୍ଚାୟତ ସମିତି ଅଧ୍ୟକ୍ଷା ଆରତି ନାୟକ, କାକଟପୁର ସମିତି ଅଧ୍ୟକ୍ଷ ଶ୍ରୀଧର ନାୟକ, ବରିଷ୍ଠ ନେତା ଈଶ୍ୱର ବେହେରା, ପ୍ରସନ୍ନ ବେହେରା ପ୍ରମୁଖ ଉପସ୍ଥିତ ଥିଲେ। ନିର୍ବାଚନମଣ୍ଡଳୀର ଭାଜପା ସଂଯୋଜକ ସୁଦର୍ଶନ ସ୍ବାଇଁ ଅତିଥି ପରିଚୟ ଓ ମଞ୍ଚ ପରିଚାଳନା କରିଥିଲେ। ନିକଟରେ ଅସ୍ତରଙ୍ଗରୁ ଭାଜପାରେ ମିଶିଥିବା ଦିବାକର ଛାଟୋଇ କାର୍ଯ୍ୟକ୍ରମ ପରିଚାଳନା କରିଥିଲେ।
