ପାରଳାଖେମୁଣ୍ଡି,୨୦ା୩(ଡି.ଏନ୍.ଏନ୍.):ଖରିଫ ଚାଷ ହେଉକି ରବି ଚାଷ, ବିଭିନ୍ନ ସମସ୍ୟା ଉପୁଜୁଥିବାକୁ ନେଇ ଅନେକ ଚାଷୀ ଚାଷକାର୍ଯ୍ୟ ପ୍ରତି ଆଉ ସେପରି ମନ ବଳାଉ ନାହାନ୍ତି । ପୂର୍ବପରି ଚାଷୀମାନେ ଚାଷବାସ କାର୍ଯ୍ୟ ନିମନ୍ତେ ସେପରି ଉତ୍ସାହିତ ବା ଆଗ୍ରହ ଦେଖାଉନାହାନ୍ତି। ହେଲେ ଗଜପତି ଜିଲା ଗୋଷାଣି ବ୍ଲକ ମଧୁସୂଦନପୁର ପଞ୍ଚାୟତ ସଦର ମହକୁମା ମଧୁସୂଦନପୁର ଗ୍ରାମର ମୋହନ ପାତ୍ର ଧାନ ବା ପାରମ୍ପରିକ ଚାଷକୁ ଛାଡି ପିଜୁଳି ଚାଷ ସହ ଚାରା ଉତ୍ପାଦନ କେନ୍ଦ୍ର ସ୍ଥାପନ କରି ଜୀବିକା ଆପଣାଇଛନ୍ତି। ସେ ଏଭଳି ପିଜୁଳି ଚାଷ କାର୍ଯ୍ୟ ମାତ୍ର ୪ବର୍ଷ ହେଲା ଆରମ୍ଭ କରିଥିଲେ ହେଁ ବାର୍ଷିକ ଲକ୍ଷାଧିକ ଟଙ୍କା ରୋଜଗାର କରିବାରେ ସଫଳ ହୋଇଛନ୍ତି ବୋଲି ପ୍ରକାଶ କରିଛନ୍ତି। ତାଙ୍କ ପୂର୍ବଜମାନେ ପାରମ୍ପରିକ ଚାଷ ତଥା ଧାନ ଅମଳ କରୁଥିଲେ। ହେଲେ ଏଥିରେ ସେତେଟା ଲାଭ ମିଳିନଥିଲା। ଏହାପରେ ପନିପରିବା ଚାଷ କରିଥିଲେ ମଧ୍ୟ ଆଖିଦୃଶିଆ ସଫଳତା ମିଳିନଥିଲା। ଏତିକିରେ ସେ ଭାଙ୍ଗି ନ ପଡି ଧୈର୍ଯ୍ୟର ସହ ଆଗକୁ ଯିବା ଉଦ୍ଦେଶ୍ୟରେ ଉଦ୍ୟାନ ବିଭାଗର ପରାମର୍ଶ ଲୋଡିଥିଲେ ମୋହନ। ଉଦ୍ୟାନ ବିଭାଗ ତାଙ୍କୁ ପିଜୁଳି ଚାଷ ସମ୍ପର୍କରେ ବୁଝାଇବା ସହ ତାଲିମ ପାଇଁ ଭୁବନେଶ୍ୱର ପଠାଇଥିଲେ। ତାଲିମ ପରେ ସେ ପାରଳାଖେମୁଣ୍ଡି ଉଦ୍ୟାନ ବିଭାଗ କାର୍ଯ୍ୟାଳୟ ପରିସରରେ କିଛି ଦିନ ରହି ଚାରା ଉତ୍ପାଦନ ସମ୍ପର୍କରେ ଜାଣିଥିଲେ। ଏହାପରେ ଉଦ୍ୟାନ ବିଭାଗ ତରଫରୁ ୨୫୦ ଗଛ ଯୋଗାଇ ଦିଆଯାଇଥିଲା। ପ୍ରଥମେ ସେ ଏହି ପିଜୁଳି ଚାରାଗୁଡିକୁ ନିଜର ୮୦ସେଣ୍ଟ ଜମିରେ ରୋପଣ କରିଥିଲେ । ପ୍ରଥମ ବର୍ଷ ୧ଟନ୍, ଦ୍ୱିତୀୟ ବର୍ଷ ୨ଟନ ଏପରି ଭାବେ ୪ବର୍ଷ ମଧ୍ୟରେ ସେ ୪ଟନ ପିଜୁଳି ଅମଳ କରି ବାର୍ଷିକ ୨ଲକ୍ଷ ଟଙ୍କାରୁ ଊର୍ଦ୍ଧ୍ୱ ରୋଜଗାର କରିପାରୁଥିବାର ପ୍ରକାଶ କରିଛନ୍ତି। ପିଜୁଳି ଚାଷ ସହ ସେ ନର୍ସରୀ ବା ଚାରା ଉତ୍ପାଦନ ମଧ୍ୟ କରୁଥିବାର ଲକ୍ଷ୍ୟ କରାଯାଇଛି। ପିଜୁଳି ସହ ଆମ୍ବ, ପଣସ, କାଜୁ, ଅଁଳା, ପଣସ ଆଦି ଚାରା ନିଜେ ଉତ୍ପାଦନ କରୁଥିବାର ଦେଖାଯାଇଛି। ଏହା ସହ ଏକ ବାଡରେ ବିଭିନ୍ନ ପ୍ରଜାତିର ଫୁଲ ଗଛ ମଧ୍ୟ ଉତ୍ପାଦନ କରୁଛନ୍ତି । ଗୋଲାପ ଫୁଲଠାରୁ ଆରମ୍ଭ କରି ସେବତୀ, ମନ୍ଦାର, ମଣ୍ଡାଫୁଲ ଚାରା ତଥା ଗଛ ଉତ୍ପାଦନ କରିବାରେ ଲାଗିପଡିଛନ୍ତି। ସେ ଏହି ସମସ୍ତ କାର୍ଯ୍ୟ ନିଜେ ଏବଂ ତାଙ୍କ ପରିବାର ଲୋକଙ୍କ ସାହାଯ୍ୟରେ କରୁଛନ୍ତି। ଏହି ବର୍ଷ ଜଣେ ସ୍ବେଚ୍ଛାସେବୀ ସଙ୍ଗଠନ ୧୫୦୦ରୁ ଊର୍ଦ୍ଧ୍ୱ କାଜୁ ଚାରା କ୍ରୟ କରିବାପାଇଁ ବରାଦ ଦେଇଥିବାର ମୋହନ ପ୍ରକାଶ କରିଛନ୍ତି। ନିଜର ସ୍ବଳ୍ପ ପରିମାଣ ଜମିରେ ପିଆଜଠାରୁ ଆରମ୍ଭ କରି ଫୁଲ ଏବଂ ବିଭିନ୍ନ କିସମର ଚାରା ଉତ୍ପାଦନ କରି ରୋଜଗାର ଭଲ ହେଉଥିବାର ଖୁସି ବ୍ୟକ୍ତ କରିଛନ୍ତି। ପୂର୍ବେ ଧାନ ତଥା ପାରମ୍ପରିକ ଚାଷରେ କ୍ଷତି ସହୁଥିବା ମୋହନ ପାତ୍ର ଏବେ ପିଜୁଳି ଚାଷ ସାଙ୍ଗକୁ ଚାରା ଉତ୍ପାଦନ କେନ୍ଦ୍ର ପ୍ରତିଷ୍ଠା କରି ବେଶ ଲାଭବାନ ହୋଇପାରିଛନ୍ତି। ତାଙ୍କରି ଏହି ସଫଳତା ପାଇଁ ବର୍ତ୍ତମାନ ଅଞ୍ଚଳରେ ଖ୍ୟାତି ଲାଭ କରୁଛନ୍ତି। କଠିନ ପରିଶ୍ରମ, ଦୃଢ ଇଚ୍ଛାଶକ୍ତି ଓ ମନୋବଳ ମଣିଷକୁ ସଫଳତାର ଶିଖରକୁ ପହଞ୍ଚାଇଦିଏ ବୋଲି ସେ ପ୍ରମାଣିତ କରିଛନ୍ତି।