ଭୁବନେଶ୍ୱର,୫।୧୦ ବାଣିଜ୍ୟ କର ଏବଂ ସାମଗ୍ରୀ ଓ ସେବା ଟିକସ (ଜିଏସ୍ଟି)ର ଏନଫୋର୍ସମେଣ୍ଟ ୟୁନିଟ୍ ସୋମବାର ରାଜ୍ୟର ୧୮ଟି ସହରର ୧୭ଟି ଅଳଙ୍କାର ଦୋକାନ ଉପରେ ଚଢ଼ାଉ କରିଛି। ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ, ସିଟି ଜିଏସ୍ଟି ବିଭାଗର ମିଳିତ ଟିମ୍ ଜରିଆରେ ଅଳଙ୍କାର ପ୍ରତିଷ୍ଠାନଗୁଡ଼ିକ ଉପରେ ଏଭଳି ବଡ଼ ଧରଣର ଚଢ଼ାଉ ଚାଲିଥିବା ଜଣାପଡିଛି। ରାଜ୍ୟର ବିଭିନ୍ନ ଅଳଙ୍କାର ପ୍ରତିଷ୍ଠାନ ସମେତ ଅନ୍ୟ ସଂସ୍ଥା ସହ ଜଡ଼ିତ ଥିବା କିଛି ବ୍ୟବସାୟୀ ଦୀର୍ଘ ଦିନ ହେବ ଆୟକର ସାଙ୍ଗକୁ ଜିଏସ୍ଟି ଫାଙ୍କି ବ୍ୟବସାୟ କରୁଥିବା ଅଭିଯୋଗ ରହିଥିଲା। ଫଳରେ ଜିଏସ୍ଟି କର୍ତ୍ତୃପକ୍ଷଙ୍କ ନିର୍ଦ୍ଦେଶରେ ଏକକାଳୀନ ରାଜ୍ୟର ଛୋଟ ବଡ଼ ଅଳଙ୍କାର ପ୍ରତିଷ୍ଠାନଗୁଡିକରେ ଏଭଳି ଚଢ଼ାଉ କରାଯାଇଛି। ପାର୍ବଣ ଏବଂ ଧନତେରସ ଆସୁଥିବାରୁ ବ୍ୟବସାୟୀମାନେ ବିଭିନ୍ନ ଢଙ୍ଗରେ ଗ୍ରାହକଙ୍କୁ ଠକୁ ଥିବା ମଧ୍ୟ ଦେଖାଯାଇଛି। ଏଭଳି ବିଭିନ୍ନ ଦିଗକୁ ବିଚାର କରି କର୍ତ୍ତୃପକ୍ଷ କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ଜଣାପଡ଼ିଛି। ଭୁବନେଶ୍ୱର, କଟକ, ବ୍ରହ୍ମପୁର, ସମ୍ବଲପୁର, ବାରିପଦା, କେନ୍ଦ୍ରପଡା, ରାଉରକେଲା ଓ ବରଗଡ଼ ଭଳି ପ୍ରମୁଖ ସହରର ବିଭିନ୍ନ ସ୍ଥାନରେ ଏକକାଳୀନ ଚଢ଼ାଉ କରାଯାଇଛି। ଏହି ଚଢ଼ାଉ ସମୟରେ ସୁନାର ଓଜନ, ମାନ ପରୀକ୍ଷା ସାଙ୍ଗକୁ କ୍ରୟ ଓ ବିକ୍ରୟର ବିଲ୍ ଭଳି ବିଭିନ୍ନ ଘଟଣାକୁ ତଦନ୍ତ ପରିସରଭୁକ୍ତ କରାଯାଇଥିବା ପ୍ରକ୍ରିୟା ସହ ଜଡ଼ିତ ଜଣେ ଅଧିକାରୀ କହିଛନ୍ତି। ଉଲ୍ଲେଖଯୋଗ୍ୟ, ନିକଟରେ ବ୍ରହ୍ମପୁର ବଡ଼ବଜାର ଅଞ୍ଚଳରୁ ପ୍ରାୟ ୩ କିଲୋ ଓଜନର ବେଆଇନ ସୁନା କାରବାର ଉପରେ ଚଢ଼ାଉ କରାଯାଇ ଜରିମାନା ସଂଗ୍ରହ କରାଯାଇଥିଲା। ଜିଏସ୍ଟି କମିଶନର ଜିଏସ୍ଟି ଠକେଇ ଓ ବେଆଇନ ସୁନା ଅଳଙ୍କାର କାରବାର ଉପରେ ନଜର ରଖିତ୍ବା ପାଇଁ ଏନଫୋର୍ସମେଣ୍ଟ ୟୁନିଟ୍କୁ ନିର୍ଦ୍ଦେଶ ଦେଇଥିଲେ।
