ନୂଆଦିଲ୍ଲୀ,୧।୧: ଦେଶରେ ବସ୍ତୁ ଓ ସେବା କର (GST) ସଂଗ୍ରହ କ୍ଷେତ୍ରରେ ପୁଣି ଉତ୍ସାହଜନକ ଅଭିବୃଦ୍ଧି ଦେଖିବାକୁ ମିଳିଛି। ଗତ ନଭେମ୍ବର ମାସର ମନ୍ଥରତା ପରେ ଡିସେମ୍ବରରେ ମୋଟ GST ସଂଗ୍ରହ ୧.୭୪ ଲକ୍ଷ କୋଟି ଟଙ୍କାରେ ପହଞ୍ଚିଛି, ଯାହା ଗତ ବର୍ଷର ସମାନ ଅବଧି ତୁଳନାରେ ୬.୧ ପ୍ରତିଶତ ଅଧିକ।
ନଭେମ୍ବରରେ ଏହି ସଂଗ୍ରହ ୧.୭୦ ଲକ୍ଷ କୋଟି ଟଙ୍କା ଥିବାବେଳେ ଡିସେମ୍ବରରେ ଏହା ବୃଦ୍ଧି ପାଇଛି। ଗତ ତିନି ମାସ ମଧ୍ୟରେ ଏହା ସର୍ବାଧିକ ଅଭିବୃଦ୍ଧି ବୋଲି ଜଣାପଡ଼ିଛି। ଚଳିତ ମାସର ଅଭିବୃଦ୍ଧିରେ ଘରୋଇ କାରବାର ଅପେକ୍ଷା ଆମଦାନୀ ଶୁଳ୍କର ଅବଦାନ ଅଧିକ ରହିଛି। ଆମଦାନୀରୁ GST ସଂଗ୍ରହ ପ୍ରାୟ ୨୦ ପ୍ରତିଶତ ବୃଦ୍ଧି ପାଇଥିବାବେଳେ ଘରୋଇ GST ସଂଗ୍ରହ ମାତ୍ର ୧.୨ ପ୍ରତିଶତ ବଢ଼ିଛି। ରିଫଣ୍ଡ ପରେ ନିଟ୍ GST ରାଜସ୍ୱ ୧.୪୬ ଲକ୍ଷ କୋଟି ଟଙ୍କା ରହିଛି, ଯାହା ଗତବର୍ଷ ତୁଳନାରେ ୨.୨ ପ୍ରତିଶତ ଅଧିକ।
ମହାରାଷ୍ଟ୍ର, ଗୁଜରାଟ, କର୍ଣ୍ଣାଟକ ଏବଂ ତାମିଲନାଡୁ ଭଳି ପ୍ରମୁଖ ଶିଳ୍ପ ସମୃଦ୍ଧ ରାଜ୍ୟଗୁଡ଼ିକ GST ସଂଗ୍ରହ କ୍ଷେତ୍ରରେ ସର୍ବାଧିକ ଅବଦାନ ରଖିଛନ୍ତି। ସେପ୍ଟେମ୍ବର ମାସରେ ସରକାର ଟିକସ ହାରରେ କିଛି ପରିବର୍ତ୍ତନ କରିବା ପରେ ରାଜସ୍ୱ ସଂଗ୍ରହରେ ଏହି ସୁଧାର ଦେଖିବାକୁ ମିଳିଛି। ଏହା ଦେଶର ଅର୍ଥନୀତିର ସ୍ଥିରତା ଏବଂ ବଜାର ଚାହିଦାକୁ ସୂଚାଉଛି।
