ନୂଆଦିଲ୍ଲୀ,୨।୮: ଜୁଲାଇ ମାସରେ ସାମଗ୍ରୀ ଓ ସେବା ଟିକସ (ଜିଏସ୍ଟି) ବାବଦକୁ କେନ୍ଦ୍ର ସରକାର ୮୭,୪୨୨ କୋଟି ଟଙ୍କା ସଂଗ୍ରହ କରିଛନ୍ତି। ଜୁନ୍ ମାସରେ ୯୦,୯୧୭ କୋଟି ଟଙ୍କା ଜିଏସ୍ଟି ଆଦାୟ ହୋଇଥିବା ବେଳେ ଏହା ଜୁଲାଇରେ ହ୍ରାସ ଘଟିଥିବା ଅର୍ଥ ମନ୍ତ୍ରଣାଳୟ ଦେଇଥିବା ରିପୋର୍ଟରୁ ସାମ୍ନାକୁ ଆସିଛି। ମାତ୍ର ଜୁଲାଇ ମାସର ପରୋକ୍ଷ ଟିକସ ସଂଗ୍ରହକୁ ଦେଖିଲେ ଏହା ଏପ୍ରିଲ ଏବଂ ମେ ମାସ ତୁଳନାରେ ଉନ୍ନତ ରହିଛି। ଏହି ଦୁଇ ମାସରେ ଯଥାକ୍ରମେ ୩୨,୨୯୪ କୋଟି ଏବଂ ୬୨,୦୦୯ କୋଟି ଟଙ୍କାର ରାଜସ୍ବ ଆଦାୟ କରାଯାଇଥିଲା। ଜୁଲାଇରେ ଆଦାୟ ହୋଇଥିବା ମୋଟ ଟିକସ ମଧ୍ୟରେ କେନ୍ଦ୍ର ଜିଏସ୍ଟି ବାବଦ(ସିଜିଏସ୍ଟି) ବାବଦ ୧୬,୧୪୭ କୋଟି, ରାଜ୍ୟ ଜିଏସ୍ଟି(ଏସ୍ଜିଏସ୍ଟି) ବାବଦ ୨୧,୪୮୧ କୋଟି, ସମନ୍ବିତ ଜିଏସ୍ଟି ବାବଦ(ଆଇଜିଏସ୍ଟି) ବାବଦ ୪୨,୫୯୨ କୋଟି ଟଙ୍କା ରହିଛି। ଏହି ସମୟ ମଧ୍ୟରେ ୭୨୬୫ କୋଟି ଟଙ୍କାର ସେସ୍ ବା ଉପକର ଆଦାୟ ହୋଇଥିବା ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ରହିଛି।
ଗତ ବର୍ଷ ଜୁଲାଇ ମାସରେ ଯେତେ ପରିମାଣରେ ଜିଏସ୍ଟି ସଂଗ୍ରହ ହୋଇଥିଲା ଚଳିତ ବର୍ଷ ସମାନ ସମୟରେ ସଂଗ୍ରହ ୮୬% ରହିଛି। ଅର୍ଥାତ୍ ଟିକସ ସଂଗ୍ରହ ୧୪% ଖସିଛି। ଜୁନ୍ ମାସ ତୁଳନାରେ ଜୁଲାଇ ମାସରେ ଟିକସ ଆଦାୟ କମିଥିବା ମନ୍ତ୍ରଣାଳୟ କହିଛି। କୋଭିଡ୍ ଯୋଗୁ ଲାଗିଥିବା କଟକଣା କୋହଳ ହେବା ଯୋଗୁ ଲୋକମାନେ ଫେବୃୟାରୀ, ମାର୍ଚ୍ଚ ଏବଂ ଏପ୍ରିଲ ମାସର ଜିଏସ୍ଟି ଜୁଲାଇରେ ପଇଠ କରିଥିବା ନଜରକୁ ଆସିଛି। ସୂଚନାଯୋଗ୍ୟ, ୫ କୋଟି ଟଙ୍କାରୁ କମ୍ କାରବାର କରୁଥିବା ବ୍ୟକ୍ତିବିଶେଷ ରିଟର୍ନ ଫାଇଲିଂରେ ସେପ୍ଟେମ୍ବର ପର୍ଯ୍ୟନ୍ତ ଆଶ୍ୱସ୍ତି ପ୍ରଦାନ କରାଯାଇଛି।
