ଭୁବନେଶ୍ୱର,୪।୧୧: ଜମ୍ମୁ-କଶ୍ମୀରର ଲ୍ୟୁଟ୍ନାଣ୍ଟ ଗଭର୍ନର ମନୋଜ ସିହ୍ନା ଶୁକ୍ରବାର ଉଭୟ ଓଡ଼ିଶା ଓ ଜମ୍ମୁ କଶ୍ମୀରର ବରିଷ୍ଠ ଅଧିକାରୀଙ୍କ ସହ ଓ-ହବ୍ଠାରେ ଷ୍ଟାର୍ଟଅପ୍ ଓଡ଼ିଶା ପରିଦର୍ଶନ କରିଛନ୍ତି। ଏପରିକି ଷ୍ଟାର୍ଟଅପ୍ ଓଡ଼ିଶାର ନିମନ୍ତ୍ରଣ କ୍ରମେ ଅହମ୍ମଦାବାଦ ବିଶ୍ୱବିଦ୍ୟାଳୟର କୁଳପତି ପ୍ରଫେସର ପଙ୍କଜ ଚନ୍ଦ୍ର ମଧ୍ୟ ଉକ୍ତ କାର୍ଯ୍ୟକ୍ରମରେ ଯୋଗ ଦେଇଥିଲେ। ଏହି ପରିପ୍ରେକ୍ଷୀରେ ଷ୍ଟାର୍ଟଅପ୍ ଓଡ଼ିଶାର କାର୍ଯ୍ୟନିର୍ବାହୀ ଅଧ୍ୟକ୍ଷ ଡ. ଓମ୍କାର ରାୟ ଉପସ୍ଥାପନା ମାଧ୍ୟମରେ ନିଆଯାଉଥିବା ଅନନ୍ୟ ପଦକ୍ଷେପ, କାର୍ଯ୍ୟକ୍ରମ, ସର୍ବୋତ୍ତମ ଅଭ୍ୟାସ ଏବଂ ଷ୍ଟାର୍ଟଅପ୍ ଓଡ଼ିଶାକୁ ଜାତୀୟ ମଞ୍ଚରେ ସ୍ଥାନିତ କରିଥିବା ଉଲ୍ଲେଖନୀୟ ସଫଳତା ଆଦିକୁ ବିସ୍ତୃତ ଭାବେ ପ୍ରଦର୍ଶନ ସହ ସିହ୍ନାଙ୍କୁ ଜଣାଇଥିଲେ। ସେହିଭଳି ରାୟ ମହିଳାମାନଙ୍କ ପ୍ରତି ଷ୍ଟାର୍ଟଅପ୍ ଓଡ଼ିଶାର ପ୍ରତିବଦ୍ଧତା ସମ୍ପର୍କରେ ଅବଗତ କରାଇବା ସହ ୪୧% ସ୍ବୀକୃତିପ୍ରାପ୍ତ ଷ୍ଟାର୍ଟଅପ୍ ସହିତ ମହିଳା ପ୍ରତିଷ୍ଠାତା ଥିବା ଏବଂ ଏହି ସଂଖ୍ୟାକୁ ଆହୁରି ବଢାଇବା ଦିଗରେ ଆବଶ୍ୟକ ପଦକ୍ଷେପ ଓ ଦଳର ପ୍ରୟାସ ଉପରେ ରାୟ ବିସ୍ତୃତ ଆଲୋକପାତ କରିଥିଲେ। ଅପରପକ୍ଷରେ ସିହ୍ନା ଜମ୍ମୁ-କଶ୍ମୀରର ନବସୃଜନ ଦୃଶ୍ୟ ଉପରେ ନିଜର ଅଭିଜ୍ଞତା ବାଣ୍ଟିଥିଲେ ଏବଂ କୃଷି ତଥା ଉଦ୍ୟାନ କୃଷି କ୍ଷେତ୍ରରେ ଷ୍ଟାର୍ଟଅପ୍ ସଂଖ୍ୟା କିପରି ବୃଦ୍ଧି ହୋଇପାରିବ ସେ ସମ୍ପର୍କରେ ସିହ୍ନା ବିସ୍ତୃତ ବର୍ଣ୍ଣନା କରିଥିଲେ।
ଏପରିକି ସେ ଏକ ସକ୍ଷମ ପରିବେଶକୁ ମଜଭୁତ କରିବା ପାଇଁ ସକ୍ରିୟ ଭାବେ କାର୍ଯ୍ୟ କରି ଜମ୍ମୁ-କଶ୍ମୀରରେ ଷ୍ଟାର୍ଟଅପ୍ ଇକୋସିଷ୍ଟମ୍ ପ୍ରତିପାଦନ କରିବାକୁ ସରକାରଙ୍କ ପ୍ରତିବଦ୍ଧତା ଉପରେ ବିସ୍ତୃତ ଆଲୋକପାତ କରିଥିଲେ, ଯାହାକି ଷ୍ଟାର୍ଟଅପ୍ମାନଙ୍କୁ ଉକ୍ତ ଅଞ୍ଚଳରେ ବୃଦ୍ଧି କରିବା ଦିଗରେ ସାହାଯ୍ୟ କରିବ। ଏଥିସହ ରାୟ ମନୋଜ ସିହ୍ନାଙ୍କ ସହ ଯାଇ ତାଙ୍କୁ ଓ-ହବ୍ ଏବଂ କ୍ୟାମ୍ପସରେ ଚାଲିଥିବା କାର୍ଯ୍ୟ ବୁଲାଇ ଦେଖାଇଥିଲେ।
ଏହି ଅବସରରେ ରାୟ କହିଛନ୍ତି, ସିହ୍ନା ଆମ କ୍ୟାମ୍ପସ ପରିଦର୍ଶନ କରିବା ପ୍ରକୃତରେ ଆମ ପାଇଁ ଏହା ଗୌରବର ବିଷୟ ଏବଂ ତାଙ୍କ ଗସ୍ତ ଫଳରେ ଆମେ ବହୁ ଅନୁପ୍ରାଣିତ ହୋଇଛି। ବିଶେଷକରି ଷ୍ଟାର୍ଟଅପ୍ ଓଡ଼ିଶାରେ ଆମର ସାମୂହିକ ପ୍ରତିବଦ୍ଧତା ଏକ ଦୃଢ ମୂଳଦୁଆ ସୃଷ୍ଟି କରିବା ଦିଗରେ କାର୍ଯ୍ୟ କରିବ। ଯାହା ଆମର ଷ୍ଟାର୍ଟଅପ୍ ସମ୍ପ୍ରଦାୟ ତଥା ବ୍ୟାପକ ସମାଜ ପାଇଁ ସହଯୋଗ, ନବସୃଜନ ଏବଂ ପ୍ରଗତିକୁ ପ୍ରୋତ୍ସାହିତ କରିବ।