ସମ୍ବଲପୁର, ୨।୮(ଶୁଭାଶିଷ ପାଢ଼ୀ): ସମ୍ବଲପୁର ଗଙ୍ଗାଧର ମେହେର ବିଶ୍ୱବିଦ୍ୟାଳୟ (ଜିଏମ୍ୟୁ) ପରିସରରେ ମଙ୍ଗଳବାର ସମ୍ବଲପୁରୀ ଦିନ୍ କାର୍ଯ୍ୟକ୍ରମ ଚାଲିଥିବାବେଳେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଥିଲା। ଏଥିରେ ୩ଜଣ ଆହତ ହୋଇଛନ୍ତି। ସେମାନେ ହେଲେ ଛାତ୍ରନେତା ତଥା ଏବିଭିପି ରାଜ୍ୟ ସହ ସମ୍ପାଦକ ଶ୍ୱେତାଂଶୁ ବରାଇ, ଜିଲା ସଂଯୋଜକ ପ୍ରୀତିଶ କର ଓ ଶୁଭମ୍ ପ୍ରସାଦ। ୨ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ବୁର୍ଲା ଭିମ୍ସାରକୁ ସ୍ଥାନାନ୍ତର କରାଯାଇଛି। ଏହି ଘଟଣାକୁ ନେଇ ଥାନାରେ ଉଭୟ ପକ୍ଷରୁ ଅଭିଯୋଗ ହେବା ପରେ ପୋଲିସ ତଦନ୍ତ ଆରମ୍ଭ କରିଛି। ମିଳିଥିବା ସୂଚନା ମୁତାବକ ଅପରାହ୍ନ ପ୍ରାୟ ୨ଟା ସମୟରେ ସମ୍ବଲପୁରୀ ଦିନ୍ ପାଳନ ଅବସରରେ ଛାତ୍ରୀଛାତ୍ର ନାଚଗୀତରେ ମଜି ରହିଥିଲେ। ଏହି କାର୍ଯ୍ୟକ୍ରମ ପରେ କେତେଜଣ ଛାତ୍ର ଯାଉଥିବା ସମୟରେ ଅନ୍ୟ ଗୋଷ୍ଠୀ ପିଲା କମେଣ୍ଟ ମାରିଥିଲେ। ଏହାକୁ ନେଇ ବିଶ୍ୱବିଦ୍ୟାଳୟ ପରିସରରେ ଦୁଇଗୋଷ୍ଠୀ ଭିତରେ ଗଣ୍ଡଗୋଳ ଆରମ୍ଭ ହୋଇଥିଲା। ଜଣେ ଛାତ୍ର ମାଡ଼ ଖାଇବା ପରେ ସେ ସ୍ଥାନୀୟ ଅଞ୍ଚଳର ହୋଇଥିବାରୁ ତାଙ୍କ ସାଙ୍ଗମାନଙ୍କୁ ଘଟଣା ବିଷୟରେ କହି ସେଠାକୁ ଡାକିଥିଲେ। କିଛିସମୟ ମଧ୍ୟରେ ପ୍ରାୟ ୧୫ଜଣ ଛାତ୍ର ବିଶ୍ୱବିଦ୍ୟାଳୟ ଗେଟ ପାଖରେ ଜମା ହୋଇଥିଲେ। ଉଭୟ ଗୋଷ୍ଠୀ ଭିତରେ ମାରପିଟ ହୋଇଥିଲା। ଗଣ୍ଡଗୋଳ କରିଥିବା ଛାତ୍ରମାନେ ଅନ୍ୟ କଲେଜ ଓ ଅଣଛାତ୍ର ବୋଲି କୁହାଯାଉଛି। ଏ ସମ୍ପର୍କରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ପ୍ରତିକ୍ରିୟା ମିଳିପାରି ନାହିଁ।
