କ୍ୱିଭ୍,୪।୪: ରୁଷିଆ ଆକ୍ରମଣରେ ୟୁକ୍ରେନ ଏବେ ଧ୍ୱଂସ ଆଡକୁ ଗତି କରୁଛି। ୟୁକ୍ରେନ ଅନେକ ସହର ନିଶ୍ଚିହ୍ନ ହୋଇପଡିଛି। ଏହି ସମୟରେ, ଗ୍ରାମୀ ପୁରସ୍କାର ସମାରୋହ ମଞ୍ଚରୁ ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ୟୁକ୍ରେନକୁ ସାହାଯ୍ୟ ଏବଂ ସମର୍ଥନ ପାଇଁ ବିଶ୍ୱକୁ ଭାବପ୍ରବଣ ନିବେଦନ କରିଛନ୍ତି।
ଗ୍ରାମୀ ପୁରସ୍କାର ବିତରଣ ସମୟରେ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କିଙ୍କର ଏକ ପୂର୍ବ-ରେକର୍ଡ ହୋଇଥିବା ଭିଡିଓ ପ୍ଲେ କରାଯାଇଥିଲା। ଏହି ଭିଡିଓ ବଡ ପରଦାରେ ପ୍ରଦର୍ଶିତ ହୋଇଥିଲା। ଭିଡିଓ ଜରିଆରେ ସେ ୟୁକ୍ରେନକୁ ସାହାଯ୍ୟ ଏବଂ ସମର୍ଥନ କରିବାକୁ ବିଶ୍ୱକୁ ନିବେଦନ କରିଥିଲେ।ଏହି ଭିଡିଓ ବାର୍ତ୍ତା ୟୁକ୍ରେନ ଗାୟକ ମିକା ନ୍ୟୁଟନ ଏବଂ କବି ଲିୟୁବା ୟାକିମଚୁକଙ୍କ ପ୍ରଦର୍ଶନ ପୂର୍ବରୁ ପ୍ରଦର୍ଶିତ ହୋଇଥିଲା।
ୟୁକ୍ରେନର ରାଷ୍ଟ୍ରପତି ଏହି ଭାବପ୍ରବଣ ଭିଡିଓ ବାର୍ତ୍ତାରେ କହିଛନ୍ତି, ଆମର ପ୍ରିୟଜନମାନେ ପୁନର୍ବାର ଏକାଠି ରହିବେ କି ନାହିଁ ସେ ଜାଣନ୍ତି ନାହିଁ। କିଏ ବଞ୍ଚିବ ଏବଂ ଚିରଦିନ ପାଇଁ ନୀରବି ଯିବ ତାହା ବାଛିବା ପାଇଁ ଯୁଦ୍ଧ ଆମକୁ ଅନୁମତି ଦେଇ ନାହିଁ। ଆମର ସଂଗୀତଜ୍ଞମାନେ ଆହତମାନଙ୍କ ପାଇଁ ଡାକ୍ତରଖାନାରେ ଗୀତ ଗାଉଛନ୍ତି। ଯେଉଁମାନେ ତାଙ୍କ କଥା ଶୁଣିପାରୁ ନାହାଁନ୍ତି, ସେମାନଙ୍କ ପାଇଁ ସେ ଗୀତ ଗାଉଛନ୍ତି। ଆମେ ସ୍ବାଧୀନତା ରକ୍ଷା କରୁଛୁ। ବଞ୍ଚିବା ପାଇଁ ଆମେ ରୁଷିଆ ସହିତ ଲଢୁଛୁ। ଆମକୁ ସାହାଯ୍ୟ କରନ୍ତୁ, ଯେକୌଣସି ପ୍ରକାରେ ଆମକୁ ସମର୍ଥନ କରନ୍ତୁ। ମୁଁ କେବଳ ୟୁକ୍ରେନର ସ୍ବାଧୀନତାର ସ୍ବପ୍ନ ଦେଖିଛି ବୋଲି ଜେଲେନସ୍କି କହିଛନ୍ତି।
