କଟକ,୫ା୮(ଶିଳ୍ପା ପ୍ରିୟଦର୍ଶିନୀ): ବାରବାଟୀ ଷ୍ଟାଡିୟମର ରୂପାନ୍ତରୀକରଣ ହେବ କି ନାହିଁ ରାଜ୍ୟ ସରକାର ସ୍ପଷ୍ଟ କରନ୍ତୁ ବୋଲି ସିଧାସଳଖ ପ୍ରଶ୍ନ କରିଛନ୍ତି କଟକ ମହାନଗର ନିଗମ(ସିଏମ୍ସି) ମେୟର ସୁବାସ ସିଂ। କଟକ ଗଡ଼ଖାଇସ୍ଥିତ ରେସିଡେଣ୍ଡଣ୍ଟଠାରେ ରବିବାର ଅନୁଷ୍ଠିତ ଖବରଦାତା ସମ୍ମିଳନୀରେ ମେୟର କହିଛନ୍ତି, ବାରବାଟୀ ଷ୍ଟାଡିୟମ ଓଡ଼ିଶାର ଗର୍ବ ଓ ଗୌରବର ପ୍ରତୀକ। ଏହାର ରୂପାନ୍ତରୀକରଣ ପାଇଁ ଗତ ଫେବୃଆରୀ ୨୭ରେ ପୂର୍ବତନ ସରକାର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏଥିପାଇଁ ଡିପିଆର୍ ପ୍ରସ୍ତୁତ କରାଯାଇ ୭୦୦ କୋଟି ଟଙ୍କା ବ୍ୟୟ ଅଟକଳ କରାଯାଇଥିଲା। ଏନେଇ ତତ୍କାଳୀନ ସରକାର ଓସିଏ ଏବଂ ବିସିସିଆଇ କର୍ମକର୍ତ୍ତାଙ୍କ ସହ ଆଲୋଚନା କରିଥିଲେ। କେବଳ ସେତିକି ନୁହେଁ, ବର୍ଷ ବର୍ଷ ଧରି ଜମି ଲିଜ୍ ପାଇଁ ଚୁକ୍ତି ହୋଇପାରୁ ନ ଥିବାବେଳେ ବିଜେଡି ସରକାର ଅଲିମ୍ପିକ ଆସୋସିଏଶନକୁ ଜମି ଦେଇଛନ୍ତି। ବର୍ତ୍ତମାନ ଭାଜପା ସରକାର କୌଣସି ପଦକ୍ଷେପ ନେଉନାହାନ୍ତି। ଏପରି କି ବିଧାନସଭାରେ ଗୋଟିଏ ଶବ୍ଦରେ ଏହି ଯୋଜନାକୁ ନା କହିବା ଆଦୌ ଶୋଭା ପାଉନାହିଁ। ଆଉ ଏକ ଷ୍ଟାଡିୟମ କରିବା ଅନ୍ୟ ପ୍ରସଙ୍ଗ, କିନ୍ତୁ ବାରବାଟୀକୁ ନେଇ ସରକାର କ’ଣ ଯୋଜନା ରଖିଛନ୍ତି ତାହା ଜଣାନ୍ତୁ। ଯଦି ଯୋଜନା ନାହିଁ, ତେବେ ପୂର୍ବ ସରକାର କରିଥିବା ଯୋଜନାକୁ କେବେ କାର୍ଯ୍ୟକାରୀ କରିବେ। ବାରବାଟୀକୁ ନେଇ ରାଜନୀତୀକରଣ ହେବା ଉଚିତ୍ ନୁହେଁ, ବରଂ ଏହାର ରୂପାନ୍ତରୀକରଣ କାର୍ଯ୍ୟ ସମ୍ପନ୍ନ ପାଇଁ ମିଳିତ ଚାପ ଓ ଉଦ୍ୟମ ହେବା ଆବଶ୍ୟକ। କଟକର ଗର୍ବ ଓ ଗୌରବ ରକ୍ଷା ପାଇଁ କଟକବାସୀ ମେୟର ଭାବେ ତାଙ୍କୁ ନିର୍ବାଚିତ କରିଛନ୍ତି। କ୍ରୀଡ଼ାକ୍ଷେତ୍ରରେ ବାରବାଟୀ ଯେପରି ଅନ୍ତର୍ଜାତୀୟ ମାନ୍ୟତା ପାଉ ସେନେଇ ସରକାର ଆଗକୁ ଆସିବାର ଆବଶ୍ୟକତା ରହିଛି ବୋଲି ମେୟର କହିଛନ୍ତି।
ଅପରପକ୍ଷରେ ମେୟରଙ୍କ ଏଭଳି ଆକ୍ଷେପକୁ ନେଇ କଡ଼ା ଜବାବ ଦେଇଛନ୍ତି ଭାଜପା ନେତା ତଥା ପୂର୍ବତନ ମନ୍ତ୍ରୀ ସମୀର ଦେ। କଟକ ସିଡିଏ ସେକ୍ଟର-୬ଠାରେ ସମୀର ଗଣମାଧ୍ୟମକୁ କହିଛନ୍ତି, ମେୟରଙ୍କ ଦାୟିତ୍ୱ କେବଳ ସିଏମ୍ସି କଥା ଚିନ୍ତା କରିବା। ବର୍ଷା ହେଲେ କଟକ ପାଣିରେ ବୁଡୁଛି। ରାସ୍ତାଘାଟ ଶୋଚନୀୟ ହୋଇପଡ଼ିଛି। ମଶା ସହରବାସୀଙ୍କୁ ଅତିଷ୍ଠ କରୁଛି। ସହରବାସୀ ଏଭଳି ସମସ୍ୟାର ସମ୍ମୁଖୀନ ହୋଇ ମେୟରଙ୍କ ଉପରେ କ୍ଷୋଭପ୍ରକାଶ କରୁଛନ୍ତି। ତେଣୁ ମେୟର କଟକବାସୀଙ୍କୁ ଭୁଅଁା ନ ବୁଲାନ୍ତୁ। ସହର ସମସ୍ୟା କଥା ନ ବୁଝି ବାରବାଟୀ ଷ୍ଟାଡିୟମକୁ ନେଇ ରାଜନୀତି କାହିଁକି କରୁଛନ୍ତି। ସେ କ୍ରୀଡାବିତ୍ ନୁହନ୍ତି। ଖେଳ ସହ ତାଙ୍କର ସମ୍ପର୍କ ନାହିଁ ଏବଂ ସେ କୌଣସି ଆସୋସିଏଶନରେ ମଧ୍ୟ ନାହାନ୍ତି। ଏପରି କି ତାଙ୍କୁ ଷ୍ଟାଡିୟମରେ ଆମେ କେବେ ଦେଖିନୁ। ତେଣୁ ସେ ଏ କଥାରେ ମୁଣ୍ଡ ନ ପୂରାଇ ମେୟର ଭାବେ ସହରର ସମସ୍ୟା କିପରି ସମାଧାନ କରିବେ ସେ ନେଇ ଧ୍ୟାନ ଦିଅନ୍ତୁ। ବର୍ତ୍ତମାନର ଭାଜପା ସରକାର ବାରବାଟୀ ଷ୍ଟାଡିୟମ ବାବଦରେ ଅବଗତ ଅଛନ୍ତି। ଷ୍ଟାଡିୟମର ପୁନରୁଦ୍ଧାର ନିଶ୍ଚିତ ହେବ ବୋଲି ସମୀର କହିଛନ୍ତି।
