ଥିରୁଭାନନ୍ତପୁରମ୍, ୧୫।୩ : ହିଜାବ୍ ପ୍ରସଙ୍ଗରେ କର୍ନାଟକ ହାଇକୋର୍ଟଙ୍କ ରାୟକୁ ରାଜ୍ୟପାଳ ଆରିଫ୍ ମହମ୍ମଦ ଖାଁ ସମର୍ଥନ କରିଛନ୍ତି ସେ କହିଛନ୍ତି ଯେ, କୋରାନ୍ରେ ହିଜାବ୍ ସମ୍ପର୍କରେ ୭ ଥର ଉଲ୍ଲେଖ କରାଯାଇଛି। କିନ୍ତୁ ଡ୍ରେସ୍ କୋଡ୍ ଅନୁଯାୟୀ ନୁହେଁ। କୋର୍ଟଙ୍କ ରାୟର ଉତ୍ତରରେ କେରଳ ରାଜ୍ୟପାଳ କହିଛନ୍ତି ଯେ ଆମେ ଏହାକୁ ସ୍ବାଗତ କରିବା ଉଚିତ। ଏହା ସହିତ ସେ କହିଛନ୍ତି, ଯୁବବର୍ଗ ନିଜ ପାଇଁ, ସମାଜ ତଥା ଦେଶ ଲାଗି ଉନ୍ନତିମୂଳକ କାର୍ଯ୍ୟ କରିବା ଆବଶ୍ୟକ।
ରାଜ୍ୟର ସ୍କୁଲ ଏବଂ କଲେଜଗୁଡ଼ିକରେ ହିଜାବ ଉପରେ ନିଷେଧାଦେଶ ଜାରି କରାଯାଇଥିବା ସରକାରୀ ଆଦେଶକୁ ଚ୍ୟାଲେଞ୍ଜ କରି କର୍ଣ୍ଣାଟକ ହାଇକୋର୍ଟ ମଙ୍ଗଳବାର ଆବେଦନକୁ ଖାରଜ କରିଦେଇଛନ୍ତି।
ମୁଖ୍ୟ ବିଚାରପତି ରିତୁ ରାଜ ଆୱସ୍ତିଙ୍କ ନେତୃତ୍ୱରେ ଏକ ତିନିଜଣିଆ ଖଣ୍ଡପୀଠ କହିଛନ୍ତି ଯେ ହିଜାବ ପିନ୍ଧିବା ଇସଲାମରେ ଏକ ଜରୁରୀ ଧାର୍ମିକ ପ୍ରଥା ନୁହେଁ ଏବଂ ୟୁନିଫର୍ମ ଆକାରରେ ଛାତ୍ରୀମାନେ ଯୁକ୍ତିଯୁକ୍ତ ପ୍ରତିବନ୍ଧକ ଉପରେ ଆପତ୍ତି କରିପାରିବେ ନାହିଁ।
ଖଣ୍ଡପୀଠ ରାଜ୍ୟ ସରକାରଙ୍କ ପକ୍ଷରୁ ଫେବୃଆରୀ ୫ରେ ଜାରି ହୋଇଥିବା ଆଦେଶକୁ ସମର୍ଥନ କରିଛନ୍ତି ଏବଂ ଏହା ସାମ୍ବିଧାନିକ ବ୍ୟବସ୍ଥାର ଉଲ୍ଲଂଘନ କରୁନାହିଁ ବୋଲି କହିଛନ୍ତି।