ନୂଆଦିଲ୍ଲୀ,୨୪ା୭: NEET ପେପର ଲିକ୍ ଏବଂ ଦେଶବ୍ୟାପୀ ପ୍ରଦର୍ଶନ ମଧ୍ୟରେ ଜାତୀୟ ପରୀକ୍ଷା ଏଜେନ୍ସି (NTA) ରେ ବ୍ୟାପକ ପରିବର୍ତ୍ତନ ପ୍ରକ୍ରିୟା ଆରମ୍ଭ ହୋଇଛି। ଏହାର ଏକ ଅଂଶବିଶେଷ ଭାବେ NTA ଶୁକ୍ରବାର ଦିନ ୪୭ ଜଣ ଅଧିକାରୀଙ୍କୁ ଚାକିରିରୁ ବିଦା କରିଦେଇଛି। ଏହି ଅଧିକାରୀମାନଙ୍କ ମଧ୍ୟରୁ କେତେଜଣଙ୍କ ବିରୋଧରେ ଆଇନଗତ ଏବଂ ଫୌଜଦାରୀ (କ୍ରିମିନାଲ୍) କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯିବ। ଆଗାମୀ ଦିନରେ ଆହୁରି ଅନେକ ସଂସ୍କାରମୂଳକ ପଦକ୍ଷେପ ନିଆଯିବ ବୋଲି ଜଣାପଡ଼ିଛି।
ସୂତ୍ରରୁ ପ୍ରକାଶ ଯେ, କେନ୍ଦ୍ର ସରକାର ଏଜେନ୍ସିର ଗଠନରେ ବ୍ୟାପକ ପରିବର୍ତ୍ତନ କରିବାକୁ ଯାଉଛନ୍ତି। ଆଗାମୀ ଗୋଟିଏ ମାସ ମଧ୍ୟରେ NTA ର ପୁନର୍ଗଠନ ହେବାର ସମ୍ଭାବନା ରହିଛି, ଯାହାଦ୍ୱାରା ଏହାର କାର୍ଯ୍ୟପ୍ରଣାଳୀ ଏବଂ ପ୍ରଶାସନିକ ବ୍ୟବସ୍ଥାରେ ଅନେକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଅଣାଯିବ।
ସରକାରଙ୍କ ମୂଳ ଲକ୍ଷ୍ୟ ଏକ ସମ୍ପୂର୍ଣ୍ଣ ଲିକ୍-ପ୍ରୁଫ୍ ପରୀକ୍ଷା ବ୍ୟବସ୍ଥା ତିଆରି କରିବା, ଯାହାଦ୍ୱାରା ପ୍ରଶ୍ନପତ୍ର ଲିକ୍ ଭଳି ଅଘଟଣ ସମ୍ପୂର୍ଣ୍ଣ ରୂପେ ବନ୍ଦ ହୋଇପାରିବ ଏବଂ ଜାତୀୟ ସ୍ତରର ପରୀକ୍ଷାଗୁଡ଼ିକର ସ୍ୱଚ୍ଛତା ଓ ବିଶ୍ୱସନୀୟତା ମଜବୁତ ହୋଇପାରିବ।
NTA ପ୍ରତିବର୍ଷ JEE, NEET, CUET ସମେତ ପ୍ରାୟ ୧୫ ରୁ ୨୦ଟି ଜାତୀୟ ସ୍ତରର ପ୍ରବେଶିକା ପରୀକ୍ଷା ପରିଚାଳନା କରିଥାଏ। ସାମ୍ପ୍ରତିକ ପେପର ଲିକ୍ ବିବାଦ ପରେ ଏଜେନ୍ସିର କାର୍ଯ୍ୟଦକ୍ଷତାକୁ ନେଇ ଅନେକ ପ୍ରଶ୍ନ ଉଠିଥିଲା, ଯାହାଫଳରେ ଏହି ବ୍ୟାପକ ସଂସ୍କାର ପ୍ରକ୍ରିୟା ଆରମ୍ଭ ହୋଇଛି।
NEET ପେପର ଲିକ୍କୁ ନେଇ ଚାଲିଥିବା ପ୍ରତିବାଦ ମଧ୍ୟରେ କେନ୍ଦ୍ର ସରକାର ଶିକ୍ଷା ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀଙ୍କୁ ବଦଳାଇ ଦେଇଛନ୍ତି। ଗୁରୁବାର ବିଳମ୍ବିତ ରାତିରେ ପ୍ରକାଶିତ ଏକ ସରକାରୀ ବିଜ୍ଞପ୍ତି ଅନୁଯାୟୀ, ଉଚ୍ଚଶିକ୍ଷା ବିଭାଗର ସଚିବ ଭିନୀତ ଯୋଶୀଙ୍କୁ ତାଙ୍କ ପଦରୁ ହଟାଇ ଦିଆଯାଇଥିବା ବେଳେ ତାଙ୍କ ସ୍ଥାନରେ ନରେଶ ପାଲ ଗଙ୍ଗୱାରଙ୍କୁ ନିଯୁକ୍ତ କରାଯାଇଛି।
୧୯୯୪ ବ୍ୟାଚର ରାଜସ୍ଥାନ କ୍ୟାଡର ଆଇ.ଏ.ଏସ୍ (IAS) ଅଧିକାରୀ ନରେଶ ପାଲ ଗଙ୍ଗୱାର ଦେଶର ପରୀକ୍ଷା ବ୍ୟବସ୍ଥାକୁ ଅଧିକ ମଜବୁତ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିବେ ବୋଲି ଆଶା କରାଯାଉଛି। ତାଙ୍କର ପ୍ରାଥମିକ କାର୍ଯ୍ୟଗୁଡ଼ିକ ମଧ୍ୟରେ ଜାତୀୟ ସ୍ତରର ପ୍ରବେଶିକା ଏବଂ ନିଯୁକ୍ତି ପରୀକ୍ଷାରେ ସ୍ୱଚ୍ଛତା ବୃଦ୍ଧି କରିବା, ପରୀକ୍ଷା ବିବାଦ ଦ୍ୱାରା ପ୍ରଭାବିତ ଛାତ୍ରଛାତ୍ରୀଙ୍କ ଆତ୍ମବିଶ୍ୱାସ ଫେରାଇ ଆଣିବା ଏବଂ NTA ର କାର୍ଯ୍ୟକଳାପର ସମୀକ୍ଷା କରିବା ଅନ୍ତର୍ଭୁକ୍ତ।
