ସମ୍ବଲପୁର,୧ା୫(ବ୍ୟୁରୋ): ସମ୍ବଲପୁରରେ ହନୁମାନ ଜୟନ୍ତୀ ଶୋଭାଯାତ୍ରା ସମୟରେ ଘଟିଥିବା ହିଂସା ଘଟଣା ପାଇଁ ସରକାର ଦାୟୀ । ଗୃହ ବିଭାଗ ମନ୍ତ୍ରୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଛନ୍ତି। ସେ ଏହି ଘଟଣାରେ ସମ୍ପୂର୍ଣ୍ଣ ଦାୟୀ। ତେଣୁ ନିଜ ଭୁଲ୍କୁ ମୁଖ୍ୟମନ୍ତ୍ରୀ ସ୍ବୀକାର କରନ୍ତୁ । ଏହା ନ କରି ଓଲଟା ଜନସାଧାରଣଙ୍କୁ ହଇରାଣ କରିବା ଭଳି ପଦକ୍ଷେପ ନିଆଯାଉଛି। ଗୋଇନ୍ଦା ବିଭାଗ ପୂର୍ବରୁ ଦଙ୍ଗା ହୋଇପାରେ ବୋଲି ସୂଚନା ଦେଇଥିଲା। ଏ ନେଇ ଗୃହ ବିଭାଗ, ସ୍ଥାନୀୟ ଜିଲା ପ୍ରଶାସନ ଓ ପୋଲିସ ପ୍ରଶାସନକୁ ମଧ୍ୟ ଅବଗତ କରାଯାଇଥିଲା । କିନ୍ତୁ ଗୋଇନ୍ଦା ରିପୋର୍ଟକୁ ଗୁରୁତ୍ୱ ଦିଆଗଲା ନାହିଁ, ତେଣୁ ଏଭଳି ଘଟଣା ଘଟିଗଲା। ସ୍ଥାନୀୟ ଝାଡୁଆପଡା ଯୁବ ଉଦୟନ କ୍ଲବ ପରିସରରେ ରବିବାର ମନ୍ କୀ ବାତ୍ କାର୍ଯ୍ୟକ୍ରମରେ ଯୋଗଦେବା ପରେ ଭାଜପା ରାଜ୍ୟ ସଭାପତି ମନମୋହନ ସାମଲ ଏହା କହିଛନ୍ତି ।
ସେ ଆହୁରି କହିଥିଲେ ଯେ, କେଉଁମାନଙ୍କର ଏଥିରେ ସଂପୃକ୍ତି ରହିଛି ଓ ଘଟଣା ପାଇଁ କିଏ ଦାୟୀ ତା’ର ଉପଯୁକ୍ତ ତଦନ୍ତ ହେବା ଆବଶ୍ୟକ । ତେଣୁ ସିବିଆଇ ତଦନ୍ତ କରୁ । ପୂର୍ବରୁ ପୋଲିସ ସ୍ବୀକାର କରିଛି ଯେ, ଏହି ଘଟଣା ପାଇଁ ପୂର୍ବ ପ୍ରସ୍ତୁତି ରହିଥିଲା। ତେଣୁ ରାଜ୍ୟ ସରକାର ନିଜ ଭୁଲ୍କୁ ମାନି କେଉଁ ପରିସ୍ଥିତିରେ ଏତେ ବଡ଼ ଘଟଣା ଘଟିଲା ଶ୍ୱେତପତ୍ର ପ୍ରକାଶ କରନ୍ତୁ । ଫଳରେ ସାଧାରଣ ଲୋକ ଘଟଣା ସମ୍ପର୍କରେ ସବୁ ଜାଣିପାରିବେ। ଜନସାଧାରଣ ଏହାର ସମୀକ୍ଷା କରିବା ସହ ବିଚାର କରିବେ । ସରକାର ଗୋଟିଏ ଭୁଲ୍ ପାଇଁ ଏକାଧିକ ଭୁଲ୍ କରି ଚାଲିଛନ୍ତି । ଏପ୍ରିଲ ୫ ତାରିଖରେ କେନ୍ଦ୍ର ଗୃହ ବିଭାଗ ପକ୍ଷରୁ ମଧ୍ୟ ରାମନବମୀ ଓ ହନୁମାନ ଜୟନ୍ତୀରେ ହିଂସା ହେବା ନେଇ ସତର୍କ କରାଯାଇଥିଲା । ହେଲେ ଗୁରୁତ୍ୱ ଦିଆଗଲା ନାହିଁ । ପୂର୍ବ ବର୍ଷ ମଧ୍ୟ ଉତ୍ତେଜନା ପ୍ରକାଶ ପାଇଥିଲା । ଏହାସତ୍ତ୍ୱେ ପଦକ୍ଷେପ ଗ୍ରହଣ କରାଗଲା ନାହିଁ । ଜିଲାରେ ସିଆର୍ପିଏଫ୍ ବାଟାଲିୟନ ଅଛନ୍ତି । ଏହାସହ ଅନ୍ୟ କେନ୍ଦ୍ରୀୟ ପୋଲିସ ବାହିନୀକୁ ଏହି ସମୟରେ ଜିଲାରେ ନିୟୋଜିତ କରାଯାଇ ପାରିଥାନ୍ତା । ଏହା କରାଗଲା ନାହିଁ । ଏହାସହ ଜିଲାରେ ପୋଲିସ ମୁଖିଆଙ୍କ ତ୍ରୁଟିପୂର୍ଣ୍ଣ ପରିଚାଳନା ଯୋଗୁ ଏଭଳି ଘଟଣା ଘଟିଛି। ଭାଜପାର ୪ ଜଣିଆ ସଂସଦୀୟ ଟିମ୍ ଆସିବେ। ଆସନ୍ତା ୨ ତାରିଖରେ ହିଂସା ଘଟଣାରେ ମୃତକ ପରିବାର, ଆହତ ପରିବାରକୁ ଭେଟିବେ । ତାଙ୍କ ଗାଁ ଲୋକଙ୍କ ସହିତ ଆଲୋଚନା କରିବେ। ସହରର ବୁଦ୍ଧିଜୀବୀମାନଙ୍କୁ ନେଇ ବୈଠକ କରି ରିପୋର୍ଟ ସଂଗ୍ରହ କରିବେ । ସରକାର କେତେ ଦିନ ପୀଡ଼ିତ ଓ ମୃତକ ପରିବାରକୁ ଲୁଚାଇ ରଖିବେ । ବାରମ୍ବାର ଭୁଲ୍ କରି ଚାଲିଥିଲେ, ତାହା ସମସ୍ୟା ହେବ । ସାଧାରଣ ଲୋକ, ନେତାମାନେ ଘଟଣାସ୍ଥଳ ବୁଲି ଦେଖିଲେ ହିଂସା ପ୍ରଶମିତ ହୋଇପାରିବ। ହିଂସା ପାଇଁ ମୃତକ ଚନ୍ଦ୍ରକାନ୍ତ ମିର୍ଦ୍ଧାଙ୍କ ମୃତଦେହ ରାତିଅଧିଆ ସତ୍କାର କରାଗଲା, ଯାହା ତାଙ୍କ ପରମ୍ପରା ବାହାରେ । ସତ କେବେ ଲୁଚି ରହିବ ନାହିଁ ବୋଲି ସାମଲ କହିଥିଲେ। ସେ ଆହୁରି କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମନ୍ କୀ ବାତ୍ କାର୍ଯ୍ୟକ୍ରମ ଆଜି ୧୦୦ ଏପିସୋଡ୍ରେ ପହଞ୍ଚିଛି । ସଂସ୍କୃତି, ପରମ୍ପରା, ଦେଶ ଓ ଇତିହାସ ସମ୍ପର୍କରେ ନିୟମିତ ଭାବେ ଏହି କାର୍ଯ୍ୟକ୍ରମ ହୋଇ ଆସୁଛି । କେବଳ ଦେଶରେ ନୁହେଁ, ବିଦେଶରେ ମଧ୍ୟ ଏହି କାର୍ଯ୍ୟକ୍ରମକୁ ପ୍ରଶଂସା କରାଯାଉଛି ବୋଲି ସେ କହିଥିଲେ ।
