ନୂଆଦିଲ୍ଲୀ,୨୯।୧୧: ଶୀତକାଳୀନ ଅଧିବେଶନ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂସଦରେ ଗଣମାଧ୍ୟମକୁ ସମ୍ବୋଧିତ କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ ସରକାର ଦେଶ ହିତକୁ ଦୃଷ୍ଟିରେ ରଖି ପ୍ରତ୍ୟେକ ପ୍ରସଙ୍ଗ ଉପରେ ଖୋଲା ଆଲୋଚନା ପାଇଁ ପ୍ରସ୍ତୁତ। ପ୍ରତ୍ୟେକ ପ୍ରଶ୍ନର ଉତ୍ତର ଦେବାକୁ ସରକାର ପ୍ରସ୍ତୁତ ଅଛନ୍ତି। ତେବେ ଗାରିମା ରକ୍ଷା ଲାଗି ସଂସଦରେ ପ୍ରଶ୍ନ କରାଯିବା ସହିତ ଶାନ୍ତି ବଜାୟ ରହିବା ଉଚିତ। ସଦନ ଏବଂ ଚେୟାର ପ୍ରତି ସମ୍ମାନବୋଧ ରହିବା ଜରୁରୀ।
ପ୍ରଧାନମନ୍ତ୍ରୀ କହିଛନ୍ତି, ’ସଂସଦର ଏହି ଅଧିବେଶନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଦେଶର ପ୍ରତ୍ୟେକ ନାଗରିକ ଚାହାଁନ୍ତି ଯେ ସଂସଦର ପ୍ରତ୍ୟେକ ଅଧିବେଶନରେ ଦେଶର ଅଗ୍ରଗତି ଉପରେ ଆଲୋଚନା କରାଯାଉ। ଦେଶର ଆଗ୍ରହ ଏବଂ ବିକାଶ ପାଇଁ ସଂସଦରେ ଆଲୋଚନା ହେବା ଅପରିହାର୍ଯ୍ୟ।
ଦେଶ ମଧ୍ୟ ଚାହୁଁଛି ଯେ ଭାରତର ସଂସଦର ବର୍ତ୍ତମାନର ଅଧିବେଶନ ଏବଂ ଆଗାମୀ ସମସ୍ତ ଅଧିବେଶନରେ ସ୍ବଧୀନତା ପ୍ରେମୀଙ୍କ ଭାବନା ଅନୁଯାୟୀ ଦେଶସ୍ବାର୍ଥରେ ଆଲୋଚନା କରାଯାଉ। ଭବିଷ୍ୟତରେ ସଂସଦ କିପରି ଚାଲିବ, ତାହା ବତ୍ତର୍ମାନା ଅବଦାନ ଏବଂ ସକାରାତ୍ମକ କାର୍ଯ୍ୟ ଉପରେ ନିର୍ଭର କରିବ। କିଏ କେତେ ବଳ ପ୍ରୟୋଗ କରି ଅଧିବେଶନକୁ ଅଟକାଇଲା ଏହା କେବେ ମଧ୍ୟ ସଫଳତାର ମାନଦଣ୍ଡ ନୁହେଁ ବୋଲି ପ୍ରଧାନମନ୍ତ୍ରୀ କହିଛନ୍ତି।
ସଂସଦର ଶୀତକାଳୀନ ଅଧିବେଶନ ସୋମବାରଠାରୁ ଆରମ୍ଭ ହୋଇ ଡିସେମ୍ବର ୨୩ ପର୍ଯ୍ୟନ୍ତ ଚାଲିବ। ଏହି ସମୟ ମଧ୍ୟରେ ସମୁଦାୟ ୧୯ କାର୍ଯ୍ୟଦିବସ ରହିଛି। କୃଷି ଆଇନ ପ୍ରତ୍ୟାହାର ସହ ଜଡିତ ବିଲ ସମେତ ସଂସଦରେ ପ୍ରାୟ ୩୦ ଟି ବିଲ ଆଗତ କରାଯିବାର ଯୋଜନା ରହିଛି। କୃଷି ଆଇନ ରଦ୍ଦ ବିଲ -୨୦୨୧ ଲୋକସଭାରେ ବିଚାର ଏବଂ ପାସ ପାଇଁ ତାଲିକାଭୁକ୍ତ ହୋଇସାରିଛି । ଲୋକସଭାରେ ଏହି ବିଲ ପାରିତ ହେବା ପରେ ଏହାକୁ ରାଜ୍ୟସଭାକୁ ଅଣାଯିବ। ମାତ୍ର ଶୀତ ଅଧିବେଶନରେ ବିରୋଧୀଙ୍କ ହଟ୍ଟଗୋଳ ସୃଷ୍ଟି କରିବାର ସମ୍ଭାବନା ରହିଛି ।
