ନୂଆଗାଁ, ୧୮ା୬ (ଧନେଶ୍ୱର ସାହୁ )୬୦ ବର୍ଷରୁ ଊର୍ଦ୍ଧ୍ୱ ବୃଦ୍ଧାବୃଦ୍ଧଙ୍କୁ ସରକାର ଭତ୍ତା ଦେଉଥିବା କଥା କହୁଛନ୍ତି । ହେଲେ ନୂଆଗାଁ ବ୍ଲକରେ ୬୪ ବର୍ଷର ବୃଦ୍ଧାବୃଦ୍ଧ ଆବେଦନ କରିଥିଲେ ମଧ୍ୟ ସେମାନଙ୍କୁ ଅଦ୍ୟାବଧି ଭତ୍ତା ପ୍ରଦାନ କରାଯାଉ ନାହିଁ । ନୟାଗଡ଼ ଜିଲା ନୂଆଗାଁ ବ୍ଲକରେ ବର୍ତ୍ତମାନ ୬୫ ବର୍ଷରୁ ଊର୍ଦ୍ଧ୍ୱ ଲୋକଙ୍କୁ ଭତ୍ତା ପ୍ରଦାନ କରାଯାଉଛି ା ଏଥିପାଇଁ ସରକାରଙ୍କ ଏହି ଯୋଜନା ଏକ ଭେଳିକି ବୋଲି ଅଭିଯୋଗ ହେଉଛି ।
ପରିଣତ ବୟସରେ ବୃଦ୍ଧାବୃଦ୍ଧମାନଙ୍କୁ ସହାୟତା ପାଇଁ ସରକାର ଭତ୍ତା ଯୋଜନା କରିଛନ୍ତି ା ୬୦ ବର୍ଷ ବୟସର ବ୍ୟକ୍ତିମାନେ ଭତ୍ତା ପାଇଁ ଆବେଦନ କଲେ ୬୦ ବର୍ଷରୁ ୭୯ ବର୍ଷ ପର୍ଯ୍ୟନ୍ତ ୫୦୦ ଟଙ୍କା ଓ ୮୦ ବର୍ଷରୁ ଊର୍ଦ୍ଧ୍ୱ ବ୍ୟକ୍ତିମାନଙ୍କୁ ୭୦୦ ଟଙ୍କା ଭତ୍ତା ଦେବାର ବ୍ୟବସ୍ଥା ରହିଛି । ଏହି ଭତ୍ତା ଟଙ୍କା ଦ୍ୱାରା ଲୋକମାନଙ୍କ ଅନେକ ଉପକାର ହେଉଛି । ପରିଣତ ବୟସରେ ସେମାନେ ଔଷଧ ଖର୍ଚ୍ଚ କରିବା ସହ ନିଜ ଇଛାରେ କିଛି କିଣି ପାରୁଛନ୍ତି । ତେବେ ସରକାର ୬୦ ବର୍ଷ ବୟସରୁ ଭତ୍ତା ଦେଉଥିବା କଥା କହୁଥିବା ବେଳେ ପ୍ରକୃତରେ ତାହା କରାଯାଉ ନ ଥିବା ଅଭିଯୋଗ ହେଉଛି। ନୂଆଗାଁ ବ୍ଲକରେ ୬୦ରୁ ୬୪ ବର୍ଷ ମଧ୍ୟରେ ପ୍ରାୟ ୨ ହଜାରରୁ ଊର୍ଦ୍ଧ୍ୱ ବ୍ୟକ୍ତି ଭତ୍ତା ପାଇଁ ଆବେଦନ କରିଥିଲେ ମଧ୍ୟ ସେମାନଙ୍କୁ ଭତ୍ତା ଦିଆଯାଉନାହିଁ। ୬୫ ବର୍ଷରୁ ଊର୍ଦ୍ଧ୍ୱ ବ୍ୟକ୍ତିମାନଙ୍କୁ ଭତ୍ତା ପ୍ରଦାନ କରାଯାଉଛି। ୬୦ ବର୍ଷ ବୟସର ବ୍ୟକ୍ତିମାନେ ଭତ୍ତା ପାଇଁ ଆବେଦନ କରି ବାରମ୍ବାର ବ୍ଲକ କାର୍ଯ୍ୟାଳୟକୁ ଦୌଡି ନିରାଶ ହେଉଛନ୍ତି। ତୁମର ସିରିଏଲ ଆସିଲେ ତମକୁ ଭତ୍ତା ଦିଆଯିବ ବୋଲି ସଂପୃକ୍ତ ସାମାଜିକ ସୁରକ୍ଷା ବିଭାଗ ପକ୍ଷରୁ ସୂଚନା ଦିଆଯାଉଛି । ନୂଆଗାଁ ବ୍ଲକ କାପ୍ତାପଲି ପଞ୍ଚାୟତର ବଂଶୀ ଦେଇ, ବାହାଡାଝୋଲା ଘଡେଇବନ୍ଧ ଗ୍ରାମର ଅଭିମନ୍ୟୁ ବାରିକ, ନରସିଂହ ବାରିକ, ଉଚ୍ଛବ ବାରିକଙ୍କୁ ୬୩ ବର୍ଷରୁ ଅଧିକ ବର୍ଷ ହୋଇଥିଲେ ମଧ୍ୟ ସେମାନେ ବାର୍ଦ୍ଧକ୍ୟ ଭତ୍ତା ପାଇବାରୁ ବଞ୍ଚିତ ହୋଇଛନ୍ତି। ଏବାବଦରେ ନୂଆଗାଁ ବ୍ଲକ ସାମାଜିକ ସୁରକ୍ଷା ଅଧିକାରୀ ସ୍ବର୍ଣ୍ଣସାରିକାଙ୍କୁ ପଚାରିବାରେ ଆବେଦନକାରୀଙ୍କ ସଂଖ୍ୟା ଅଧିକ ହେଉଥିବା ବେଳେ ସରକାରଙ୍କ ଟାର୍ଗେଟ ବହୁତ କମ୍ ରହୁଛି । ସେଥିପାଇଁ ଅଧିକ ବୟସର ଲୋକମାନଙ୍କୁ ଆମେ ପ୍ରଥମେ ଗୁରୁତ୍ୱ ଦେଉଛୁ ବୋଲି କହିଛନ୍ତି।
