ବଅଁରପାଳ, ୩୧ା୧୦(ଡି.ଏନ.ଏ.) ପ୍ରତିବର୍ଷ ପରି ବାର୍ଷିକ ପୂଜାରେ ଚଳଚଞ୍ଚଳ ହେବନି ବଅଁରପାଳ ବ୍ଲକ ଗୋତମରା ଗ୍ରାମର ମା’ ବ୍ରହ୍ମାୟଣୀଙ୍କ ପୀଠ। ବସିବନି ଦୋକାନ ବଜାର କି ଜମିବନି ଶ୍ରଦ୍ଧାଳୁଙ୍କ ଭିଡ଼। ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ଆୟୋଜନ ହେବନି। ନିରାଡମ୍ବରରେ କେବଳ ବିଧି ରକ୍ଷା କରି ମା’ଙ୍କ ପୂଜାର୍ଚ୍ଚନା କରାଯିବ। ଏଥିଯୋଗୁ ପୂଜା ଅବସରରେ ବି ଖାଁ ଖାଁ ଲାଗିବ ଗୋତମରା ଗାଁ । ଯେଉଁଠି ବାର୍ଷିକ ପୂଜା ପାଇଁ ୩ ଦିନ ଧରି ସମଗ୍ର ଗାଁ ଚଳଚଞ୍ଚଳ ହୋଇଉଠୁଥିଲା ସେଠାରେ ନିରାଡମ୍ବରରେ ପୂଜାକୁ ନେଇ ମନଉଣା କରିଛନ୍ତି ଶ୍ରଦ୍ଧାଳୁ।
ପ୍ରତିବର୍ଷ ଆଶ୍ୱିନ ମାସ କୁମାର ପୂର୍ଣ୍ଣିମା ତିଥିରେ ପାଳନ ହୋଇଥାଏ ଏହି ଉତ୍ସବ। ୩ ଦିନ ଧରି ଚାଲୁଥିବା ଏହି ଯାତ୍ରା ନକଟି ଯାତ୍ରା ଭାବରେ ମଧ୍ୟ ଜଣାଶୁଣା। ଯାତ୍ରା ଦିନ ଗ୍ରାମର ଦିଅଁଘରୁ ଏକ ଶୋଭାଯାତ୍ରା ଗ୍ରାମ ପରିକ୍ରମା କରି ପୀଠସ୍ଥଳୀକୁ ଯାଇଥାଏ। ପ୍ରାୟ ୫ ଲକ୍ଷରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ଘୋଡ଼ା ନାଚ, ନାମ ସଂକୀର୍ତ୍ତନ, ଦଣ୍ଡନୃତ୍ୟ ଆଦି ପରିବେଷଣ କରାଯାଏ। ୩ ଦିନ ଧରି ବିଭିନ୍ନ ଦୋକାନ ବଜାର ବସିଥାଏ। ଏଥିସହ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ଆୟୋଜନ କରାଯାଏ। ହେଲେ ଚଳିତ ଥର କରୋନା ଯୋଗୁ ଏ ସମସ୍ତ କାର୍ଯ୍ୟକ୍ରମ ଉପରେ କଟକଣା ଲଗାଯାଇଛି।
କୋଭିଡ୍ ନିୟମ ମଧ୍ୟରେ ପାଳନ
ମା’ ବ୍ରହ୍ମାୟଣୀଙ୍କ ପୂଜା ପ୍ରତିବର୍ଷ ଆଡମ୍ବରରେ କରାଯାଇଥାଏ। ହେଲେ ଚଳିତ ବର୍ଷ କୋଭିଡ୍ କଟକଣା ଲଗାଯାଇଥିବାରୁ କୌଣସି ଜାକଜମକ ନାହିଁ। କେବଳ ନିୟମ ଅନୁଯାୟୀ ବିଧି ରକ୍ଷା ପାଇଁ ପୀଠରେ ପୂଜାର୍ଚ୍ଚନା ହେବ।
-ରଜନୀକାନ୍ତ ସିଂ, ବିଧାୟକ ତଥା ଗ୍ରାମ ସଭାପତି
ପରମ୍ପରାରେ ଏଥର ବ୍ୟତିକ୍ରମ
ଶତାଧିକ ବର୍ଷରୁ ମା’ଙ୍କ ପୂଜା ପରମ୍ପରା ଅନୁଯାୟୀ ଗ୍ରାମରେ ପାଳନ ହୋଇଆସୁଛି। କିନ୍ତୁ ପ୍ରଥମ କରି ଚଳିତବର୍ଷ ପୂଜାରେ ବ୍ୟତିକ୍ରମ ଦେଖାଦେଇଛି। କରୋନା ସମସ୍ତଙ୍କ ମନରେ ଥିବା ଉତ୍ସାହକୁ ମାରି ଦେଇଛି।
-କୁମୁଦ ବିହାରୀ ସିଂ, ଗ୍ରାମବାସୀ
ହେବନି ଶୋଭାଯାତ୍ରା
ପ୍ରତି ବର୍ଷ ଯାତ୍ରାରେ ୫ ଲକ୍ଷରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ଶୋଭାଯାତ୍ରା ଆୟୋଜନ କରାଯାଏ। ଏଥିରେ ବିଭିନ୍ନ ଅଞ୍ଚଳର କଳାକାରମାନେ ଗୀତ ନୃତ୍ୟ ପରିବେଷଣ କରନ୍ତି। ମିନାବଜାର ସହ ଅପେରା କାର୍ଯ୍ୟକ୍ରମ ମଧ୍ୟ ହୋଇଥାଏ। କିନ୍ତୁ ଚଳିତ ବର୍ଷ ତାହା ବନ୍ଦ ରହିଛି।
-ଭରତ ମାଝି, ଗ୍ରାମବାସୀ
ଦର୍ଶନ ପାଇବେନି ଭକ୍ତ
କଟକଣାରେ ପୂଜା ପାଳନ ଯୋଗୁ ଚଳିତ ବର୍ଷ ମା’ଙ୍କ ଦର୍ଶନ ପାଇପାରିବେନି ଭକ୍ତ। କେବଳ ନୀତିକାନ୍ତି ଅନୁଯାୟୀ ପୂଜା ହେଉଥିବାରୁ ପୀଠକୁ ଭକ୍ତଙ୍କ ଆଗମନକୁ ବାରଣ କରାଯାଇଛି। ସେଥିପାଇଁ ଗ୍ରାମବାସୀ ନିରାଶ ହୋଇଛନ୍ତି।
– ସୁବାସ ପଟ୍ଟନାୟକ, ଗ୍ରାମବାସୀ
