ନୂଆଦିଲ୍ଲୀ,୪।୮: ଦେଶରେ କରୋନା ମହାମାରୀର ଦ୍ୱିତୀୟ ଲହର ଥମିବାରେ ଲାଗିଛି। ସଂକ୍ରମରରୁ ଦୂରେଇ ରହିବା ଲାଗି ସରକାରଙ୍କ ପକ୍ଷରୁ ସାର୍ବଜନୀକ ଟିକାରଣ ଅଭିଯାନ ଜାରି ରହିଛି। ଏପରିସ୍ଥଳେ ଦିଲ୍ଲୀରୁ ଖୁସି ଖବର ଆସିଛି। ଆସନ୍ତା ୨ ସପ୍ତାହ ମଧ୍ୟରେ ୧୨ ବର୍ଷରୁ ୧୮ ବର୍ଷ ବୟସ୍କ ପିଲାଙ୍କ ଲାଗି ଭାକ୍ସିନ୍ ଆସିବାର ସମ୍ଭାବନା ରହିଛି। ଜାଡ଼ିୟସ୍ କାଡ଼ିଲା ଦ୍ୱାର ପ୍ରସ୍ତୁତ କରାଯାଇଥିବା ଜାଇକୋଭ୍-ଡି ଭାକ୍ସିନ୍କୁ ମଞ୍ଜୁରୀ ମିଳିବାର ଆଶା ରହିଥିବା ନୀତି ଆୟୋଗର ସ୍ବାସ୍ଥ୍ୟ ସଦସ୍ୟ ଡ. ବି.କେ, ପଲ୍ ସୂଚନା ଦେଇଛନ୍ତି। ଏହି ଭାକ୍ସିନ୍ ୬୬.୬୦ ପ୍ରତିଶତ ପ୍ରଭାବଶାଳୀ ବୋଲି କାଡ଼ିଲା ପକ୍ଷରୁ କୁହାଯାଇଛି। ଏହାରି ତିନି-ଡୋଜ ୪ସପ୍ତାହ ଅନ୍ତରରେ ଦିଆଯିବ। ଏହାକୁ ୨ରୁ୮ ଡିଗ୍ରୀ ସେଲସିୟସ ତାପମାତ୍ରା ମଧ୍ୟରେ ରଖାଯିବ। ଏହା ହେଉଛି ପ୍ରଥମ ପ୍ଲାସମିଡ୍ ଡିଏନ୍ଏ ଭାକ୍ସିନ୍। ଏଥିରେ ଇଞ୍ଜେକ୍ସନ ବ୍ୟବହୃତ ହୁଏ ନାହିଁ। ଏହି ଭାକ୍ସିନ୍ ଛୁଞ୍ଚିମୁକ୍ତ। ଏହାକୁ ଜେଟ ଇଞ୍ଜେକ୍ଟର ମାଧ୍ୟମରେ ଦିଆଯିବ। କମ୍ପାନୀ ବାର୍ଷିକ ୧୦ରୁ ୧୨କୋଟି ଡୋଜ ପ୍ରସ୍ତୁତ କରିବାକୁ ଯୋଜନା କରିଛି। ୧୨ ବର୍ଷରୁ ଅଧିକ ପିଲାମାନଙ୍କ ଉପରେ ଜାଇକୋଭ୍-ଡି କରୋନା ଭାକ୍ସିନ୍ ପରୀକ୍ଷା କରାଯାଇଛି। ଏହା ଶୀଘ୍ର ଡିସିଜିଆଇରୁ ଅନୁମତି ପାଇବ ବୋଲି ଆଶା କରାଯାଉଛି। ଜାଇକୋଭ-ଡି ର ତୃତୀୟ ପର୍ଯ୍ୟାୟ ପରୀକ୍ଷା ଶେଷ ହୋଇଛି । ପ୍ରାୟ ୨୮ ହଜାର ଲୋକଙ୍କ ଉପରେ ପରୀକ୍ଷା ଶେଷ କରିବା ପରେ, କମ୍ପାନୀ ଜରୁରୀକାଳୀନ ବ୍ୟବହାର ପାଇଁ ଆବେଦନ କରିଛି। କାଡ଼ିଲା ବ୍ୟତୀତ ଅନ୍ୟ ଅନେକ କମ୍ପାନୀ ମଧ୍ୟ ପିଲାଙ୍କ ଭାକ୍ସିନ୍ ଉପରେ କାମ କରୁଛନ୍ତି। ୨ ରୁ ୧୮ ବର୍ଷ ବୟସର ପିଲାମାନଙ୍କ ଉପରେ ଭାରତ ବାୟୋଟେକର ପରୀକ୍ଷା ପ୍ରାୟ ଶେଷ ହୋଇଛି । କମ୍ପାନୀ ଶୀଘ୍ର ପରୀକ୍ଷା ଶେଷ କରିବା ପରେ ମଧ୍ୟବର୍ତ୍ତୀ ତଥ୍ୟ ସହିତ ଜରୁରୀକାଳୀନ ବ୍ୟବହାର ପାଇଁ ଆବେଦନ କରିବାକୁ ଯୋଜନା ରଖିଛି। ସେହିପରି ନୋଭାଭାକ୍ସ ପିଲାମାନଙ୍କୁ ପରୀକ୍ଷା କରିବାକୁ ଅନୁମତି ପାଇଛି। ଏଥି ସହିତ ବାୟୋ-ଇ ଭାକ୍ସିନ୍ ମଧ୍ୟ ପରୀକ୍ଷା ପାଇଁ ଅନୁମତି ଲୋଡ଼ିିଛି।
