ଛତିଶଗଡ଼ର ଜଶପୁରରେ ସୁନାଖଣି ପାଇବାର ସମ୍ଭାବନା ବଢ଼ିବାରେ ଲାଗିଛି। କାରଣ ଏଠାରେ ଥିବା ଦୁଇଟି ନଦୀ ଅବବାହିକାରେ ସୁନାର କଣିକା ଦେଖିବାକୁ ମିଳିଥିଲା। ଏବେ ଏଠାରେ ସର୍ଭେ କରାଯାଇ ତଥ୍ୟ ସଂଗ୍ରହ କରାଯିବ ବୋଲି ଜଣାପଡ଼ିଛି।
ଜଶପୁରନଗରରେ ଥିବା ଈବ୍ ଏବଂ ସହାୟକ ସୋନାଜୋରୀ ନଦୀର ବାଲିରୁ ସୁନା ବାହାରୁଛି। ବର୍ଷ ବର୍ଷ ଧରି ଝୋରା ଆଦିବାସୀ ସମ୍ପ୍ରଦାୟର ଲୋକେ ଏହି ସୁନାକଣିକା ବାହାର କରିବାର କାମ କରି ଆସୁଛନ୍ତି। ୨୦୧୦ରେ ଏହା ଜାଣିବା ପରେ କେନ୍ଦ୍ର ସରକାର ଏହାକୁ ଗମ୍ଭୀରତାର ସହ ନେଇ ସର୍ଭେ କରିବାକୁ କହିଥିଲେ। ଖଣିଜ ମନ୍ତ୍ରଣାଳୟ ପକ୍ଷରୁ ଦୁଇଟି ଘରୋଇ କମ୍ପାନୀକୁ ଏହାର ଦାୟିତ୍ୱ ଦିଆଯାଇଥିଲା। ୬ ମାସ ଧରି ସର୍ଭେ ଚାଲିଥିଲେ ହେଁ କେତେ ମାତ୍ରାରେ ସୁନା ଉପଲବ୍ଧ ରହିଛି। ଖଣି କେଉଁ ସ୍ଥାନରେ ଅଛି ସେ ନେଇ ବିଶେଷ କିଛି ଜଣାପଡ଼ି ନ ଥିଲା। ପରେ ଏହାକୁ ବନ୍ଦ କରି ଦିଆଯାଇଥିଲା। ଏବେ ପୁଣି ଥରେ ଜିଲାରେ ସୁନାଖଣି ଥିବାକୁ ନେଇ ପ୍ରମାଣ ମିଳିବା ପରେ ସର୍ଭେ ହେବା ଲାଗି ପ୍ରସ୍ତୁତି ଆରମ୍ଭ ହୋଇଛି।
ବର୍ଷା ଦିନ ଆରମ୍ଭ ହେବା ମାତ୍ରେ ଝୋରା ଆଦିବାସୀମାନେ ଅଞ୍ଚଳର ନଦୀରୁ ସୁନା ସଂଗ୍ରହ କରିବା ଆରମ୍ଭ କରନ୍ତି। ବାଲିକୁ ଛାଣି ସୁନାକଣିକା ବାହାର କରନ୍ତି। ହେଲେ ସେମାନଙ୍କଠାରୁ ଦଲାଲମାନେ କମ୍ ଟଙ୍କା ଦେଇ ସୁନା କ୍ରୟ କରିନେଇଥାନ୍ତି। ଏକ ହଜାର ଟଙ୍କାର ସୁନାକୁ ୪୦୦ରୁ ୫୦୦ ଟଙ୍କାରେ ଲୋକମାନେ ବିକ୍ରି କରିଥାନ୍ତି।
