ଭୁବନେଶ୍ୱର,୨୫।୧୧(କ୍ରୀଡ଼ା ପ୍ରତିନିଧି)-
କଳିଙ୍ଗ ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ଓଡ଼ିଶା ହକି ପୁରୁଷ ଜୁନିୟର ବିଶ୍ୱକପର ଗୁରୁବାର ଗୋଲ ବର୍ଷା ହୋଇଛି। ଗୋଟିଏ ଦିନରେ ୭୦ଟି ଗୋଲ ହୋଇଥିବାବେଳେ ଭାରତ ୧୩-୧ ଗୋଲରେ କାନାଡ଼ାକୁ ପରାସ୍ତ କରିଛି। ଭାରତ ପକ୍ଷରୁ ସଞ୍ଜୟ ଓ ଅରିଜିତ ସିଂ ହୁଣ୍ଡାଲ ହ୍ୟାଟ୍ରିକ ଅର୍ଜନ କରିଥିଲେ। ଓଡ଼ିଶାର ଅଭିଷେକ ଲାକ୍ରା ମଧ୍ୟ ଖାତା ଖୋଲିଥିଲେ। ସେହିପରି ଗୋଟିଏ ମ୍ୟାଚରେ ସ୍ପେନ ୧୭-୦ ଗୋଲରେ ବିଜୟୀ ହୋଇ ବିରଳ ରେକର୍ଡର ମଧ୍ୟ ଅଧିକାରୀ ହୋଇଛି।
ଫ୍ରାନ୍ସଠାରୁ ବୁଧବାର ହାରିଥିବା ଭାରତର ଏହା ଚଳିତ ଟୁର୍ନାମେଣ୍ଟରେ ପ୍ରଥମ ବିଜୟ। ଅନ୍ୟପକ୍ଷରେ ୱାଇଲ୍ଡକାର୍ଡ ଯୋଗେ ଏଣ୍ଟ୍ରି କରିଥିବା କାନାଡ଼ା କ୍ରମାଗତ ଦ୍ୱିତୀୟ ପରାଜୟ ସହ କ୍ବାର୍ଟର ଫାଇନାଲ ଦୌଡ଼ରୁ ବାଦ୍ ପଡ଼ିଛି।
ଗୁରୁବାର କଳିଙ୍ଗ ଷ୍ଟାଡିୟମରେ ଗୋଲବର୍ଷା ହୋଇଥିଲା। ୫ଟି ମ୍ୟାଚରେ ମୋଟ ୭୦ଟି ଗୋଲ ହୋଇଥିଲା। ଯାହାକି ଏକ ରେକର୍ଡ। ପ୍ରଥମ ୪ଟି ମ୍ୟାଚରେ ଆର୍ଜେଣ୍ଟିନା ୧୪-୦ ଗୋଲରେ ଇଜିପ୍ଟ, ନେଦରଲାଣ୍ଡ୍ସ ୧୨-୫ ଗୋଲରେ ଦକ୍ଷିଣ କୋରିଆ, ସ୍ପେନ ୧୭-୦ ଗୋଲରେ ଆମେରିକା ଓ ଫ୍ରାନ୍ସ ୭-୧ ଗୋଲରେ ପୋଲାଣ୍ଡକୁ ପରାସ୍ତ କରିଥିଲା।
