କୁଜଙ୍ଗ,୮ା୧ (ଡି.ଏନ୍.ଏ.): ଜଗତ୍ସିଂହପୁର ଜିଲା ଏରସମା ତହସିଲ ଅନ୍ତର୍ଗତ ଢିଙ୍କିଆ ଚାରିଦେଶରେ ପୋଲିସ ଓ ବିରୋଧୀଙ୍କ ମଧ୍ୟରେ ଛକାପଞ୍ଝା ଲାଗି ରହିଛି। ଗତ ୪ ତାରିଖରେ ଢିଙ୍କିଆ ଗାଁରେ ପୋଲିସକୁ ଆକ୍ରମଣ ଘଟଣାରେ ସସ୍ମିତା ଓ ଲକ୍ଷ୍ମୀ ମଲ୍ଲିକଙ୍କୁ ଶୁକ୍ରବାର ପୋଲିସ ଗିରଫ କରିଛି। ଉଭୟ ଅଭିଯୁକ୍ତ ମାରଣାସ୍ତ୍ର ଧରି ଢିଙ୍କିଆ ଜଙ୍ଗଲ ନିକଟ ପାନବରଜ ଅଞ୍ଚଳରେ ବୁଲୁଥିବାବେଳେ ପୋଲିସ ସେମାନଙ୍କୁ କାବୁ କରିଥିଲା। ସେହିପରି ଉକ୍ତ ଗ୍ରାମର ସୁଶୀଲ ସ୍ବାଇଁଙ୍କୁ ଆକ୍ରମଣ ଓ ଲୁଟ୍ ଅଭିଯୋଗରେ ପୋଲିସ ୭ ଜଣଙ୍କୁ ଗିରଫ କରିଛି। ଗୁରୁବାର ରାତିରେ ଆଇଓସିଏଲ୍ରୁ ଡ୍ୟୁଟି ସାରି ଫେରୁଥିବାବେଳେ ଗଁାମୁଣ୍ଡ ରାସ୍ତାରେ ସୁଶୀଲଙ୍କୁ ୯ ଜଣ ଆକ୍ରମଣ କରି ୭ ହଜାର ଟଙ୍କା ଓ ଏକ ସୁନାମୁଦି ଛଡାଇ ନେଇଥିବା ଅଭିଯୋଗ ହୋଇଥିଲା। ପରେ ଅଭିଯୁକ୍ତଙ୍କ ମଧ୍ୟରେ କୌଣସି କାରଣରୁ ଗଣ୍ଡଗୋଳ ହୋଇଥିଲା। ଆହତମାନେ ଚିକିତ୍ସା ନିମନ୍ତେ ପାରାଦୀପର ଅଠରବାଙ୍କିସ୍ଥିତ ବିଜୁ ସ୍ମାରକୀ ଡାକ୍ତରଖାନାକୁ ଯାଇଥିବାବେଳେ ସେଠାରୁ ପୋଲିସ ସେମାନଙ୍କୁ ଗିରଫ କରିଛି ବୋଲି ଅଭୟଚାନ୍ଦପୁର ଥାନା ଅଧିକାରୀ ଜୀବନାନନ୍ଦ ଜେନା କହିଛନ୍ତି। ସେମାନେ ହେଲେ ସୁଜନ ମଲ୍ଲିକ୍, ଶରତ ମଲ୍ଲିକ୍, ଶଙ୍କର ମଲ୍ଲିକ୍, ଶିବ ମଲ୍ଲିକ୍, କୁସୁମ ମଲ୍ଲିକ୍, ପାର୍ବତୀ ମଲ୍ଲିକ୍ ଏବଂ ଝିନି ମଲ୍ଲିକ୍। ସେଠାରୁ ୨ ଜଣ ଖସିଯିବାକୁ ସକ୍ଷମ ହୋଇଛନ୍ତି। ଏହି ଘଟଣାରେ ପୋଲିସ ଫୋର୍ସ ସହ ପାଟଣାପଟୁ ଢିଙ୍କିଆକୁ ପ୍ରବେଶ ପଥରେ ହୋଇଥିବା ଫାଟକ ନିକଟରେ ପହଞ୍ଚତ୍ଥିଲେ। ମାତ୍ର ବିରୋଧୀମାନେ ଗେଟ୍ ନ ଖୋଲିବାରୁ ସନ୍ଧ୍ୟା ପର୍ଯ୍ୟନ୍ତ ପୋଲିସ ଫୋର୍ସ ସହ ଫାଟକ ସମ୍ମୁଖରେ ଜଗି ରହିଥିଲା। ଅପରପକ୍ଷେ ଜେଏସ୍ଡବ୍ଲ୍ୟୁ ପ୍ରକଳ୍ପ ପାଇଁ ଜମି ଅଧିଗ୍ରହଣ ଜାରି ରହିଛି। ଏପର୍ଯ୍ୟନ୍ତ ଢିଙ୍କିଆ ପଞ୍ଚାୟତର ଗୋବିନ୍ଦପୁର, ପାଟଣା, ମାହଳ ଓ ଢିଙ୍କିଆ ଗ୍ରାମର ୨୬୧ ପାନବରଜ ମାପଚୁପ ହୋଇଥିବା ବେଳେ ୧୧୮ଟି ଅଧିଗ୍ରହଣ କରାଯାଇଛି ଏବଂ ଏହାର ମାଲିକମାନଙ୍କ ମଧ୍ୟରୁ ୬୩ ଜଣଙ୍କୁ ୧ କୋଟି ୬୪ ଲକ୍ଷ ଟଙ୍କାରୁ ଊର୍ଦ୍ଧ୍ୱ କ୍ଷତିପୂରଣ ରାଶି ପ୍ରଦାନ କରାଯାଇଥିବା ଏରସମା ତହସିଲଦାର ପ୍ରଜ୍ଞାନନ୍ଦ ଦାସ କହିଛନ୍ତି।
