ଲଣ୍ଡନ,୧।୭(ପି.ଟି.) : କ୍ରୀଡ଼ା କିମ୍ବଦନ୍ତୀ ତଥା ମହିଳା ବକ୍ସିଂରେ ଭାରତର ପ୍ରଥମ ଅଲିମ୍ପିକ ପଦକ ବିଜେତା ଏମ୍.ସି. ମେରୀ କମ୍ ଗ୍ଲୋବାଲ ଇଣ୍ଡିଆନ ଆଇକନ ଅଫ୍ ଦି ଇୟର ପୁରସ୍କାରରେ ସମ୍ମାନିତ ହୋଇଛନ୍ତି। ସାଉଥ-ଇଷ୍ଟର୍ନ ଇଂଲଣ୍ଡର ଓ୍ବିଣ୍ଡସରଠାରେ ଏହି ୟୁନାଇଟେଡ୍ କିଙ୍ଗଡମ୍ (ୟୁକେ)-ଭାରତ ବାର୍ଷିକ ପୁରସ୍କାର ପ୍ରଦାନ କରାଯାଇଛି। ପୂର୍ବତନ ରାଜ୍ୟ ସଭା ସଦସ୍ୟା ମେରୀ କମ୍ ଗୁରୁବାର ରାତିରେ ଆୟୋଜିତ ଏକ ଆଡମ୍ବରପୂର୍ଣ୍ଣ ଉତ୍ସବରେ ୟୁକେରେ ଅବସ୍ଥାପିତ ଭାରତୀୟ ହାଇକମିଶନର ବିକ୍ରମ ଦୋରାଇସ୍ବାମୀଙ୍କଠାରୁ ଏହି ପୁରସ୍କାର ଗ୍ରହଣ କରିଛନ୍ତି। ଏହି ଅବସରରେ ମେରୀ କମ୍ ତାଙ୍କ ୨୦ବର୍ଷର ବକ୍ସିଂ କ୍ୟାରିୟର ସମ୍ପର୍କରେ କହିଥିଲେ। ୟୁକେ-ଇଣ୍ଡିଆ ସପ୍ତାହ ପାଳନର ଅଂଶବିଶେଷ ସ୍ବରୂପ ଇଣ୍ଡିଆ ଗ୍ଲୋବାଲ ଫୋରମ ତରଫରୁ ଏହି ପୁରସ୍କାର ଉତ୍ସବର ଆୟୋଜନ କରାଯାଇଥିଲା। ବିଶିଷ୍ଟ ଚଳଚ୍ଚିତ୍ର ନିର୍ମାତା ଶେଖର କପୁରଙ୍କୁ ଲାଇଫ୍ ଟାଇମ୍ ଆଚିଭମେଣ୍ଟ ପୁରସ୍କାର ପାଇଥିଲେ। ଉଭୟ ଦେଶରେ ଚଳଚ୍ଚିତ୍ର କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ରହିଛି। ‘ଏଲିଜାବେଥ୍: ଦି ଗୋଲ୍ଡେନ ଏଜ୍’ ଓସ୍କାର ପୁରସ୍କାର ପାଇଁ ସୁପାରିସ ହେବା ପଛରେ ତାଙ୍କର ଅବଦାନ ରହିଛି। ଲଣ୍ଡନରେ ଥିବା ଭାରତୀୟ ହାଇକମିଶନର ଏକ ସାଂସ୍କୃତିକ ଶାଖା ନେହେରୁ ସେଣ୍ଟର ୟୁକେ-ଇଣ୍ଡିଆ ପୁରସ୍କାର ଲାଭ କରିଛି। ୟୁକେ-ଭାରତ ଦ୍ୱିପାକ୍ଷିକ ସମ୍ପର୍କକୁ ମଜଭୁତ କରିବା କ୍ଷେତ୍ରରେ ଏହି ସେଣ୍ଟରର ଉଲ୍ଲେଖନୀୟ ଅବଦାନ ରହିଛି। ୟୁକେ-ଇଣ୍ଡିଆ ବାର୍ଷିକ ପୁରସ୍କାର ୫ମ ବର୍ଷ ପଦାର୍ପଣ କରିଛି। ବ୍ୟବସାୟ ବୃତ୍ତିଗତ ସେବା, ସରକାରୀ, ସାଂସ୍କୃତିକ ଓ ସାମାଜିକ ପ୍ରଭାବ ଆଦି କ୍ଷେତ୍ରରେ ଦ୍ୱିପାକ୍ଷିକ ସମ୍ପର୍କକୁ ମଜଭୁତ କରିବା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଏହି ପୁରସ୍କାର ଦିଆଯାଇ ଆସୁଛି।
