ନୂଆଦିଲ୍ଲୀ,୧୮।୮: ନ୍ୟାଶନାଲ ଡିଫେନ୍ସ୍ ଏକାଡେମୀ(ଏନ୍ଡିଏ) ପରୀକ୍ଷା ଛାତ୍ରୀମାନେ ଦେଇପାରିବେ। ଏନେଇ ସୁପ୍ରିମ୍କୋର୍ଟଙ୍କ ପକ୍ଷରୁ ନିର୍ଦ୍ଦେଶ ଜାରି କରାଯାଇଛି। ଏହା ଦ୍ୱାରା ଚଳିତ ବର୍ଷ ସେପ୍ଟେମ୍ବର ୫ରେ ହେବାକୁ ଥିବା ଏନଡିଏ ପରୀକ୍ଷା ବିଜ୍ଞାନ ଛାତ୍ରୀ ମାନେ ଦେଇପାରିବେ। ପରେ ଏନଡିଏରେ ଆଡମିଶନ ସମ୍ପର୍କିତ ନିଷ୍ପତ୍ତି ନିଆଯିବ ବୋଲି କୋର୍ଟ କହିଛନ୍ତି। ନ୍ୟାଶନାଲ ଡିଫେନ୍ସ ଏକାଡେମୀ ପରୀକ୍ଷାରେ ଛାତ୍ରୀମାନଙ୍କୁ ଏପର୍ଯ୍ୟନ୍ତ ବସିବାକୁ ଦିଆଯାଇ ନ ଥିଲା।
ଆଇନଜୀବୀ କୁଶ କାଲରା, ଆବେଦନକାରୀଙ୍କ ପକ୍ଷରୁ କୋର୍ଟଙ୍କୁ କହିଛନ୍ତି ଯେ ସ୍ନାତକୋତ୍ତର ପରେ ହିଁ ମହିଳାମାନଙ୍କୁ ସେନାରେ ଯୋଗଦେବାକୁ ଅନୁମତି ଦିଆଯାଇଛି। ସେମାନଙ୍କ ପାଇଁ ସର୍ବନିମ୍ନ ଯୋଗଦେବା ବୟସ ମଧ୍ୟ ୧୯ରୁ ୨୧ ବର୍ଷ ରଖାଯାଇଛି। ଅପରପକ୍ଷରେ ଛାତ୍ରଙ୍କୁ ଦ୍ୱାଦଶ ପରେ ଏନ୍ଡିଏରେ ଯୋଗଦେବାକୁ ଅନୁମତି ପ୍ରଦାନ କରାଯାଇଛି। ଫଳରେ ଚାକିରୀ କ୍ଷେତ୍ରରେ ଝିଅମାନେ ବିଳମ୍ବରେ ସମାନ ପଦବୀରେ ପହଞ୍ଚିପାରୁଥିବା ଆଇନଜୀବୀ ଦର୍ଶାଇଥିଲେ। ଏହା ସାମ୍ବିଧାନିକ ସମାନତା ଅଧିକାରର ଉଲ୍ଲଂଘନ ବୋଲି ସେ କହିଥିଲେ। ଏହି ପ୍ରସଙ୍ଗରେ ନିଜର ଆଭିମୁଖ୍ୟ ସ୍ପଷ୍ଟ କରିବାକୁ କୋର୍ଟ କେନ୍ଦ୍ର ସରକାରଙ୍କୁ କହିଛନ୍ତି। ଜଷ୍ଟିସ ସଞ୍ଜୟ କିଶନ କୌଲ ଏବଂ ହୃଷିକେଶ ରାୟଙ୍କ ଦ୍ୱାରା ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରିଛନ୍ତି।
ଏହି ଆବେଦନରେ ଉଲ୍ଲେଖ କରାଯାଇଛି ଯେ କେବଳ ପୁଅମାନେ ନ୍ୟାସନାଲ ଡିଫେନ୍ସ ଏକାଡେମୀ ଏବଂ ନାଭାଲ ଏକାଡେମୀରେ ଆଡମିଶନ ପାଆନ୍ତି। ଏହା ଦ୍ୱାରା ସେନାରେ ଯୁବକ ଅଧିକାରୀ ନିଯୁକ୍ତ ହୋଇଥାନ୍ତି। ଏହା କରିବା ଯୋଗ୍ୟ ଝିଇମାନଙ୍କର ମୌଳିକ ଅଧିକାରର ଉଲ୍ଲଂଘନ। ସେମାନେ ସେନାରେ ଯୋଗଦେବାକୁ ଏବଂ ଦେଶ ସେବା କରିବାକୁ ଚାହୁଁଛନ୍ତି।
ମହିଳା ଅଧିକାରୀଙ୍କୁ ସ୍ଥାୟୀ କମିଶନ ପ୍ରଦାନ କରିବାକୁ ସୁପ୍ରିମକୋର୍ଟଙ୍କ ପକ୍ଷରୁ ଗତ ବର୍ଷର ନିଷ୍ପତ୍ତିକୁ ଦୋହରାଯାଇଛି।
