ଶ୍ରୀନଗର,୧୦।୧ : କଂଗ୍ରେସର ବରିଷ୍ଠ ନେତା ଜୟରାମ ରମେଶ ମଙ୍ଗଳବାର ଗୁଲାମ ନବୀ ଆଜାଦଙ୍କ ପାର୍ଟିକୁ ନେଇ କଟାକ୍ଷ କରିଛନ୍ତି। ନିକଟରେ ଆଜାଦଙ୍କ ଦଳର ଅନେକ ନେତା କଂଗ୍ରେସକୁ ଫେରିଛନ୍ତି। ଏହା ପରେ ଜୟରାମ ରମେଶ ସୋସିଆଲ ମିଡିଆରେ ମନ୍ତବ୍ୟ ଦେବାବେଳେ ଆଜାଦର ଡେମୋକ୍ରାଟିକ ଆଜାଦ ପାର୍ଟି (ଡିଏପି) କୁ ଅଦୃଶ୍ୟ ଆଜାଦ ପାର୍ଟି (ଡିସାପିୟରିଂ ଆଜାଦ ପାର୍ଟି) ବୋଲି କହିଛନ୍ତି।
ଭାରତୀୟ ଯୁବ କଂଗ୍ରେସର ମିଡିଆ ସଂଯୋଜକ ଜାହାନଜେବ ସରୱାଲ ଏକ ଟୁଇଟ କରିଛନ୍ତି। ଯେଉଁଥିରେ କହିଥିଲେ ଯେ ଡେମୋକ୍ରାଟିକ ଆଜାଦ ପାର୍ଟିର ଦୁଇଜଣ ପଦାଧୀକାରୀ ଚୌଧୁରୀ ନିଜାମୁଦ୍ଦିନ ଖଟାନା ଏବଂ ଚୌଧୁରୀ ଗୁଲଜାର ଅହମ୍ମଦ ଇସ୍ତଫା ଦେଇଛନ୍ତି।
ଏହି ଟୁଇଟର ଜବାବ ଦେଇ ଜୟରାମ ରମେଶ ଏହାକୁ ଅଦୃଶ୍ୟ ଆଜାଦ ପାର୍ଟି ଲେଖିଛନ୍ତି। କଂଗ୍ରେସ ଛାଡିବା ପରେ ଗୁଲାମ ନବୀ ଆଜାଦ ନିଜର ଦଳ ଗଠନ କରିଥିଲେ, ଯେଉଁଥିରେ ଜମ୍ମୁ-କଶ୍ମୀର କଂଗ୍ରେସର ଅନେକ ନେତା ଯୋଗ ଦେଇଥିଲେ। ତେବେ ଗତ ସପ୍ତାହରେ ଗୁଲାମ ନବୀ ଆଜାଦଙ୍କ ଦଳର ୧୭ ନେତା କଂଗ୍ରେସରେ ଯୋଗ ଦେଇଥିଲେ। ସେମାନଙ୍କ ମଧ୍ୟରେ ପୂର୍ବତନ ଉପମୁଖ୍ୟମନ୍ତ୍ରୀ ତାରା ଚାନ୍ଦ ଏବଂ ପୀରଜାଦା ମହମ୍ମଦ ସୟିଦଙ୍କ ପରି ବଡ ନେତା ଅଛନ୍ତି।
କଂଗ୍ରେସକୁ ଫେରିଥିବା ନେତାମାନେ କହିଛନ୍ତି ଯେ ଗୁଲାମ ନବୀ ଆଜାଦଙ୍କ ଦଳ ରାଜ୍ୟରେ ଧର୍ମନିରପେକ୍ଷ ଭୋଟରେ ଭାଗବଣ୍ଟା କରି ଭାଜପାକୁ ଲାଭ ଦେବ। ଜମ୍ମୁ-କଶ୍ମୀରରେ ଖୁବ ଶୀଘ୍ର ବିଧାନସଭା ନିର୍ବାଚନ ଘୋଷଣା ହୋଇପାରେ। ଏଭଳି ପରିସ୍ଥିତିରେ ଯେଉଁଠାରେ ରାଜ୍ୟର ଅନ୍ୟ ରାଜନୈତିକ ଦଳ ମଧ୍ୟରେ ମେଣ୍ଟ ହେବାର ସମ୍ଭାବନା ରହିଛି। ଗୁଲାମ ନବୀ ଆଜାଦଙ୍କ ଦଳର ସ୍ଥିତି ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଆଜାଦ ଭାଜପାର ନିକଟତର ନହେବାକୁ ଚେଷ୍ଟା କରୁଛନ୍ତି। ଏଭଳି ପରିସ୍ଥିତିରେ ଆଜାଦର ଏହି ଆଭିମୁଖ୍ୟ ଯୋଗୁଁ ଦଳୀୟ କର୍ମୀଙ୍କ ମଧ୍ୟରେ ଦ୍ୱନ୍ଦ୍ୱ ରହିଛି ବୋଲି ଚର୍ଚ୍ଚା ହେଉଛି। ଏପରି ପରିସ୍ଥିତିରେ, ଏହା ମଧ୍ୟ ଏକ କାରଣ ହୋଇପାରେ ଯେ ଡିଏପିରୁ ଲଗାତାର ସଦସ୍ୟମାନେ ଇସ୍ତଫା ଦେଉଛନ୍ତି।
