ଲକ୍ଷ୍ନୌ,୧୨।୨: ଉତ୍ତରପ୍ରଦେଶରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଜଣେ ଯୁବକ ରାଜରାସ୍ତାରେ ବିନା ପୋଷାକରେ ଦୌଡୁଥିବାର ଦେଖାଯାଇଛି। କେବଳ ଏତିକି ନୁହେଁ ସେ ଅନେକ କିଲୋମିଟର ଉଲଗ୍ନ ହୋଇ ପୋଲିସ ଷ୍ଟେଶନରେ ପହଞ୍ଚିଛନ୍ତି।
ରାଜ୍ୟର ଗାଜୀପୁର ଜିଲାର ଜଣେ ଯୁବକ ଠିକ୍ ସମୟରେ ପରୀକ୍ଷା କେନ୍ଦ୍ରରେ ପହଞ୍ଚି ପାରି ନ ଥିଲେ, ଯାହା ଫଳରେ ସେ ରାଗିଯାଇ ରାଜରାସ୍ତାରେ ଉଲଗ୍ନ ହୋଇଥିଲେ। କେବଳ ଏତିକି ନୁହେଁ ଯୁବକ ଜଣଙ୍କ ମଧ୍ୟ କିଛି ତୀକ୍ଷ୍ଣ ବସ୍ତୁରେ ନିଜକୁ ଆଘାତ କରିଥିଲେ। ତାଙ୍କ ହାତରେ ମୋବାଇଲ ଫୋନ, ପାଦରେ ଜୋତା ଏବଂ ଦେହରେ ଗୋଟିଏ ବି ପୋଷାକ ନ ଥିଲା।
ସେ ଉଲଗ୍ନ ଅବସ୍ଥାରେ ପୋଲିସ ଷ୍ଟେସନରେ ପହଞ୍ଚିବା ପରେ ସମସ୍ତେ ତାଙ୍କୁ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ତେବେ ପୋଲିସ ତାଙ୍କୁ ସୈଦପୁର ପୋଲିସ ଷ୍ଟେଶନ ବାହାରେ ଅଟକାଇ ତାଙ୍କୁ ବୁଝାଇବାକୁ ଚେଷ୍ଟା କରିଥିଲା। ଯେଉଁଥିରେ ଯୁବକ ଜଣଙ୍କ ସମାନ ଅବସ୍ଥାରେ ତାଙ୍କ ଘରକୁ ଯାଇଥିଲେ। ଏହି ସମୟରେ ଅନେକ ଲୋକ ତାଙ୍କୁ ମନାଇବା ପାଇଁ ଚେଷ୍ଟା କରିଥିଲେ କିନ୍ତୁ ସେ କିଛି ଶୁଣିବାକୁ ପ୍ରସ୍ତୁତ ନ ଥିଲେ ।
ସୂଚନାନୁସାରେ, ଗାଜିପୁର ଖାନପୁର ଥାନା ଅଞ୍ଚଳରେ ଗୋପାଳପୁର ଗ୍ରାମର ବାସିନ୍ଦା ସୁରଜ ଯାଦବ ରବିବାର ସକାଳେ ଏକ ଘରୋଇ ବସ୍ ଯୋଗେ ସମୀକ୍ଷା ଅଧିକାରୀ (ଆରଓ ପରୀକ୍ଷା) ପରୀକ୍ଷା ଦେବା ପାଇଁ ଯାଉଥିଲେ। ବସ୍ ଅଧାବାଟରେ ଅଟକିବା ପରେ ସୁରଜ ଶୌଚ ପାଇଁ ଓହ୍ଲାଇ ଥିଲେ। ଶୌଚ ହୋଇ ଫେରିବା ପରେ ତାଙ୍କ ବସ୍ ଚାଲି ଯାଇଥିବା ସେ ଜାଣିବାକୁ ପାଇଥିଲେ। ଉକ୍ତ ବସ୍ରେ ତାଙ୍କର ପରୀକ୍ଷା ଆଡମିଟ କାର୍ଡ ରହି ଯାଇଥିଲା। ଏସବୁ ଘଟଣା ପରେ ସୁରଜ ଠିକ୍ ସମୟରେ ପରୀକ୍ଷା କେନ୍ଦ୍ରରେ ପହଞ୍ଚି ପାରି ନ ଥିବାରୁ ରାଗରେ ବିବସ୍ତ୍ର ହୋଇ ରାସ୍ତାରେ ଦୌଡିଥିଲେ।
