ସମ୍ବଲପୁର,୨୩ା୨(ବ୍ୟୁରୋ): ସମ୍ବଲପୁର ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଚତୁର୍ଥ ପର୍ଯ୍ୟାୟ ମତଦାନ ମଙ୍ଗଳବାର ଶେଷ ହୋଇଛି। ଏହି ନିର୍ବାଚନ ଧନକଉଡ଼ା ବ୍ଲକ କୁଦଗୁଣ୍ଡେରପୁରବାସୀଙ୍କ ପାଇଁ ନିଆରା ଅନୁଭୂତି ଆଣିଦେଇଛି। ସ୍ବାଧୀନତାର ୭୫ବର୍ଷ ପରେ ନିର୍ବାଚନ ସମୟରେ ମହାନଦୀରେ ଡଙ୍ଗା ବ୍ୟବହାର ହୋଇନାହିଁ। ପୋଲ ନିର୍ମାଣ ହୋଇଥିବାରୁ ନଦୀ ଆରପାରି ଭୋଟକେନ୍ଦ୍ରକୁ ପୋଲିଂ ପାର୍ଟି, ପୋଲିସ, ପରିଚାଳନା ଅଧିକାରୀ ଓ ଭୋଟରମାନେ ଗାଡ଼ି ବ୍ୟବହାର କରି ଯାଇ ପାରିଥିଲେ। ପ୍ରଥମଥର ଏଭଳି ହୋଇଥିବାରୁ ଭୋଟର ଓ ଅଧିକାରୀ ବେଶ୍ ଖୁସି ଥିବା ପ୍ରକାଶ କରିଛନ୍ତି। ଭୋଟରଙ୍କ କହିବା କଥା ମହାନଦୀ ଯୋଗୁ କୁଦଗୁଣ୍ଡେରପୁର ପଞ୍ଚାୟତ ବାହ୍ୟଜଗତରୁ ବିଚ୍ଛିନ୍ନ ହୋଇ ରହୁଥିଲା। ଯେକୌଣସି କାମରେ ସହରକୁ ଗଲେ ଡଙ୍ଗାରେ ପାରି ହେବାକୁ ପଡୁଥିଲା। ନିର୍ବାଚନ ସମୟରେ ଅଧିକାରୀ ଓ ପୋଲିସ ଆସିବାକୁ ଭୟ କରୁଥିଲେ। ଏପରି କି ସହରରେ ରହୁଥିବା ଭୋଟରମାନେ ମଧ୍ୟ ଭୟରେ ମତଦାନ କରିବାକୁ ଆସୁ ନ ଥିଲେ। ପୋଲ ନିର୍ମାଣ ହେବା ଫଳରେ ଗମନାଗମନ ସୁବିଧା ହୋଇଛି। ଧନକଉଡ଼ା ବିଡିଓ ବସନ୍ତ ହାତୀ କହିଛନ୍ତି, ସହରଠାରୁ ପ୍ରାୟ ୩୫ କି.ମି. ଦୂରରେ ରହିଛି କୁଦଗୁଣ୍ଡେରପୁର ପଞ୍ଚାୟତ। ପୂର୍ବରୁ ନିର୍ବାଚନ ସମୟରେ ମହାନଦୀ ପାର ହେବା ପାଇଁ ପ୍ରଶାସନ ପକ୍ଷରୁ ଡଙ୍ଗା ବ୍ୟବସ୍ଥା କରାଯାଉଥିଲା। ହେଲେ ପୋଲ ନିର୍ମାଣ ହୋଇଯାଇଥିବାରୁ ସୁବିଧାରେ ପୋଲିଂ ପାର୍ଟି ପହଞ୍ଚତ୍ ପାରିଥିଲେ।
