ଫିଜିଓଥେରାପି ସେଣ୍ଟରରେ ଚାଲିଥିଲା ଲିଙ୍ଗ ନିରୂପଣ
9:25 amSeptember 14, 2023September 14, 2023 / 08

କଟକ,୧୪ା୯ (କାର୍ତ୍ତିକ ସାହୁ)କଟକ ସହରରେ ମାଳ ମାଳ କ୍ଲିନିକ୍‌ ଓ ଡାଇଗ୍ନୋଷ୍ଟିକ୍‌ ସେଣ୍ଟର ଖୋଲିଛି। ସେଠାରେ ବେଆଇନ ଭାବେ ଲିଙ୍ଗ ନିରୂପଣ କରାଯାଉଛି। ହେଲେ ପ୍ରମାଣ ଅଭାବରୁ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରୁ ନ ଥିଲା। ଖବରପାଇ ବୁଧବାର ରାଜ୍ୟ ସ୍ବାସ୍ଥ୍ୟ ବିଭାଗର ଏକ ଟିମ୍‌ କଟକ ଅରୁଣୋଦୟ ନଗର ଅଞ୍ଚଳର ଏକ ନର୍ସିଂହୋମ୍‌, ବାଦାମବାଡ଼ି ରକ୍ସିଲେନ୍‌ ଅଞ୍ଚଳର ଏକ ଫିଜିଓଥେରାପି ସେଣ୍ଟର ଓ ଏକ ଭଡ଼ାଘରେ ଚଢ଼ାଉ କରିଥିଲା। ଏଥିରେ ଜିଲା ପ୍ରଶାସନର ଅଧିକାରୀ ଓ ଡ୍ରଗ୍ସ ନିୟନ୍ତ୍ରକ ସାମିଲ ହୋଇଥିଲେ। ଚଢ଼ାଉବେଳେ ଦୁଇଟି ଅଲଟ୍ରାସାଉଣ୍ଡ୍‌ ମେଶିନ ଏବଂ କିଛି ଗର୍ଭପାତ ଔଷଧ ଜବତ କରାଯାଇଛି। ଏଭଳି ଘଟଣାର ମୁଖ୍ୟ ଅଭିଯୁକ୍ତ ଫେରାର ହୋଇଯାଇଛନ୍ତି।
ମିଳିଥିବା ସୂଚନା ଅନୁଯାୟୀ, ରକ୍ସିଲେନ୍‌ ଅଞ୍ଚଳର ଏକ ଫିଜିଓଥେରାପି ସେଣ୍ଟରରେ ବେଆଇନ ଲିଙ୍ଗ ନିରୂପଣ କରାଯାଉଥିବା ଖବର ମିଳିବା ପରେ ସ୍ବାସ୍ଥ୍ୟ ବିଭାଗର ଏକ ଟିମ୍‌ ପ୍ରଥମେ ସେଠାରେ ଚଢ଼ାଉ କରିଥିଲା। ଏଠାରେ ଫିଜିଓ ଥେରାପି ନାମରେ ଅଭିଯୁକ୍ତ ଜଣଙ୍କ ଲିଙ୍ଗ ନିରୂପଣ କରୁଥିବା ଜଣାପଡିଥିଲା। ସେଠାରୁ ଏକ ପୋର୍ଟେବୁଲ ଅଲଟ୍ରାସାଉଣ୍ଡ ମେଶିନ ଓ ଗର୍ଭପାତ ନିମନ୍ତେ ବ୍ୟବହୃତ ଔଷଧ ଜବତ ହୋଇଥିଲା। ଏହାପରେ ନିକଟରେ ଥିବା ଅଭିଯୁକ୍ତଙ୍କ ଭଡ଼ାଘରେ ଚଢ଼ାଉ କରାଯାଇଥିଲା। ସେଠାରୁ କେତେକ ଗର୍ଭପାତ ଔଷଧ ଏବଂ ଇଞ୍ଜେକଶନ ମିଳିଥିଲା। ଏହାପରେ ୧୨ ଜଣିଆ ଟିମ୍‌ ଅରୁଣୋଦୟ ନଗର ଅଞ୍ଚଳରେ ଥିବା ନର୍ସିଂହୋମ୍‌ରେ ଚଢ଼ାଉ କରି ଏକ ଅଲଟ୍ରାସାଉଣ୍ଡ ମେଶିନ ଜବତ କରିଥିଲା। ଅନ୍ୟପକ୍ଷରେ ନର୍ସିଂହୋମ୍‌ର ମାଲିକ ଏଭଳି ଘଟଣା ସଂକ୍ରାନ୍ତରେ କିଛି ଜାଣିନାହାନ୍ତି ବୋଲି କହିଛନ୍ତି। ୨ ମାସ ପୂର୍ବରୁ ସମ୍ପୃକ୍ତ ଅଭିଯୁକ୍ତଙ୍କୁ ସେ ଏହାର ମାଲିକାନା ପ୍ରଦାନ କରିଛନ୍ତି ବୋଲି ପ୍ରକାଶ କରିଥିଲେ। ଅପରପକ୍ଷରେ ଚଢ଼ାଉ ଜାରି ରହିଛି ବୋଲି ଡେପୁଟି କଲେକ୍ଟର ଅଳକାରାଣୀ ଦେବତା ସୂଚନା ଦେଇଛନ୍ତି।