ଗାଜା ସିଟି, ୧୬।୫: ଗାଜା ସିଟିର ଦୁଇଟି ସ୍ଥାନରେ ଶନିବାର ଇସ୍ରାଏଲ୍ ବିମାନ ଆକ୍ରମଣ କରିଛି। ଏଥିରେ ଏକ ସୁଉଚ୍ଚ ଟାଓ୍ବାର ଧ୍ୱଂସ ହୋଇଯାଇଛି। ଉକ୍ତ ୧୨ ମହଲା ଅଟ୍ଟାଳିକାରେ ଆସୋସିଏଟେଡ୍ ପ୍ରେସ୍ ଏବଂ ଅଲ୍ ଜଜିରାର କାର୍ଯ୍ୟାଳୟ ସମେତ ଅନ୍ୟ ଅଫିସ୍ ଏବଂ ରେସିଡେନ୍ସିଆଲ ଆପାର୍ଟମେଣ୍ଟ ରହିଥିଲା। ଟାଓ୍ବାରଟି ସମ୍ପୂର୍ଣ୍ଣ ଧୂଳିସାତ୍ ହୋଇଯାଇଛି। ତେବେ ଆକ୍ରମଣ ପୂର୍ବରୁ ଇସ୍ରାଏଲ୍ ସୈନ୍ୟବାହିନୀ ଏ ସମ୍ପର୍କରେ ଆଗୁଆ ସୂଚନା ଦେଇଥିବାରୁ ଟାଓ୍ବାରରୁ ଗଣମାଧ୍ୟମର ସମସ୍ତ କର୍ମଚାରୀ ଓ ଅନ୍ୟମାନଙ୍କୁ ବାହାର କରିଦିଆଯାଇଥିଲା। ସେହିପରି ଘନ ଜନବସତି ଥିବା ଶରଣାର୍ଥୀ ଶିବିର ଉପରେ ହୋଇଥିବା ବିମାନ ଆକ୍ରମଣରେ ୧୦ ପାଲେଷ୍ଟିନୀୟ ନିହତ ହୋଇଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ଶିଶୁ। କିଛିଦିନ ହେଲା ହମାସ୍ ଆତଙ୍କବାଦୀ ସଂଗଠନ ଓ ଇସ୍ରାଏଲ୍ ମଧ୍ୟରେ ସଂଘର୍ଷ ଲାଗି ରହିଛି। ଜେରୁଜେଲମ୍ରେ ଏହି ହିଂସା ଆରମ୍ଭ ହୋଇ ଅନ୍ୟ ଅଞ୍ଚଳକୁ ବ୍ୟାପିବାରେ ଲାଗିଛି। ଗତ ସୋମବାର ରାତିରୁ ହମାସ ଇସ୍ରାଏଲ୍ ଉପରେ ଶତାଧିକ ରକେଟ ମାଡ଼ କରିବା ପରେ ଇସ୍ରାଏଲ୍ ଜବାବୀ ଆକ୍ରମଣ କରିଥିଲା। ଏହି ଆକ୍ରମଣରେ ଗାଜାରେ ବର୍ତ୍ତମାନ ସୁଦ୍ଧା ଅନୂ୍ୟନ ୧୩୯ ଜଣଙ୍କ ମୃତ୍ୟୁ ହେଲାଣି। ସେମାନଙ୍କ ମଧ୍ୟରେ ୩୯ ଶିଶୁ ଓ ୨୨ ମହିଳା ରହିଛନ୍ତି। ସେହିପରି ଇସ୍ରାଏଲ୍ରେ ବର୍ତ୍ତମାନ ସୁଦ୍ଧା ୮ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି।
