ଭଞ୍ଜନଗର, ୨୦ା୫(ଡି.ଏନ.୍ଏ):: ଭଞ୍ଜନଗର ସହରରେ ବର୍ତ୍ତମାନ ଠାକୁରାଣୀ ଯାତ୍ରା ଚାଲିଥିବା ଯୋଗୁଁ ସହର ଚଳଚଞ୍ଚଳ ହୋଇପଡିଛି। ଯାତ୍ରା ଦେଖିବାକୁ ଗ୍ରାମାଞ୍ଚଳରୁ ଦୈନନ୍ଦିନ ହଜାର ହଜାର ଲୋକ ଭଞ୍ଜନଗର ସହର ଅଭିମୁଖେ ଆସୁଛନ୍ତି। କିନ୍ତୁ ସହରର ଦୁଇଟି ମୁଖ୍ୟ ପ୍ରବେଶ ପଥ ରାସ୍ତା କଡରେ କୁଢ଼ କୁଢ଼ ଅଳିଆ ପଡିରହିଛି, ଯାହାକୁ ନେଇ ଲୋକେ ଅସନ୍ତୋଷ ବ୍ୟକ୍ତ କରିଛନ୍ତି। ଭଞ୍ଜନଗର ବ୍ରହ୍ମପୁର ମୁଖ୍ୟ ସଡକର ବାଉଁଶଲୁଣ୍ଡି ପୁରୁଣା ସିନେମା ହଲ ସମ୍ମୁଖରେ ଟ୍ରକ ଟ୍ରକ ଅଳିଆ ପଡିରହିଛି। ଉକ୍ତ ଅଞ୍ଚଳଟି ପଞ୍ଚାୟତ ଅଧୀନରେ ଆସୁଥିବା ଯୋଗୁଁ ସଫେଇ ହେବାରେ ସମସ୍ୟା ରହୁଛି। ପଞ୍ଚାୟତଗୁଡିକରେ ସଫେଇ କର୍ମଚାରୀ ବ୍ୟବସ୍ଥା ନାହିଁ। ତେଣୁ କିଛି ବିକଳ୍ପ ବ୍ୟବସ୍ଥା କରି ସଫେଇ କରାଯିବା ଆବଶ୍ୟକତା ରହିଛି। ପୂର୍ବରୁ ବାଉଁଶଲୁଣ୍ଡି ପୋଖରୀ ନିକଟରେ ଅଳିଆ ଗଦାହୋଇ ରହୁଥିଲା। ପଞ୍ଚାୟତ କର୍ତ୍ତୃପକ୍ଷ ସେଠାରେ କିଛି ଉନ୍ନତି କାର୍ଯ୍ୟ କରିବା ପରେ ସେଠାରେ ଆଉ ଅଳିଆ ପଡୁନାହିଁ। କିନ୍ତୁ ବିଗତ କିଛିମାସ ହେବ ସିନେମା ହଲ ନିକଟରେ ଅଳିଆ ଗଦାହୋଇ ରହୁଛି। ସହରକୁ ଲାଗି ବାଉଁଶଲୁଣ୍ଡି ଗ୍ରାମ ରହୁଛି। ବାଉଁଶଲୁଣ୍ଡି ମୁଖ୍ୟ ସଡ଼କ ଅଞ୍ଚଳଟି ସମ୍ପୂର୍ଣ୍ଣ ବ୍ୟବସାୟ ଅଞ୍ଚଳ। ତେଣୁ ବିଗତ ଦିନରେ ଅଞ୍ଚଳବାସୀ ଅଳିଆ ସଫା ବ୍ୟବସ୍ଥା କରିବା ପାଇଁ ଜିଲା ପ୍ରଶାସନ ନିକଟରେ ବାରମ୍ବାର ଦାବି କରିଥିଲେ। ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ତାହାର ସଫେଇ କରାଯିବ ବୋଲି ଜିଲା ପ୍ରଶାସନ ପକ୍ଷରୁ ଯୋଜନା ହୋଇଥିଲା। କିନ୍ତୁ ତାହା ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରୁନାହିଁ। ସେହିଭଳି ଫୁଲବାଣୀ ଆଡୁ ଭଞ୍ଜନଗର ଆସିବା ସମୟରେ ଭଞ୍ଜନଗର ସହର ୱାର୍ଡ ନଂ ୧୪ର ଶ୍ରୀରାମ ନଗର ଜାତୀୟ ରାଜପଥ କଡ ଜଙ୍ଗଲରେ ସହରର ସମସ୍ତ ଅଳିଆ ନେଇ ପକାଯାଉଛି। ରାସ୍ତାକୁ ଲାଗି ଅଳିଆ ପଡୁଥିବା ଯୋଗୁଁ ଲୋକେ ଉକ୍ତ ରାସ୍ତାରେ ଯାତାୟାତ କରିବା ସମୟରେ ଗନ୍ଧକୁ ନେଇ ଅସନ୍ତୋଷ ବ୍ୟକ୍ତ କରୁଛନ୍ତି। ତେଣୁ ବ୍ଲକ ଏବଂ ଏନଏସି ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବା ପାଇଁ ଦାବି ହୋଇଛି।
