ଭୁବନେଶ୍ୱର,୫।୫(ବ୍ୟୁରୋ): ରାଜଧାନୀ ଭୁବନେଶ୍ବରର ପରିମଳ ବ୍ୟବସ୍ଥା ସୁଧାରିବାକୁ ଭୁବନେଶ୍ବର ମହାନଗର ନିଗମ (ବିଏମସି) ପକ୍ଷରୁ ବ୍ୟାପକ ଯୋଜନା କରାଯାଉଛି। ତେବେ ବିଭିନ୍ନ କାରଣରୁ ବିଏମ୍ସିକୁ ସମାଲୋଚନାର ଶିକାର ହେବାକୁ ପଡ଼ୁଛି। ବିଏମ୍ସି ଦକ୍ଷିଣ ପଶ୍ଚିମ ଜୋନ୍ର ଏକାଧିକ ଓ୍ବାର୍ଡକୁ ସଫେଇ ଗାଡ଼ି ଯାଉ ନ ଥିବାରୁ ରାସ୍ତାଘାଟ ଗଳିକନ୍ଦିରେ ଅଳିଆ ପଡି ରହୁଛି। ସମାନ ପରିସ୍ଥିତି ଉତ୍ତର ଜୋନ୍ ଅଧୀନ ୱାର୍ଡ ନଂ.୫ରେ ଦେଖିବାକୁ ମିଳୁଛି। ଗତ ୫ଦିନ ଧରି ଏହି ୱାର୍ଡରୁ ଅଳିଆ ଉଠିନାହିଁ। ଫଳରେ ଏବେ ୱାର୍ଡର ରାସ୍ତାଘାଟରେ ବର୍ଜ୍ୟବସ୍ତୁ ଗଦାହେବାରେ ଲାଗିଛି। ଅଞ୍ଚଳବାସୀ କହିଛନ୍ତି, ଅଳିଆ ଉଠାଇବାକୁ ସଫେଇ ଗାଡ଼ି ଓ ସଫେଇ କର୍ମଚାରୀ ଆସୁ ନ ଥିବାରୁ ଲୋକମାନେ ଏବେ ରାସ୍ତା ଉପରେ ବର୍ଜ୍ୟ ଫିଙ୍ଗିବା ଆରମ୍ଭ କରିଛନ୍ତି। ସହର ପରିମଳ ବ୍ୟବସ୍ଥାରେ ସାମାନ୍ୟ ଖିଲାପ କଲେ ଖିଲାପକାରୀଙ୍କଠାରୁ ବିଏମ୍ସି ଜରିମାନା ଆଦାୟ କରୁଛି। ମାତ୍ର ନିଜର ଭିତ୍ତିଭୂମି ସୁଧାରିବାରେ ବିଏମ୍ସି ଚରମ ଅବହେଳା କରୁଥିବା କହି ଓ୍ବାର୍ଡବାସୀ ଅସନ୍ତୋଷ ପ୍ରକାଶ କରିଛନ୍ତି। ଏନେଇ ସ୍ଥାନୀୟ କର୍ପୋରେଟର ମିନୁଶ୍ରୀ ଖୁଣ୍ଟିଆ କହିଛନ୍ତି, ପୂର୍ବରୁ ବର୍ଜ୍ୟ ପରିଚାଳନାରେ ନିୟୋଜିତ ସଂସ୍ଥା ବଦଳିଛି। ତେଣୁ କିଛି ସମସ୍ୟା ଦେଖାଦେଇଛି। ଖୁବ୍ଶୀଘ୍ର ନିୟମିତ ଅଳିଆ ଉଠିବ। ନୂଆ କରି ଦାୟିତ୍ୱ ନେଇଥିବା ସଫେଇ ସଂସ୍ଥାର କର୍ମଚାରୀମାନେ ଓ୍ବାର୍ଡର ରାସ୍ତାଘାଟ ବିଶେଷ ପରିଚିତ ନୁହନ୍ତି। ତେଣୁ ଦିନେ ଦୁଇଦିନ ଅଳିଆ ଉଠିନାହିଁ। ସେହିପରି ସଫେଇ ଗାଡ଼ି ମରାମତି ପାଇଁ ଦିଆଯିବା ସହ ନୂଆ ସଫେଇ ଗାଡ଼ି ମଧ୍ୟ ଅଣାଯାଇଛି। ବ୍ୟବସ୍ଥିତ ଢଙ୍ଗରେ ପୁଣି ଥରେ ସଫେଇ କାର୍ଯ୍ୟ ଆରମ୍ଭ ହେବ ବୋଲି ସେ କହିଛନ୍ତି।
ସୂଚନା ଥାଉକି, ବିଏମ୍ସିର ୬୭ଟି ୱାର୍ଡରେ ବର୍ଜ୍ୟ ସଂଗ୍ରହ ପାଇଁ ପର୍ଯ୍ୟାପ୍ତ ସଫେଇ ଗାଡ଼ି ନ ଥିବାବେଳେ ଆବଶ୍ୟକ ବର୍ଜ୍ୟ ପରିଚାଳନା କେନ୍ଦ୍ର ମଧ୍ୟ ନାହିଁ। ସହରରୁ ଦିନକୁ ପ୍ରାୟ ୮୦୪ ମେଟ୍ରିକ ଟନ୍ ବର୍ଜ୍ୟ ବାହାରୁଥିବାବେଳେ ୩୫ ଏମ୍ସିସି ଓ ୧୮ ଏମଆର୍ଏଫରେ ଏତେ ପରିମାଣର ବର୍ଜ୍ୟ କିପରି ପ୍ରକ୍ରିୟାକରଣ ହେବ ବୋଲି ଜନସାଧାରଣ ପ୍ରଶ୍ନ କରିଛନ୍ତି। ଅନ୍ୟପଟେ ଏକାଧିକ ସ୍ଥାନରେ ଅଞ୍ଚଳବାସୀ ଏମସିସି ନିର୍ମାଣକୁ ମଧ୍ୟ ବିରୋଧ କରୁଥିବାରୁ ସେସବୁ ପ୍ରକଳ୍ପ ଆଗେଇ ପାରୁନାହିଁ।
