ଅନୁଗୋଳ ଅଫିସ, ୩୦ା୧: ଦକ୍ଷିଣ ଭାରତୀୟ ବ୍ଲକବଷ୍ଟର ସିନେମା ପୁଷ୍କାର କ୍ରେଜ୍ ଦିନକୁ ଦିନ ବଢ଼ିବାରେ ଲାଗିଛି। ଏହି ବହୁଭାଷୀ ଫିଲ୍ମ ଏବଂ ଏହାର ପୋଷ୍ଟର ଏବେ ସଚେତନତାର ବାର୍ତ୍ତା ବାହକ ସାଜିଛି। ନିକଟରେ ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କୁ ସତର୍କ କରାଇବାକୁ ଏହାକୁ ବ୍ୟବହାର କରାଯାଇଥିଲା, ଯାହା ସୋସିଆଲ ମଡିଆରେ ଭାଇରାଲ ହୋଇଥିଲା। ଶନିବାର ଅନୁଗୋଳ ପୌର ପରିଷଦ କର୍ତ୍ତୃପକ୍ଷ ଅଳିଆ ପରିଚାଳନା ଲାଗି ଜନସଚେତନତା ସୃଷ୍ଟି ଉଦ୍ଦେଶ୍ୟରେ ‘ପୁଷ୍କା’ର ପୋଷ୍ଟର ବ୍ୟବହାର କରାଯାଇଛି। ଏହି ପୋଷ୍ଟରରେ ସିନେମାର ମୁଖ୍ୟ ନାୟକ ତଥା ସୁପରଷ୍ଟାର ଅଲ୍ଲୁ ଅର୍ଜୁନଙ୍କ ଡାଇଲଗ୍କୁ ଅବତାରଣା କରାଯାଇଛି। ‘ସେ ପୁଷ୍କା ହେଉ କି ପୁଷ୍କାରାଜ’ ଓଦା ଓ ଶୁଖିଲା ଅଳିଆକୁ ପୃଥକ୍ କରି ସ୍ବଚ୍ଛ ସବାରି ଗାଡ଼ିରେ ପ୍ରଦାନ ନ କଲେ ସମସ୍ତଙ୍କଠାରୁ ଜରିମାନା ଆଦାୟ କରାଯିବ। ଆସନ୍ତୁ ସମସ୍ତେ ଏକ୍ ହେବା। ଆମ ଘର ଚାରିପାଖ, ସାହି, ବଜାର, ହାଟ, ରାସ୍ତା ଆଦିକୁ ପରିଷ୍କାର ରଖିବା ଓ ନୀରୋଗ ରହିବା ବୋଲି ଏଥିରେ ଉଲ୍ଲେଖ ରହିଛି। ପୌରାଞ୍ଚଳବାସୀଙ୍କ ମଧ୍ୟରେ ଅଳିଆ ପରିଚାଳନା ଲାଗି ସଚେତନତା ସୃଷ୍ଟି କରିବା ଲାଗି ଏଭଳି ପଦକ୍ଷେପ ନିଆଯାଇଥିବା ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ ସୂଚନା ଦେଇଛନ୍ତି।
