ଛତ୍ରପୁର,୯।୭ (ଦିଲ୍ଲୀପ ସାମଲ): ଜନସାଧାରଣଙ୍କ ସୁରକ୍ଷା ନିଶ୍ଚିତ କରିବା ଏବଂ ବିସ୍ଫୋରକ ପଦାର୍ଥର ବେଆଇନ ମହଜୁଦ, ପରିବହନ ଓ ଦୁରୁପଯୋଗକୁ ରୋକିବା ଲକ୍ଷ୍ୟରେ ଗଞ୍ଜାମ ପୋଲିସ ପକ୍ଷରୁ ଏକ ବଡ଼ ଧରଣର ଜିଲାବ୍ୟାପୀ ସ୍ୱତନ୍ତ୍ର ଅଭିଯାନ ଚାଲିଥିଲା। ଗତ ଜୁଲାଇ ୧ ତାରିଖରୁ ୭ ତାରିଖ ପର୍ଯ୍ୟନ୍ତ ଜିଲାର ସମସ୍ତ ଥାନା ଅଞ୍ଚଳରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ଏହି ସପ୍ତାହବ୍ୟାପୀ ଚାଲିଥିବା ସ୍ୱତନ୍ତ୍ର ଅଭିଯାନରେ ପୋଲିସ ମୋଟ ୧୮ ଅପରାଧିକ ମାମଲା ରୁଜୁ କରିବା ସହ ୨୪ ଅଭିଯୁକ୍ତଙ୍କୁ ଗିରଫ କରିଛି। ଗଞ୍ଜାମ ଆରକ୍ଷୀ ଅଧିକ୍ଷକ (SP) ହରିଶ ବି. ସି. ଏହି ସଫଳ ଅଭିଯାନ ସମ୍ପର୍କରେ ବିସ୍ତୃତ ସୂଚନା ଦେଇଛନ୍ତି।
ଏହି ଚଢ଼ାଉ ସମୟରେ ପୋଲିସ ବିପୁଳ ପରିମାଣର ବେଆଇନ ବିସ୍ଫୋରକ ସାମଗ୍ରୀ ଓ ବାଣ ଜବତ କରିଛି। ଜବତ ସାମଗ୍ରୀ ମଧ୍ୟରେ ୧୪,୦୦୦ରୁ ଅଧିକ ଜେଲାଟିନ ଷ୍ଟିକ୍, ୩୪୦ରୁ ଅଧିକ ଡିଟୋନେଟର ଏବଂ ୧,୧୦୦ କିଲୋରୁ ଅଧିକ ଆମୋନିୟମ ନାଇଟ୍ରେଟ ରହିଛି। ଏହା ବ୍ୟତୀତ ବ୍ଲାଷ୍ଟିଂ ତାର, ବିସ୍ଫୋରକ କର୍ଡ, ବାରୁଦ, ଗନ୍ଧକ, ସୋଡିୟମ ନାଇଟ୍ରେଟ, ମେଟାଲ ପାଉଡର, ଅପରାଧରେ ବ୍ୟବହୃତ ଗାଡ଼ି, ଖନନ ଉପକରଣ ଏବଂ ପ୍ରଚୁର ପରିମାଣର ବାଣ ମଧ୍ୟ ପୋଲିସ ହାତରେ ଲାଗିଛି।
ଏହି ସ୍ୱତନ୍ତ୍ର ଅଭିଯାନରେ ବିଭିନ୍ନ ଥାନାକୁ ବଡ଼ ସଫଳତା ମିଳିଛି। ବେଲଗାଁ ଥାନା ପୋଲିସ ସବୁଠାରୁ ଅଧିକ ୧୨,୪୦୦ ଜେଲାଟିନ ଷ୍ଟିକ୍ ଏବଂ ୪୭ କୋଇଲ୍ ବ୍ଲାଷ୍ଟିଂ ତାର ଜବତ କରିଥିବା ବେଳେ କେ.ଏସ୍. ନଗର ଥାନା ପୋଲିସ ୨,୦୦୦ ଜେଲାଟିନ ଷ୍ଟିକ୍, ୫୦ ଡିଟୋନେଟର ଏବଂ ୫୦ କେଜି ଆମୋନିୟମ ନାଇଟ୍ରେଟ ଜବତ କରିଛି। ସେହିପରି ପୋଲସରା ଥାନା ପୋଲିସ ୧,୦୦୦ କେଜି ଆମୋନିୟମ ନାଇଟ୍ରେଟ ଏବଂ ଛତ୍ରପୁର ଥାନା ପୋଲିସ ମଧ୍ୟ ବିପୁଳ ପରିମାଣର ଜେଲାଟିନ ଷ୍ଟିକ୍, ଡିଟୋନେଟର ଓ ବ୍ଲାଷ୍ଟିଂ ସାମଗ୍ରୀ ଜବତ କରିବାରେ ସଫଳ ହୋଇଛି। ଏହାସହ ଅନ୍ୟାନ୍ୟ ଅନେକ ଥାନା ଅଞ୍ଚଳରେ ନିୟମ ଉଲ୍ଲଂଘନ କରି ବାଣର ବେଆଇନ ମହଜୁଦ ଏବଂ ବିକ୍ରୟ ସମ୍ବନ୍ଧୀୟ ମାମଲା ଚିହ୍ନଟ କରାଯାଇଛି।
ବିସ୍ଫୋରକର ବେଆଇନ ଉତ୍ପାଦନ, ମହଜୁଦ, ପରିବହନ କିମ୍ବା ବିକ୍ରୟରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଆଗକୁ ମଧ୍ୟ କଠୋର ଆଇନଗତ କାର୍ଯ୍ୟାନୁଷ୍ଠାନ ଜାରି ରହିବ ବୋଲି ଏସ୍.ପି. ଚେତାବନୀ ଦେଇଛନ୍ତି। ଶାନ୍ତି ବଜାୟ ରଖିବା ପାଇଁ ସେ ଜନସାଧାରଣଙ୍କ ସହଯୋଗ ଲୋଡ଼ିଛନ୍ତି। ଯଦି କୌଣସି ସ୍ଥାନରେ ବିସ୍ଫୋରକ ସାମଗ୍ରୀର ସନ୍ଦିଗ୍ଧ କାରବାର ନଜରକୁ ଆସେ, ତେବେ ତୁରନ୍ତ ନିକଟସ୍ଥ ଥାନାକୁ ଜଣାଇବାକୁ କିମ୍ବା ଜରୁରୀକାଳୀନ ହେଲ୍ପଲାଇନ ନମ୍ବର ୧୧୨ ରେ ସମ୍ପର୍କ କରିବାକୁ ଗଞ୍ଜାମ ପୋଲିସ ପକ୍ଷରୁ ନିବେଦନ କରାଯାଇଛି।