ନୂଆଦିଲ୍ଲୀ,୧୦।୯(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ପ୍ରସ୍ତୁତି ନେଇ ସମୀକ୍ଷା କରିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ଦୁବାଇରେ ପହଞ୍ଚିଛନ୍ତି। ସେପ୍ଟେମ୍ବର ୧୯ ତାରିଖରୁ ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ଆଇପିଏଲ୍ ଆରମ୍ଭ ହେବାକୁ ଯାଉଛି। ଫଳରେ ଗାଙ୍ଗୁଲି ଆଇପିଏଲ୍ ପ୍ରସ୍ତୁତି ଓ ସ୍ଥିତିର ନେଇ ସମୀକ୍ଷା କରିବାରକୁ ଦୁବାଇ ଯାତ୍ରା କରିଛନ୍ତି।
ଦୀର୍ଘ ୬ ମାସ ପରେ ପ୍ରଥମଥର ପାଇଁ ବିମାନ ଯାତ୍ରା କରିଛି ବୋଲି ଗାଙ୍ଗୁଲି କହିଛନ୍ତି। ଭାରତରେ କୋଭିଡ୍-୧୯ ସ୍ଥିତି ବେଶ୍ ଉଦ୍ବେଗଜନକ ଥିବାରୁ ଆଇପିଏଲ୍କୁ ଏଥର ୟୁଏଇକୁ ସ୍ଥାନାନ୍ତର କରାଯାଇଛି। ଆଇପିଏଲ୍ ଆୟୋଜନ ନ ହୋଇଥିଲେ ବିସିସିଆଇ ୪,୦୦୦ କୋଟିଙ୍କାର କ୍ଷତି ସହିଥାନ୍ତା। ଆଇପିଏଲ୍ ସାଧାରଣତଃ ଏପ୍ରିଲ- ମେ’ରେ ଆୟୋଜନ ହୋଇଥାଏ। ପୂର୍ବରୁ ଆଇପିଏଲ୍ ଅଧ୍ୟକ୍ଷ ବ୍ରିଜେଶ ପଟେଲ ଦୁବାଇରେ ଅଛନ୍ତି। ନିୟମ କଡ଼ାକଡ଼ି ପାଳନ କରାଯାଉଥିଲେ ମଧ୍ୟ କେତେଜଣ କୋଭିଡ୍-୧୯ ଟେଷ୍ଟରେ ପଜିଟିଭ ବୋଲି ଜଣାପଡିଛି। ଚେନ୍ନାଇ ସୁପର କିଙ୍ଗ୍ସ ଫ୍ରାଞ୍ଚାଇଜ୍ରେ ୨ଜଣ ଖେଳାଳିଙ୍କ ସମେତ ୧୩ଜଣ ସସସ୍ୟ ଟେଷ୍ଟରେ ପଜିଟିଭ ବୋଲି ଜଣାପଡିଥିଲା। ପ୍ରଶଂସକଙ୍କୁ ଷ୍ଟାଡିୟମ ଭିତରୁ ପ୍ରବେଶ ପାଇଁ ଅନୁମତି ଦିଆଯିବ ନାହିଁ। ତେବେ ପରେ କୋଭିଡ୍-୧୯ ସ୍ଥିତି ସମୀକ୍ଷା କରାଯାଇ କିଛି ପ୍ରଶଂସକଙ୍କୁ ଅନୁମତି ଦିଆଯାଇପାରେ। ଦୁବାଇ, ଶାରଜା ଓ ଅବୁଧାବିରେ ଆଇପିଏଲ୍ ମ୍ୟାଚ୍ ଖେଳାଯିବ।
