ନୂଆଦିଲ୍ଲୀ,୮।୭(ପି.ଟି.): ପୂର୍ବତନ ଅଧିନାୟକ ତଥା ଭାରତୀୟ କ୍ରିକେଟ କେଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ବୁଧବାର ୪୮ ବର୍ଷରେ ପଦାର୍ପଣ କରିଛନ୍ତି। ଜନ୍ମ ଦିନରେ ଗାଙ୍ଗୁଲିଙ୍କୁ ଶୁଭେଚ୍ଛା ତଥା ଅଭିନନ୍ଦନର ଶୁଅ ଛୁଟିଛି। ବ୍ୟାଟିଂ ଲିଜେଣ୍ଡ ସଚିନ ତେନ୍ଦୁଲକର ଏହି ଅବସରରେ ତାଙ୍କୁ ଶୁଭେଚ୍ଛା ଜଣାଇଛନ୍ତି। ପଡିଆ ଭିତରେ ଯେପରି ଆମର ବନ୍ଧୁତ୍ୱ ରହିଥିଲା ପଡିଆ ବାହାରେ ମଧ୍ୟ ତାହା ଅତୁଟ ରହୁ ଓ ଆଗାମୀ ବର୍ଷ ମଙ୍ଗଳମୟ ହେଉ ବୋଲି ସଚିନ ଟୁଇଟ୍ କରି ଉଲ୍ଲେଖ କରିଛନ୍ତି। ସେହିପରି ପୂର୍ବତନ ବ୍ୟାଟ୍ସମ୍ୟାନ ଭି.ଭି.ଏସ୍. ଲକ୍ଷ୍ମଣ ଶୁଭେଚ୍ଛା ଜଣାଇଛନ୍ତି। ଆଗକୁ ଆପଣ ଆହୁରି ସଫଳତା ଓ ଭଲପାଇବା ହାସଲ କରନ୍ତୁ ବୋଲି ସେ ଟୁଇଟ୍ କରିଛନ୍ତି। ଜଣେ ଉଚ୍ଚକୋଟୀର ବ୍ୟାଟ୍ସମ୍ୟାନରୁ ଜଣେ ଦକ୍ଷ ଅଧିନାୟକ ଓ ଏବେ ଭାରତୀୟ କ୍ରିକେଟ ପ୍ରଶାସନର ମୁଖ୍ୟ ଦାୟିତ୍ୱ ନେଇ ଗାଙ୍ଗୁଲି ନିଜ ଅସାଧାଣର ଦକ୍ଷତାର ପରିଚୟ ଦେଇଛନ୍ତି ବୋଲି ମହମ୍ମଦ କୈଫ ଟୁଇଟ୍ କରିଛନ୍ତି। ମୋ ପ୍ରିୟ ଅଧିନାୟକ ଓ ମେଣ୍ଟରଙ୍କୁ ଅଭିନନ୍ଦନ ଜଣାଉଛି ବୋଲି ସେ ଉଲ୍ଲେଖ କରିଛନ୍ତି। ସେହିପରି ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନ୍ ଗାଙ୍ଗୁଲିଙ୍କୁ ଶୁଭେଚ୍ଚା ଜଣାଇ ଟୁଇଟ୍ କରିଛନ୍ତି। ଆଗାମୀ ବର୍ଷ ଦାଦାଙ୍କ ପାଇଁ ମଙ୍ଗଳମୟ ହେଉ ବୋଲି ସେ ଉଲ୍ଲେଖ କରିଛନ୍ତି।
ଗାଙ୍ଗୁଲି ତାଙ୍କ କ୍ୟାରିୟରରେ ୧୧୩ଟି ଟେଷ୍ଟ ଓ ୩୧୧ଟି ଦିନିକିଆ ମ୍ୟାଚ୍ ଖେଳିଛନ୍ତି। ସବୁ ଫର୍ମାଟ୍ରେ ସେ ମୋଟ୍ ଉପରେ ୧୮, ୫୭୫ ରନ ସଂଗ୍ରହ କରିଛନ୍ତି। ସବୁ ଫର୍ମାଟ୍ରେ ଗାଙ୍ଗୁଲି ଭାରତ ପାଇଁ ୧୯୫ଟି ମ୍ୟାଚ୍ର ନେତୃତ୍ୱ ନେଇଥିଲେ। ଏଥିମଧ୍ୟରୁ ସେ ୯୭ଟି ମ୍ୟାଚ୍ରେ ଭାରତ ବିଜୟ ହାସଲ କରିଥିଲା। ଅବସର ପରେ କ୍ରିକେଟ ଆସୋସିଏଶନ ଅଫ୍ ବେଙ୍ଗଲ୍ (ସିଏବି)ର ସଭାପତି ଦାୟିତ୍ୱରେ ରହିବା ପରେ ଏବେ ବିସିସିଆଇର ସଭାପତି ରୂପେ କାର୍ଯ୍ୟରତ ଅଛନ୍ତି।
