ନୂଆଦିଲ୍ଲୀ,୧୧।୯: ଭାରତୀୟ କ୍ରିକେଟ ଟିମ୍ର ପୂର୍ବତନ ଅଧିନାୟକ ତଥା ବର୍ତ୍ତମାନ ବିସିସିଆଇର ଅଧ୍ୟକ୍ଷ ଥିବା ସୌରଭ ଗାଙ୍ଗୁଲୀଙ୍କ ପ୍ରେମଜୀବନ କୌଣସି ଫିଲ୍ମକାହାଣୀଠାରୁ କମ୍ ନ ଥିଲା। ସେ ପରିବାରଲୋକଙ୍କୁ ନ ଜଣାଇ ଡୋନା ରାୟଙ୍କୁ ବିବାହ କରିଥିଲେ। ଫଳରେ ତାଙ୍କୁ ଗୋଟିଏ ଥର ନୁହେଁ ବରଂ ଦୁଇ ଥର ବିବାହ କରିବାକୁ ପଡ଼ିଥିଲା।
ଗାଙ୍ଗୁଲୀ ଏବଂ ଡୋନା ପଡୋଶୀ ଥିଲେ। ପିଲାଟିବେଳୁ ଉଭୟ ଉଭୟଙ୍କ ବନ୍ଧୁ ଥିଲେ। ଧିରେ ଧିରେ ଏହା ପ୍ରେମରେ ପରିବର୍ତ୍ତିତ ହୋଇଥିଲା। ହେଲେ ଉଭୟଙ୍କ ପରିବାର ମଧ୍ୟରେ ବିବାଦର ସୂତ୍ରପାତ ହୋଇଥିଲା। ଏହାର ପ୍ରଭାବ ଉଭୟଙ୍କ ପ୍ରେମ ଉପରେ ପଡ଼ିଥିଲା। ସେମାନେ ବାଧ୍ୟହୋଇ ଲୁଚିଛପି ମିଳାମିଶା କରୁଥିଲେ। ହେଲେ କେହି କାହାଠାରୁ ଅଲଗା ହୋଇ ନ ଥିଲେ।
ଗାଙ୍ଗୁଲୀ ସେଣ୍ଟ ଜାଭିୟର ସ୍କୁଲରେ ପଢ଼ୁଥିବା ବେଳେ ଡୋନା ଲୋରେଟୋ କନ୍ଭେଣ୍ଟ ସ୍କୁଲର ଛାତ୍ରୀ ଥିଲେ। ସ୍କୁଲ ଯିବା ବାହାନାରେ ଗାଙ୍ଗୁଲୀଙ୍କୁ ଭେଟୁଥିଲେ ଡୋନା। ଏପରିକି ଡୋନାଙ୍କ ନୃତ୍ୟ ଗାଙ୍ଗୁଲୀଙ୍କୁ ବେଶ୍ ପସନ୍ଦ ଥିଲା। ସେ ତାକୁ ଦେଖିବାକୁ ପହଞ୍ଚି ଯାଉଥିଲେ। ଡୋନା ମଧ୍ୟ ଅନୁରୂପ ଭାବେ ଗାଙ୍ଗୁଲୀଙ୍କ ମ୍ୟାଚ୍ ଦେଖିବାକୁ ଷ୍ଟାଡିୟମକୁ ଯାଉଥିଲେ। ହେଲେ ଗାଙ୍ଗୁଲୀଙ୍କ ପରିବାରକୁ ତାହା ପସନ୍ଦ ନଥିଲେ। ସେମାନଙ୍କ ବିବାହ କରିବା ସପକ୍ଷରେ ମଧ୍ୟ କେହି ନ ଥିଲେ।
୧୯୯୬ରେ ଇଲଂଣ୍ଡ ଗସ୍ତକୁ ନେଇ ଗାଙ୍ଗୁଲୀଙ୍କ ଚୟନ ଭାରତୀୟ କ୍ରିକେଟ ଟିମ୍ରେ ହୋଇଥିଲା। ସେ ନିଜର ଡେବ୍ୟୁ ମ୍ୟାଚ୍ରେ ଶତକ କରି ସମସ୍ତଙ୍କୁ ଚମକାଇ ଦେଇଥିଲେ। ସେଠାରୁ ଫେରିବା ପରେ ଗାଙ୍ଗୁଲୀ ଡୋନାଙ୍କ ବିଷୟରେ ବନ୍ଧୁ ମୌଲୀ ବାନାର୍ଜୀଙ୍କୁ କହିଥିଲେ। ମୌଲୀଙ୍କ ସହ ବିବାହ ପାଇଁ ଉଭୟ କୋର୍ଟରେ ପହଞ୍ଚିଥିଲେ। ହେଲେ ମିଡିଆ ଥିବା ଯୋଗୁ ଘରକୁ ଫେରି ଆସିଥିଲେ। ପରେ ମ୍ୟାରେଜ୍ ରେଜିଷ୍ଟାରଙ୍କୁ ମୌଲୀ ଘରକୁ ଡାକିଥିଲେ। ସେଠାରେ ଉଭୟ ବିବାହ କରିଥିଲେ।
ପ୍ରଥମେ ବିବାହ କରିବା ସମୟରେ ଗାଙ୍ଗୁଲୀଙ୍କୁ ୨୩ ବର୍ଷ ହୋଇଥିଲା। ସେତେବେଳେ ଡୋନା ୨୦ ବର୍ଷର ଥିଲେ। ପରେ ଏହି କଥା ଘରଲୋକେ ଜାଣିବାକୁ ପାଇଥିଲେ। ଶ୍ରୀଲଙ୍କାରୁ ଫେରିବା ପରେ ଗାଙ୍ଗୁଲୀ ନିଜ ଜିଦ୍ରେ ଅଟଳ ରହିବା ଯୋଗୁ ପରିବାରଲୋକେ ପୁଣି ଥରେ ସେମାନଙ୍କ ବିବାହ କରାଇଥିଲେ। ୧୯୯୭ ଫେବୃୟାରୀ ୨୧ରେ ଉଭୟ ପରିବାରଲୋକଙ୍କ ସାମ୍ନାରେ ସମସ୍ତ ରୀତିନୀତିରେ ବିବାହ କରିଥିଲେ।
