ରିଷିଡ଼ା,୯ା୯(ସୁଶାନ୍ତ ମଲ୍ଲିକ): ଗଣେଶ ପୂଜା ଉପଲକ୍ଷେ କଳାହାଣ୍ଡି ଜିଲା ଉତ୍ସବ ମୁଖର ହୋଇଉଠିଛି। ବିଶେଷକରି କର୍ଲାମୁଣ୍ତା ବ୍ଲକ ରିଷିଡ଼ା ଅଞ୍ଚଳର ମୂର୍ତ୍ତି କାରିଗରମାନେ ମାଟି ମୂର୍ତ୍ତି ନିର୍ମାଣରେ ବ୍ୟସ୍ତ ଅଛନ୍ତି। କାରିଗରମାନେ ମୂର୍ତ୍ତି ଗଢିବା ପାଇଁ ନଡ଼ା ଉପରେ ମାଟି ପ୍ରଲେପ ଦେଇଛନ୍ତି। ରିଷିଡ଼ାର ବରିଷ୍ଠ ତଥା ଅଭିଜ୍ଞ କାରିଗର ସଂଜୟ ରଣା ସହଯୋଗୀ, ବଳଦେବ ରଣା ଶରତ ରଣା, କର୍ଲାମୁଣ୍ତାରୁ ତିରନ ଭୋଇ, ଡୁକେରମାଲରୁ ରିଣ୍ଟୁ ସାହୁ, କର୍ଲାମୁଣ୍ତା ଦୁର୍ଗା ମଣ୍ଡପରେ ୧୧ ଫୁଟର ବଡ଼ ଗଣେଶ ମୂର୍ତ୍ତି ତିଆରି କରି ବର୍ତ୍ତମାନ ଅଞ୍ଚଳରେ ଚର୍ଚ୍ଚାରେ ଥିବାବେଳେ ପଲସାପଡ଼ାରୁ ହେମାନନ୍ଦ ସାହୁ ଓ ଯୋରାଡ଼ବରାରୁ ସୁଶାନ୍ତ ପୁଟେଲ ପ୍ରମୁଖ ନିଜ ନିଜର ମୂର୍ତ୍ତି ନିର୍ମାଣ କାର୍ଯ୍ୟ ଜୋରସୋରରେ ଜାରି ରଖିଛନ୍ତି। ରିଷିଡ଼ା ଓ ଆଖପାଖ ଅଞ୍ଚଳରେ ସେମାନଙ୍କ ହାତ ଗଢ଼ା ମୂର୍ତ୍ତିର ବେଶ ଚାହିଦା ରହିଛି। ଗଢ଼ାଯାଇଥିବା ମୂର୍ତ୍ତି ମଦନପୁର,ଏମ୍ରାମପୁର ଡାହିମାଳ, ରିଞ୍ଜା ସାପଲହରା ରେଗେଡ଼ା ତେରେସିହା ପୌରକେଲା, ଗଜବାହାଲ, ରାଜପୁର ସମେତ ସରକାରୀ ବେସରକାରୀ ବିଦ୍ୟାଳୟ ତଥା ଆଖପାଖ ଜିଲାର ବିଭିନ୍ନ ଅଞ୍ଚଳକୁ ବିକ୍ରି ଲାଗି ପଠାଯାଇଥାଏ। ଚଳିତବର୍ଷ ଗଣେଶ ପୂଜା ଧୂମଧାମ୍ରେ ପାଳିତ ହେବ ବୋଲି ଆଶା କରାଯାଉଛି।
