ଢେଙ୍କାନାଳ ଅଫିସ, ୨୦ା୮-ଲଗାଣ ବର୍ଷାରେ ଢେଙ୍କାନାଳ ଜିଲା ଗଁଦିଆ ବ୍ଲକ ଲେଥକା ପଞ୍ଚାୟତର କୁଆଁରିଆ ଛକଠାରୁ ଟୋଲକଲୁଣ୍ଡି ଦେଇ ଧର୍ମଶାଳା ବ୍ଲକ ତୁରଙ୍ଗ ଗ୍ରାମକୁ ସଂଯୋଗ କରୁଥିବା ପିଚୁ ରାସ୍ତା ସମ୍ପୂର୍ଣ୍ଣ ଧୋଇଯାଇଛି। ଫଳରେ ଗଁଦିଆ ଏବଂ ଯାଜପୁର ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇପଡ଼ିଛି। ପାଖାପାଖି ୧ବର୍ଷ ହେଲା ଉକ୍ତ ରାସ୍ତା ପୂର୍ତ୍ତ ବିଭାଗକୁ ହସ୍ତାନ୍ତର ହୋଇଛି। ଗ୍ରାମବାସୀଙ୍କ ଦାବି ସତ୍ତ୍ୱେ ଏହାର ମରାମତି କରାଯାଉ ନ ଥିବା ସମିତିସଭ୍ୟ ଟଙ୍କଧର ବାରିକ ଅଭିଯୋଗ କରିଛନ୍ତି। ସେହିପରି ନିହଲପ୍ରସାଦ ପଞ୍ଚାୟତ-ଲାଉଲଇ ପୂର୍ତ୍ତ ବିଭାଗ ରାସ୍ତାର ବୈଦ୍ୟକାଟେଣୀ ପୋଲରେ ବର୍ଷାପାଣି ଆସି କଂକ୍ରିଟ ବାଡ଼ ଭାଙ୍ଗି ଯାଇଥିବା ସମିତିସଭ୍ୟ ସୂଚନା ଦେଇଛନ୍ତି। ଅପରପକ୍ଷେ ବର୍ଷା ପ୍ରଭାବରେ ଢେଙ୍କାନାଳ ସହରରେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଛି। ଏଥିରେ ଟାଉନ ପ୍ଲାନିଂ, ଗାୟତ୍ରୀ ନଗର, କାରିଗର ସାହି, କାଞ୍ଚନ ବଜାର କୁମ୍ଭାରସାହି ଅଞ୍ଚଳବାସୀ ପ୍ରଭାବିତ ହୋଇଛନ୍ତି।
