ପାଟଣା,୧୪ ।୮(ସ୍ବ. ପ୍ର.): ଏକାଧିକ ଯୁଦ୍ଧ ଅପରେଶନରେ ସାମିଲ ଥିବା ଭାରତୀୟ ବାୟୁସେନାର ଏକ ସେବାନିବୃତ୍ତ ବିମାନ ମିଗ୍-୨୩ ୟୁବିକୁ କେନ୍ଦୁଝର ଜିଲା ସାହାରପଡ଼ା ବ୍ଲକ ଉଦୟପୁର ପଞ୍ଚାୟତର ଗଦଗଦିଠାରେ ସ୍ଥାୟୀ ଭାବେ ପ୍ରଦର୍ଶନ କରାଯିବ। ଇଞ୍ଜିନବିହୀନ ଉକ୍ତ ବିମାନକୁ ଅତି ନିକଟରୁ ଦେଖିପାରିବେ ପର୍ଯ୍ୟଟକ। ଶୁକ୍ରବାର ୩ଟି ଟ୍ରେଲରରେ ବିମାନର ବିଭିନ୍ନ ଅଂଶ ଗଦଗଦିରେ ପହଞ୍ଚତ୍ଥିବାବେଳେ ଶନିବାରଠାରୁ ଏହାର ଫିଟିଂ କାମ ଆରମ୍ଭ ହୋଇଛି। ଦେଶ ସ୍ବାଧୀନତାର ୭୫ବର୍ଷ ପୂର୍ତ୍ତି ଉପଲକ୍ଷେ ବିବିଧ କାର୍ଯ୍ୟକ୍ରମ ହାତକୁ ନିଆଯାଇଥିବାବେଳେ ଯୁଦ୍ଧରେ ସାମିଲ ହୋଇଥିବା ଉକ୍ତ ବିମାନ ଅଞ୍ଚଳର ଶୋଭାବର୍ଦ୍ଧନ କରିବ ବୋଲି ଜଣାପଡ଼ିବା ପରେ ଅଞ୍ଚଳବାସୀଙ୍କ ମନରେ ବିପୁଳ ଉତ୍କଣ୍ଠା ସୃଷ୍ଟି ହୋଇଛି।
ସେବାନିବୃତ୍ତ ପରେ ଭାରତୀୟ ବାୟୁସେନାର ରାଜସ୍ଥାନ ଯୋଧପୁରସ୍ଥିତ ଏୟାରବେସ୍ରେ ରହିଥିଲା ଉକ୍ତ ବିମାନ। ୧୭ ମିଟର ଲମ୍ବା, ୧୪ ମିଟର ଚଉଡ଼ା ବିଶିଷ୍ଟ ଏହି ବିମାନ ୧୯୮୦ଠାରୁ ବାୟୁସେନାରେ ସେବା ଯୋଗାଇ ଆସୁଥିଲା। ୧୯୯୯ କାର୍ଗିଲ ଯୁଦ୍ଧ, ବାଲାକୋଟ୍ ସର୍ଜିକାଲ ଷ୍ଟ୍ରାଇକ୍, ୨୦୦୪ର ଅପରେଶନ ‘ପରାକ୍ରମ’ରେ ସାମିଲ ହୋଇ ଭାରତୀୟ ସେନାର ଗୌରବ ବଢ଼ାଇଥିଲା। ସମୟ ଅବଧି ଶେଷ ହେବା ପରେ ୨୦୨୦ରେ ଏହାକୁ ବାୟୁସେନାରୁ ସେବାନିବୃତ୍ତ କରାଯାଇଥିଲା। ଏଭଳି ଏକ ବିମାନକୁ ଅଞ୍ଚଳରେ ସ୍ଥାପନ କରିବା ଲାଗି ପଞ୍ଚାୟତ ପ୍ରଶାସନ ପକ୍ଷରୁ ଉଦ୍ୟମ ଆରମ୍ଭ କରାଯାଇଥିଲା। ସ୍ଥାନୀୟ କେତେଜଣ ଅବସରପ୍ରାପ୍ତ ସେନା ଅଧିକାରୀ ଏଥିଲାଗି ଆବଶ୍ୟକ ସହଯୋଗ ଯୋଗାଇ ଦେଇଥିଲେ। ସରକାରୀ ଅନୁମତି ପରେ ଏହା ଗଦଗଦିରେ ପହଞ୍ଚତ୍ଛି।
ବାୟୁସେନାର ୨ ପାଇଲଟ୍ ସହ ୬ କର୍ମଚାରୀ ଶନିବାରଠାରୁ ଏହାର ଫିଟିଂ କାମ ଆରମ୍ଭ କରିଛନ୍ତି। ଏହାପରେ ବିମାନକୁ ରଙ୍ଗ କରାଯିବ। ଏସବୁ କାର୍ଯ୍ୟ ପାଇଁ ୨୦ଦିନ ଲାଗିବ ବୋଲି ବାୟୁସେନାର ଅଧିକାରୀ କମଲ ସିଂ କହିଛନ୍ତି। ଜିଲାରେ ପ୍ରଥମ ଥର ପାଇଁ ଏକ ସେବାନିବୃତ୍ତ ଯୁଦ୍ଧ ବିମାନ ସ୍ଥାପନ କରାଯାଉଛି। ଏହି ବିମାନକୁ ଦେଖି ଅଞ୍ଚଳବାସୀ ଉତ୍ସାହିତ ହୋଇପଡ଼ିଛନ୍ତି। ଏନେଇ ଗ୍ରାମ ମନ୍ଦିର ନିକଟ ପଡ଼ିଆରେ ଲୋକଙ୍କ ଭିଡ଼ ଜମୁଛି।
