ଲଣ୍ଡନ/ଦୋହା, ୧୨।୬ : କେବଳ ଧାର୍ମିକ ତିକ୍ତତା ବଢ଼ାଇବା ପାଇଁ ନୁହେଁ, ବରଂ ଆତଙ୍କବାଦକୁ ସାରା ବିଶ୍ୱରେ ବିସ୍ତାର କରିବା ପାଇଁ କାତାରର ବିଭିନ୍ନ ସଂଗଠନ ପକ୍ଷରୁ ଫଣ୍ଡିଂ ଯୋଗାଇ ଦିଆଯାଉଛି। ଏକ ପଲିସି ରିସର୍ଚ୍ଚ ଗ୍ରୁପ୍ ଦ୍ୱାରା ପ୍ରସ୍ତୁତ ହୋଇଥିବା ରିପୋର୍ଟ ଏହା ଉଲ୍ଲେଖ କରାଯାଇଛି। ଭାରତ ପରି ବହୁ-ଧାର୍ମିକ ଦେଶରେ ଲୋକଙ୍କ ମଧ୍ୟରେ ପାରସ୍ପରିକ ମତଭେଦକୁ ବଢ଼ାଇବା ପାଇଁ କାତାର ଭିତ୍ତିକ ସଂଗଠନ ପକ୍ଷରୁ ବିଭିନ୍ନ ମାଧ୍ୟମରେ ଅର୍ଥ ପ୍ରଦାନ କରାଯାଉଛି।
ବିଶ୍ୱ ଆତଙ୍କବାଦକୁ ପ୍ରୋତ୍ସାହିତ କରିବା ପାଇଁ ମସଜିଦ, ମଦ୍ରାସା ନିର୍ମାଣ ତଥା ଅନେକ ଦେଶରେ ମୁସଲମାନମାନଙ୍କୁ ଶିକ୍ଷା ତଥା ରୋଜଗାରର ସମାନ ସୁଯୋଗ ପ୍ରଦାନ କଥା କହି ଫଣ୍ଡିଂ ଯୋଗାଇ ଦିଆଯାଉଛି। ଏହି ରିପୋର୍ଟରେ ଲଣ୍ଡନର ଜେମ୍ସ ଡଗଲାସ କ୍ରିକଟନ କହିଛନ୍ତି ଯେ ‘ଶେଖ ଇଦ ବିନ ମହମ୍ମଦ ଅଲ ଥାନି’ ସଂଗଠନ ଭାରତ ସମେତ ସମଗ୍ର ବିଶ୍ୱରେ ଆତଙ୍କବାଦ ବୃଦ୍ଧି ପାଇଁ କାର୍ଯ୍ୟ କରୁଛି।
ଦାତବ୍ୟ ଅନୁଷ୍ଠାନ ଭାବରେ ଜଣାଶୁଣା ଏହି ସଂଗଠନର ପ୍ରତିଷ୍ଠାତା ସଦସ୍ୟ ଅବଦ ଅଲ-ରହମାନ ଅଲ-ନୁଅୟମିଙ୍କୁ ୨୦୧୩ ରେ ଆମେରିକାର ବିଶ୍ୱ ଆତଙ୍କବାଦୀ ଭାବେ ଘୋଷଣା କରାଯାଇଥିଲା। ସେ ସିରିଆ, ୟେମେନ, ଇରାକ ଏବଂ ସୋମାଲିଆରେ ଅଲ କାଏଦା ଏବଂ ଅନ୍ୟ ସହଯୋଗୀ ଆତଙ୍କବାଦୀ ଗୋଷ୍ଠୀଙ୍କୁ ଆର୍ଥିକ ସହାୟତା ଦେଇଥିବା ଅଭିଯୋଗ ହୋଇଥିଲା। ରିପୋର୍ଟରେ ଦର୍ଶାଯାଇଛି ଯେ କାତାରରୁ ସିଧାସଳଖ ବିପୁଳ ଅର୍ଥ ଗ୍ରହଣ କରୁଥିବା ସଂଗଠନ ଅଲ କାଏଦା, ଇସଲାମିକ ଷ୍ଟେଟ ଭଳି ଆତଙ୍କବାଦୀ ଗୋଷ୍ଠୀ ସହ ଜଡିତ ଛୋଟ ସଂଗଠନକୁ ସାହାଯ୍ୟ କରିଥାଏ। ଏହି ଟଙ୍କା ବିଭିନ୍ନ କମ୍ପାନୀଗୁଡିକର ନାମରେ ପଠାଯାଇଥାଏ।
‘ଶେଖ ଇଦ ବିନ ମହମ୍ମଦ ଅଲ ଥାନି’ ଦାତବ୍ୟ ଅନୁଷ୍ଠାନର ଲିକ ଡକ୍ୟୁମେଣ୍ଟରୁ ଜଣାପଡିଛି ଯେ କେରଳ ସମେତ ଭାରତର ଆଠଟି ସଲାଫି ସଂଗଠନ ସ୍ଥାପନ, ମସଜିଦ ମରାମତି ଏବଂ ୱାଟର ପମ୍ପ ଲଗାଇବା ବାହାନାରେ କାତାରରୁ ବିପୁଳ ପରିମାଣର ଟଙ୍କା ଯୋଗାଇ ଦିଆଯାଇଛି।
