ବିନିକା,୫।୩: ସରିଥିଲା ବିବାହ, ଯିବାକୁ ଥିଲା ଶାଶୁଘର। ହେଲେ ନବବଧୂ ବର ସହିତ ସଜ୍ଜିତ ଗାଡ଼ିରେ ଯିବା ବଦଳରେ କୋକେଇରେ ଯାଇଥିଲେ ମଶାଣି ଭୂଇଁ । ଏଭଳି ଏକ ଦୁଃଖଦ ଘଟଣା ଘଟିଛି ସୁବର୍ଣ୍ଣପୁର ଜିଲା ବିନିକା ବ୍ଲକ ଜୁଲୁଣ୍ଡା ଗ୍ରାମରେ
ମେନକା ସାହୁଙ୍କ ଏକମାତ୍ର ଝିଅ ଗୁପ୍ତେଶ୍ବରୀ ଓରଫ ରୋଜିଙ୍କ ବିବାହ ବଲାଙ୍ଗୀର ଜିଲା ତେନ୍ତୁଳିଗାଁର ରାଧେଶ୍ୟାମ ପଧାନଙ୍କ ଏକମାତ୍ର ପୁତ୍ର ବିଶିକେଶନଙ୍କ ସହିତ ଗୁରୁବାର ସ୍ଥିର ହୋଇଥିଲା। ବନ୍ଧୁବାନ୍ଧବ ସମସ୍ତେ ଆସିଥିଲେ। ଘର ହସଖୁସିରେ ପୂରି ଉଠିଥିଲା। ରାତିରେ ବରଯାତ୍ରୀ ଆସି କନ୍ୟା ଘରେ ପହଞ୍ଚିଥିଲେ। ରୀତିନୀତିରେ ହାତଗଣ୍ଠି ପଡ଼ି ବିବାହ କାର୍ଯ୍ୟ ସମ୍ପନ୍ନ ହୋଇଥିଲା। ଶୁକ୍ରବାର ପ୍ରତ୍ୟୁଷରେ ଝିଅ ବିଦାୟ ଦେବା ବେଳେ ପରିବାର ଲୋକେ କାନ୍ଦିଥିଲେ। ଏହି ସମୟରେ ବାପଘର ଲୋକଙ୍କୁ ଛାଡ଼ି ଯାଉଥିବାରୁ ରୋଜି ମଧ୍ୟ କାନ୍ଦିଥିଲେ। ସେ କାନ୍ଦିକାନ୍ଦି ଚେତାଶୁନ୍ୟ ହୋଇପଡିଥିଲେ। ତାଙ୍କୁ ତୁରନ୍ତ ଡ଼ୁଙ୍ଗୁରିପାଲି ଡାକ୍ତରଖାନା ନିଆଯାଇଥିଲା। ହେଲେ ଡାକ୍ତର ରୋଜିଙ୍କୁ ହୃଦ୍ଘାତରେ ମୃତ୍ୟୁ ଘଟିଥିବା ଘୋଷଣା କରିଥିଲେ। ଏହି ଖବର ପ୍ରଚାରିତ ହେବା ପରେ ଗାଁ ଲୋକେ ସ୍ତବ୍ଧ ହୋଇଯାଇଥିଲେ। ନବବଧୂ ସାଜି ଅଳତା, ସିନ୍ଦୂର ପିନ୍ଧି ଶାଶୁଘର ଯିବା ବଦଳରେ ଚାଲିଗଲେ ଆରପାରିକୁ। ରୋଜିଙ୍କ ବାପାଙ୍କ ଗତ କିଛିଦିନ ତଳେ ମୃତ୍ୟୁ ଘଟିଥିଲା। ସମସ୍ତେ ଭାବିଥିଲେ ରୋଜି ବାହା ହୋଇ ଶାଶୁଘରକୁ ଯାଇ ସୁଖରେ ଦିନ କାଟିବ। ବାପାଙ୍କ ମୃତ୍ୟୁର ଦୁଃଖ ଭୁଲିଯିବ। କିନ୍ତୁ ଶାଶୁଘର ଯିବା ତାଙ୍କ ଭାଗ୍ୟରେ ନ ଥିଲା। ବିନିକା ମେଡିକାଳରେ ମୃତଦେହ ବ୍ୟବଚ୍ଛେଦ ପରେ ପୋଲିସ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ବିନିକା ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
