କଣାସ,୨୧।୧୨(ସ୍ବ.ପ୍ର.): କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଗ୍ରାମାଞ୍ଚଳର ପ୍ରଗତି ପାଇଁ ରାସ୍ତାଗୁଡ଼ିକୁ ଅଧିକ ପ୍ରଶସ୍ତୀକରଣ କରାଯାଉଥିବାବେଳେ ପୁରୀ ଜିଲା କଣାସ ବ୍ଲକରେ ରାସ୍ତା ପ୍ରଶସ୍ତୀକରଣ ଚାଲିଛି। ଗ୍ରାମ୍ୟ ଉନ୍ନୟନ ଓ ଜଳସେଚନ ବିଭାଗ ପକ୍ଷରୁ ହେଉଥିବା ଏହି କାର୍ଯ୍ୟ ସମୟରେ ରାସ୍ତା ମଝିରେ ଥିବା ବିଦ୍ୟୁତ୍ ଖୁଣ୍ଟଗୁଡ଼ିକ ଉଠାଯାଉ ନ ଥିବାରୁ ଦୁର୍ଘଟଣାମାନ ଘଟୁଥିବା ଦେଖିବାକୁ ମିଳୁଛି। ଜାଗୁଳାଇପଦରଠାରୁ ସାହସପୁର ରାସ୍ତା ମଝିରେ ଥିବା ବିଦ୍ୟୁତ୍ ଖୁଣ୍ଟ ଦେହରେ ସୋମବାର ବିଳମ୍ବିତ ରାତିରେ ଏକ ଚାରିଚକିଆ ଟ୍ରକ ଧକ୍କା ହେବାରୁ ବିଦ୍ୟୁତ୍ ଖୁଣ୍ଟଟି ବଙ୍କା ହୋଇଯାଇଛି। ଉକ୍ତ ସ୍ଥାନରେ ପୂର୍ବରୁ ୨/୩ ଥର ଦୁର୍ଘଟଣା ମଧ୍ୟ ଘଟିଛି। ଜାଗୁଳାଇପଦରଠାରୁ ସାହସପୁର, କଉଡିଖଣି ପର୍ଯ୍ୟନ୍ତ, ଗୋପୀନାଥପୁରଠାରୁ ଅଡାଲ ପର୍ଯ୍ୟନ୍ତ, ଜଙ୍କିଆଠାରୁ ଗଡ଼ିଶାଗୋଦା ଏବଂ କଉଡ଼ିଆପୁର ରାସ୍ତାଗୁଡ଼ିକ ପ୍ରଶସ୍ତୀକରଣ କରାଯାଉଛି। ଏହି ରାସ୍ତା ମଝିରେ ବିଦ୍ୟୁତ୍ ଖୁଣ୍ଟ ଥିବାରୁ ଏହି ରାସ୍ତାର ଖୁଣ୍ଟଗୁଡ଼ିକ ରାସ୍ତା ପାର୍ଶ୍ୱକୁ ସ୍ଥାନାନ୍ତରିତ ହେବା ପାଇଁ କଣାସ ବିଦ୍ୟୁତ୍ ବିଭାଗ ପକ୍ଷରୁ ଏକ ପ୍ଲାନ ତିଆରି କରି ଦିଆଯାଇଥିବା ଜଣାପଡ଼ିଛି। ବିଦ୍ୟୁତ୍ ଖୁଣ୍ଟ ସମ୍ପର୍କରେ କଣାସ ବିଦ୍ୟୁତ୍ ସହକାରୀ ଯନ୍ତ୍ରୀ ସଞ୍ଜୟ ଜେନାଙ୍କୁ ପଚାରିବାରୁ, ଏଥିପାଇଁ ଆବଶ୍ୟକ ଅର୍ଥ ରାସ୍ତା ନିର୍ମାଣ କରୁଥିବା ସଂସ୍ଥା ଅର୍ଥ ପ୍ରଦାନ କଲେ ବିଦ୍ୟୁତ୍ ଖୁଣ୍ଟଗୁଡ଼ିକ ସ୍ଥାନାନ୍ତର ପାଇଁ ଗ୍ରାମ୍ୟ ଉନ୍ନୟନ ବିଭାଗକୁ ଚିଠି ଲେଖାଯାଇଛି। ହେଲେ ସେମାନେ ଏଥିପ୍ରତି କୌଣସି ଧ୍ୟାନ ଦେଉ ନ ଥିବା କହିଛନ୍ତି। ଗ୍ରାମ୍ୟ ଉନ୍ନୟନ ବିଭାଗ ସହକାରୀ ଯନ୍ତ୍ରୀ କାର୍ତ୍ତିକ ପ୍ରଧାନଙ୍କୁ ପଚାରିବାରୁ, ବିଦ୍ୟୁତ୍ ବିଭାଗକୁ ଖୁଣ୍ଟ ଉଠାଇବା ପାଇଁ ଟଙ୍କା ଦେବାକୁ ହେଲେ ବିଦ୍ୟୁତ୍ ବିଭାଗ ପକ୍ଷରୁ ଚିଠି ଦେବାକୁ ହେବ। କିନ୍ତୁ ସେମାନେ କୌଣସି ପତ୍ର ଦେଇନାହାନ୍ତି।
