ପ୍ୟାରିସ୍,୧୨।୧୦(ଏପି): କୋଭିଡ୍-୧୯ ମହାମାରୀ ଦ୍ୱାରା ଫ୍ରେଞ୍ଚ୍ ଓପନ୍ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ କ୍ଷତିଗ୍ରସ୍ତ ହୋଇଛି। ଟୁର୍ନାମେଣ୍ଟର ରାଜସ୍ବରେ ଯଥେଷ୍ଟ ହ୍ରାସ ହୋଇଛି ଓ ଏଥର ଆଦୌ ଲାଭ ହୋଇନାହିଁ ବୋଲି ଆୟୋଜକମାନେ ସୂଚନା ଦେଇଛନ୍ତି। ଏଥର ୯୭ ପ୍ରତିଶତ ଟିକେଟ ବିକ୍ରି ହୋଇପାରିନାହିଁ। ଅଧିକାଂଶ ଦର୍ଶକ ରବିବାର ଆୟୋଜିତ ହୋଇଥିବା ରାଫାଲ ନାଡାଲ ଓ ନୋଭାକ ଜୋକୋଭିଚ୍ଙ୍କ ମଧ୍ୟରେ ଅନୁଷ୍ଠିତ ଫାଇନାଲ ମ୍ୟାଚ୍ ଦେଖିଛନ୍ତି।
ଆସନ୍ତାବର୍ଷ ପୂର୍ବନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଫ୍ରେଞ୍ଚ୍ ଓପନ୍ ମେ- ଜୁନ୍ରେ ଆୟୋଜନ କରିବାକୁ ଆୟୋଜକ ଯୋଜନା କରୁଛନ୍ତି। ତେବେ ଏବେଠାରୁ ଏ ନେଇ କିଛି କହିହେବ ନାହିଁ ବୋଲି ଫ୍ରେଞ୍ଚ୍ ଓପନ୍ ଫେଡେରେଶନ ଅଧ୍ୟକ୍ଷ ବର୍ନାଡ ଗିଉଡିସେଲି କହିଛନ୍ତି। ଏଥର ମହାମାରୀ କାରଣରୁ କେବଳ ୧,୦୦୦ ଦର୍ଶକଙ୍କୁ ପ୍ରତିଦିନ ମ୍ୟାଚ୍ ଦେଖିବାକୁ ଅନୁମତି ଦିଆଯାଇଥିଲା। ତେଣୁ କେବଳ ୩ ପ୍ରତିଶତ ଟିକେଟ ବିକ୍ରି ହୋଇଛି। ଫଳରେ ୮୦ରୁ ୧୦୦ ମିଲିୟନ ୟୁରୋ ବା ୯୫ରୁ ୧୧୮ ମିଲିୟନ ଆମେରିକୀୟ ଡଲାର କ୍ଷତି ସହିବାକୁ ପଡିଛି ବୋଲି ସେ କହିଛନ୍ତି। ଏଥର ଲାଭ ହୋଇନାହିଁ ବୋଲି ଫ୍ରେଞ୍ଚ୍ ଫେଡେରେଶନ ଡାଇରେକ୍ଟର ଜେନେରାଲ ଜିନ୍- ଫ୍ରାଙ୍କୋଇସ୍ ଭିଲୋଟ୍ କହିଛନ୍ତି। ତେବେ ମହାମାରୀର ପ୍ରକୋପ ଜାରି ରହିଥିବା ବେଳେ ଫ୍ରେଞ୍ଚ୍ ଓପନ୍ ସଫଳତାର ସହ ଆୟୋଜନ କରିବା ଏକ ବଡ଼ ସଫଳତା ବୋଲି ସେ କହିଛନ୍ତି।
