ଭୁବନେଶ୍ୱର,୬।୩(ସ୍ପୋଟର୍ସ ବ୍ୟୁରୋ): ଭାରତରେ ନିଯୁକ୍ତ ଫ୍ରାନ୍ସ ରାଷ୍ଟ୍ରଦୂତ ଇମାନୁଏଲ ଲେନାନ କଳିଙ୍ଗ ଷ୍ଟାଡିୟମ ପରିଦର୍ଶନ କରିଛନ୍ତି। ଜାଭିୟର ଇନ୍ଷ୍ଟିଚ୍ୟୁଟ ଅଫ୍ ମ୍ୟାନେଜମେଣ୍ଟ ଆଣ୍ଡ ବିଜ୍ନେସ୍ (ଏକ୍ସଆଇଏମ୍ବି)ସ୍ଥିତ ସ୍ପୋଟର୍ସ ଇଣ୍ଡଷ୍ଟ୍ରି ମ୍ୟାନେଜମେଣ୍ଟ ଅଫ୍ ଜାଭିୟର ଏମିଲନ ବିଜ୍ନେସ ସ୍କୁଲ (ଏକ୍ସଇବିଏସ୍)ରେ ଦେଶର ପ୍ରଥମ ଇଣ୍ଡୋ ଫ୍ରେଞ୍ଚ୍ ଡୁଆଲ ଡିଗ୍ରୀ ମାଷ୍ଟର୍ସ ପ୍ରୋଗ୍ରାମ ଲଞ୍ଚ୍ କରିବା ପରେ ସେ ଶୁକ୍ରବାର କଳିଙ୍ଗ ଷ୍ଟାଡିୟମ ପରିଦର୍ଶନ କରିଥିଲେ। ଇମାନୁଏଲଙ୍କ ସମେତ କନ୍ସୁଲ ଜେନେରାଲ, କୋଲକାତାରେ ନିୟୋଜିତ ଫ୍ରାନ୍ସର କନସୁଲେଟ୍ ଜେନେରାଲ ଭିର୍ଜିନ କୋର୍ଟେଭାଲ, ଏକ୍ସଇବିଏସ୍ର ଅଧିକାରୀ ଏବଂ ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ଅଧିକାରୀମାନେ କଳିଙ୍ଗ ଷ୍ଟାଡିୟମ କମ୍ପ୍ଲେକ୍ସ ବୁଲି ଦେଖିଥିଲେ। ସେଠାରେ କ୍ରୀଡ଼ା ବିଭାଗ ସ୍ବତନ୍ତ୍ର ସଚିବ ଆର. ଭିନିଲ କ୍ରିଷ୍ଣା କ୍ରୀଡ଼ାର ଉନ୍ନତି ପାଇଁ ଓଡ଼ିଶାର ସ୍ବତନ୍ତ୍ର ପ୍ରୟାସ ସମ୍ପର୍କରେ ସମସ୍ତଙ୍କୁ ଅବଗତ କରାଇଥିଲେ। ଅନ୍ୟ ରାଜ୍ୟଗୁଡିକଠାରୁ ଓଡ଼ିଶା କିଭଳି ନୂଆ ପ୍ରୟାସ ଆରମ୍ଭ କରିଛି ସେ ବିଷୟରେ କହିଥିଲେ। ଇମାନୁଏଲ ହାଇପରଫର୍ମାନ୍ସ ସେଣ୍ଟର (ଏଚ୍ପିସି)- ଓଡ଼ିଶା ନାଭାଲ ଟାଟା ହକି ହାଇପରଫର୍ମାନ୍ସ ସେଣ୍ଟର ଓ ଅଭିନବ ବିନ୍ଦ୍ରା ଟାର୍ଗେଟିଂ ପରଫର୍ମାନ୍ସ (ଏବିଟିବି) ଗସ୍ତ କରିଥିଲେ।
ହକି ହାଇପରଫର୍ମାନ୍ସ ସେଣ୍ଟରରେ ଇମାନୁଏଲ ଟ୍ରେନି କ୍ୟାଡେଟ୍ମାନଙ୍କ ସହ ଆଲୋଚନା କରିଥିଲେ ଓ ହକି ଷ୍ଟିକ୍ରେ କେତୋଟି ଶଟ୍ ମାରିଥିଲେ। ଇମାନୁଏଲଙ୍କ ଉପସ୍ଥିତିରେ ଖେଳାଳିମାନେ ବେଶ୍ ଉତ୍ସାହିତ ହୋଇଥିଲେ। ଏଚ୍ପିସି ପ୍ରୋଜେକ୍ଟ ଡାଇରେକ୍ଟର ରାଜୀବ ସେଠ ଓଡ଼ିଶା ହକିର ଇକୋସିଷ୍ଟମ୍ ନେଇ ବିସ୍ତୃତ ଭାବେ ସୂଚନା ଦେଇଥିଲେ। କ୍ୟାଡେଟ୍ମାନଙ୍କୁ ଉତ୍ସାହିତ କରିବା ପାଇଁ ଇମାନୁଏଲ ମଧ୍ୟ କିଛି କହିଥିଲେ।
ଏହାପରେ ଏଟିବିପି ସ୍ପୋଟର୍ସ ସାଇନ୍ସ ସେଣ୍ଟରରେ ସେ ଅଲିମ୍ପିକ୍ ସ୍ବର୍ଣ୍ଣ ପଦକ ବିଜେତା ଅଭିନବ ବିନ୍ଦ୍ରାଙ୍କ ସହ ଭର୍ଚୁଆଲ ଭାବେ କଥା ହୋଇଥିଲେ। ସେଣ୍ଟର ମୁଖ୍ୟ ପ୍ରଦୀପ ପିଲେ ବାୟୋ ମେକାନିକାଲ ଆସେସମେଣ୍ଟ ଓ ରିହାବିଲିଟେଶନ ସୁବିଧା ସୁଯୋଗ ନେଇ ବିସ୍ତୃତ ବିବରଣୀ ଦେଇଥିଲେ। ଶେଷରେ ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ପ୍ରମୁଖ ସଚିବ ବିଶାଳ କୁମାର ଦେବ ରାଜ୍ୟରେ କ୍ରୀଡ଼ାର ଯାତ୍ରା ସମ୍ପର୍କରେ ବିବରଣୀ ଦେଇଥିଲେ। ରାଜ୍ୟରେ କିପରି କ୍ରୀଡ଼ାର ବିଶ୍ୱସ୍ତରୀୟ ଭିତ୍ତିଭୂମି ବିକାଶ ହୋଇଛି ଏବଂ ହାଇପରଫର୍ମାନ୍ସ ସେଣ୍ଟର ଓ ଗ୍ରାସ୍ରୁଟ ପ୍ରୋଗ୍ରାମ ସମ୍ପର୍କରେ ଇମାନୁଏଲଙ୍କୁ ବୁଝାଇଥିଲେ। କଳିଙ୍ଗ ଷ୍ଟାଡିୟମରେ ଥିବା ଭିତ୍ତିଭୂମି ଓ ସୁବିଧା ସୁଯୋଗ ଦେଖି ସେ ଆନନ୍ଦିତ ହୋଇଥିଲେ ଓ ପ୍ରଶଂସା କରିଥିଲେ।