ଆନନ୍ଦପୁର, ୧୫।୨(ସ୍ବ.ପ୍ର.) ପୁଲଓ୍ବାମା ଶହୀଦଙ୍କ ଉଦ୍ଦେଶ୍ୟରେ ଯାତ୍ରୀମାନଙ୍କୁ ମାଗଣା ସେବା ଯୋଗାଇ ନିଆରା ଦେଶପ୍ରୀତିର ପରିଚୟ ଦେଇଛନ୍ତି କେନ୍ଦୁଝର ଜିଲା ଆନନ୍ଦପୁର ଅଞ୍ଚଳର ନରେନ୍ଦ୍ର କୁମାର ଯେନା। ନରି ଭାଇ ନାମରେ ସେ ଆଖପାଖ ଅଞ୍ଚଳରେ ଜଣାଶୁଣା। ୧୪ ଓ ୧୫ ତାରିଖ ଦୁଇଦିନ ଧରି ନରି ଭାଇ ନିଜ ଅଟୋ ଯୋଗେ ଯାତ୍ରୀମାନଙ୍କୁ ମାଗଣା ସେବା ଆରମ୍ଭ କରିଛନ୍ତି। ଘସିପୁରା ଝାଡେଶ୍ୱର ମନ୍ଦିର ପରିସରରୁ ସେ ଏହି ସେବାର ଶୁଭାରମ୍ଭ କରିଛନ୍ତି। ଏହି ସେବା ସେ ସକାଳ ୭ରୁ ସନ୍ଧ୍ୟା ୭ଟା ଯାଏ ଦୁଇ ଦିନ ଧରି ଯୋଗାଇଦେବାକୁ ସ୍ଥିର କରିଛନ୍ତି। ଭାଲେଣ୍ଟାଇନ୍ ଦିବସକୁ ଶହୀଦ ଦିବସ ଭାବେ ପାଳନ କରିବାକୁ ନରି ଭାଇ ମନସ୍ଥ କରି ଏହି ସେବା ଆରମ୍ଭ କରିଛନ୍ତି। ଆନନ୍ଦପୁର ଫକୀରମୋହନ ବସ୍ଷ୍ଟାଣ୍ଡଠାରୁ ଉପଖଣ୍ଡ ଚିକିତ୍ସାଳୟ, ଆନନ୍ଦପୁର କଲେଜ ଏବଂ କନକମଞ୍ଜରୀ ମହିଳା ମହାବିଦ୍ୟାଳୟ ପର୍ଯ୍ୟନ୍ତ ଛାତ୍ରଛାତ୍ରୀମାନଙ୍କୁ ମାଗଣା ସେବା ଯୋଗାଇଦେଉଛନ୍ତି। ଏହାସହିତ ଆନନ୍ଦପୁର ବ୍ରିଜଛକ, ଶାଳପଡା ବାଇପାସ୍ ଛକ, ଖପରାଖାଇ ବସ୍ଷ୍ଟାଣ୍ଡ ପର୍ଯ୍ୟନ୍ତ ଯାତ୍ରୀମାନଙ୍କୁ ମାଗଣାରେ ସେବା ଯୋଗାଇଦିଆଯିବ। କିଛିବର୍ଷ ହେବ ସେ ଏଭଳି ମହତ କାର୍ଯ୍ୟ କରିଆସୁଛନ୍ତି। ୨୦୨୧ରେ ନରି ଭାଇ ୩ଦିନ ଧରି ମାଗଣା ସେବା ଯୋଗାଇ ଦେଇଥିଲେ।
