ନୂଆଦିଲ୍ଲୀ,୩।୧୧: ଦେଶର ସମସ୍ତ କେନ୍ଦ୍ରୀୟ ପାରାମିଲିଟାରୀ କର୍ମଚାରୀ ଏବଂ ସେମାନଙ୍କ ପରିବାର ସଦସ୍ୟଙ୍କୁ ଆୟୁଷ୍ମାନ ଭାରତ ଯୋଜନା ଅନ୍ତର୍ଗତରେ ମାଗଣା ଏବଂ ନଗଦ ବିହୀନ ଚିକିତ୍ସା ଉପଲବ୍ଧ ହେବ। ଆୟୁଷ୍ମାନ ଭାରତ ଅଧୀନରେ ସ୍ବୀକୃତିପ୍ରାପ୍ତ ଯେ କୌଣସି ସିଜିଏଚ୍ଏସ୍ ହସ୍ପିଟାଲ ଏବଂ ଅନ୍ୟ ହସ୍ପିଟାଲରେ ଏହି ଚିକିତ୍ସାର ସୁବିଧା ପ୍ରଦାନ କରାଯିବ। ଆୟୁଷ୍ମାନ କାର୍ଡ ମାଧ୍ୟମରେ ଏହି ସୁବିଧା ମିଳିପାରିବ।
ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଏନଏସଜି ଯବାନଙ୍କୁ ଆୟୁଷ୍ମାନ କାର୍ଡ ଦେଇ ଏହି ଯୋଜନା ଆରମ୍ଭ କରିଛନ୍ତି। ଡିସେମ୍ବର ୩୧ ସୁଦ୍ଧା କେନ୍ଦ୍ରୀୟ ପାରାମିଲିଟାରୀ ଫୋର୍ସର ସମସ୍ତ ୩୫ ଲକ୍ଷ କର୍ମଚାରୀଙ୍କୁ ଆୟୁଷ୍ମାନ କାର୍ଡ ପ୍ରଦାନ କରିବାକୁ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଲକ୍ଷ୍ୟ ଧାର୍ଯ୍ୟ କରାଯାଇଛି।
ସ୍ବରାଷ୍ଟ୍ର ମନ୍ତ୍ରଣାଳୟ ଅଧୀନରେ ସାତଟି କେନ୍ଦ୍ରୀୟ ସାମରିକ ବାହିନୀ ଅଛନ୍ତି। ଏଥିମଧ୍ୟରେ ଏନଏସଜି, ଆସାମ ରାଇଫଲ୍ସ, ଆଇଟିବିପି, ଏସଏସବି, ସିଆଇଏସଏଫ, ବିଏସଏଫ ଏବଂ ସିଆରପିଏଫ ଆଦି ଅନ୍ତର୍ଭୁକ୍ତ। ସମସ୍ତ କେନ୍ଦ୍ରୀୟ ସାମରିକ ବାହିନୀଙ୍କ ପାଇଁ ଜାତୀୟ ସ୍ତରରେ ଆୟୁଷ୍ମାନ ସି,ପିଏଫ ଯୋଜନା ଆରମ୍ଭ କରି ଅମିତ ଶାହା କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ସର୍ବଦା ସୁରକ୍ଷା ବାହିନୀଙ୍କ ସ୍ବାର୍ଥ ପ୍ରତି ଧ୍ୟାନ ଦେଉଛନ୍ତି।
ସେ କହିଛନ୍ତି ଯେ ଏହି ଯୋଜନା ଅଧୀନରେ କେନ୍ଦ୍ରୀୟ ପାରାମିଲିଟାରୀ ଫୋର୍ସର ସମସ୍ତ କର୍ମଚାରୀ ଏବଂ ସେମାନଙ୍କ ପରିବାରଙ୍କୁ ଅନ୍ତର୍ଭୁକ୍ତ କରାଯିବ। ସ୍ବରାଷ୍ଟ୍ର ମନ୍ତ୍ରଣାଳୟ, ସ୍ବାସ୍ଥ୍ୟ ମନ୍ତ୍ରଣାଳୟ ଏବଂ ଜାତୀସ ସ୍ବାସ୍ଥ୍ୟ ପ୍ରାଧିକରଣ ମିଳିତ ଭାବେ ଏହି ଯୋଜନା ପ୍ରସ୍ତୁତ କରିଛନ୍ତି।
ଏନେଇ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏକ ଟୋଲ ଫ୍ରି ହେଲ୍ପଲାଇନ ନମ୍ବର ୧୪୫୮୮ ଜାରି ହୋଇଛି। ଯାହା ଦ୍ୱାରା ଆୟୁଷ୍ମାନ ସିଏପିଏଫ ଯୋଜନାର ହିତାଧିକାରୀମାନେ ଚିକିତ୍ସା ସମୟରେ କୌଣସି ସମସ୍ୟାର ସମ୍ମୁଖୀନ ହେବେ ନାହିଁ। ଏହା ସହିତ, ଅନଲାଇନ ଅଭିଯୋଗର ଏକ ବ୍ୟବସ୍ଥା ପ୍ରସ୍ତୁତ କରାଯାଇଛି, ଯାହାଦ୍ୱାରା ହିତାଧିକାରୀମାନେ ସମ୍ମୁଖୀନ ହେଉଥିବା ସମସ୍ୟାର ତୁରନ୍ତ ସମାଧାନ ହୋଇପାରିବ।
ସୂଚନାଯୋଗ୍ୟ ଯେ ଅମିତ ଶାହା ଚଳିତ ବର୍ଷ ଜାନୁଆରୀରେ ଆସାମରୁ ଏହି ଯୋଜନାର ପାଇଲଟ ପ୍ରୋଜେକ୍ଟ ଆରମ୍ଭ କରିଥିଲେ। ଏହା ପରେ ଡିସେମ୍ବର ସୁଦ୍ଧା ଅମୃତ ସ୍ବାଧୀନତା ମହୋତ୍ସବ ଅଧୀନରେ ୭.୫ ଲକ୍ଷ କାର୍ଡ ହସ୍ତାନ୍ତର ପାଇଁ ପ୍ରସ୍ତୁତି ଚାଲିଥିଲା। କିନ୍ତୁ ପରେ ଏହାକୁ ବୃଦ୍ଧି କରି ସମସ୍ତ ୩୫ ଲକ୍ଷ କର୍ମଚାରୀଙ୍କୁ ପ୍ରଦାନ କରିବାକୁ ନିଷ୍ପତ୍ତି ଗ୍ରହଣ କରାଯାଇଥିଲା।