ରୂପ୍ସା,୨୩|୧( ଡିଏନଏ ) ନିଜକୁ ତହସିଲ କର୍ମଚାରୀ କହି ନକଲି ଜମି ପଟ୍ଟା ଦେଇ ଲକ୍ଷାଧିକ ଟଙ୍କା ଠକି ନେଇଛନ୍ତି ଜଣେ ଯୁବକ। ଏମିତି ଏକ ଘଟଣା ଦେଖିବାକୁ ମିଳିଛି ବସ୍ତା ଥାନା ଅର୍ନ୍ତଗତ ସଦର ବ୍ଲକ ଅଞ୍ଚଳରେ। ସୂଚନା ଅନୁଯାୟୀ, ବସ୍ତା ଥାନା ଅନ୍ତର୍ଗତ କ୍ଷୀରଙ୍ଗ ଗ୍ରାମର ଉକ୍ତ ଯୁବକ ନିଜକୁ ତହସିଲ କାର୍ଯ୍ୟାଳୟ କର୍ମଚାରୀ ଭାବେ ପରିଚୟ ଦେଇ ସଦର ବ୍ଲକ ଅନ୍ତର୍ଗତ ଏଣ୍ତରାଇ, ବେଲଦା, ରାଘବପୁର ଏବଂ ସାର୍ଥା ଗ୍ରାମର ୧୫ରୁ ଊର୍ଦ୍ଧ୍ୱ ଲୋକଙ୍କୁ ଭୂଦାନ ଯୋଜନାରେ ଜମି ପଟ୍ଟା ଯୋଗାଇ ଦେବାର ପ୍ରତିଶ୍ରୁତି ଦେଇ ପ୍ରତି ଜମିପଟ୍ଟା ପିଛା ୨୦ ହଜାର ଟଙ୍କା ଲେଖାଏ ୩ ଲକ୍ଷରୁ ଊଦ୍ଧର୍ବ ଟଙ୍କା ଠକି କରିନେଇଥିବା ଅଭିଯୋଗ ହୋଇଛି। ପରେ ଲୋକେ ପଟ୍ଟା ପାଇବା ପାଇଁ ବାରମ୍ବାର ଉକ୍ତ ଯୁବକଙ୍କୁ ଯୋଗାଯୋଗ କରିଥିଲେ ମଧ୍ୟ ସେ ଆଉ ଧରାଛୁଆଁ ଦେଉନାହାନ୍ତି। ତେବେ ଗତ କିଛି ମାସ ପୂର୍ବରୁ ଉକ୍ତ ଯୁବକ ଜଣକ ସମସ୍ତଙ୍କୁ ଖଣ୍ତିଏ ଖଣ୍ତିଏ ପଟ୍ଟା ଦେଇଥିଲେ। ପଟ୍ଟା ପାଇବା ପରେ ଲୋକେ ଖୁସି ହୋଇ ଯାଇଥିଲେ। ଏହାପରେ ସେମାନଙ୍କର ପିଲାମାନଙ୍କ ପାଠପଢା ପାଇଁ ଜାତିଗତ ପ୍ରମାଣପତ୍ର ବାହାର କରିବା ଲାଗି ଉକ୍ତ ପଟ୍ଟା ନେଇ ତହସିଲ ଅଫିସରେ ଦାଖଲ କରିବା ପରେ ସେଗୁଡ଼ିକ ନକଲି ବୋଲି ଜଣା ପଡ଼ିଥିଲା। ଧାର କରଜ କରି ଟଙ୍କା ଦେଇଥିବା ଗରିବ ଲୋକେ ଜମିପଟ୍ଟା ନକଲି ବୋଲି ଜାଣିବା ପରେ ଏବେ ସେମାନେ ଚିନ୍ତାରେ ପଡ଼ିଛନ୍ତି। ଏନେଇ ସେମାନେ ଟଙ୍କା ଫେରସ୍ତ ପାଇଁ ଉକ୍ତ ଯୁବକଙ୍କ ଘରକୁ ବାରମ୍ବାର ଦୌଡୁଥିଲେ ମଧ୍ୟ ସେ ଲୋକଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଗୁଣ୍ତା ଲଗେଇ ମାରି ଦେବାର ଧମକ ଦେଉଥିବା ଅଭିଯୋଗ ହୋଇଛି। ଏନେଇ କାଳିଚରଣ ଦାସ, ସନ୍ତୋଷ କୁମାର ସିଂ, ରାଜକିଶୋର ଦାସ ପ୍ରମୁଖ ବସ୍ତା ଥାନାରେ ଲିଖିତ ଅଭିଯୋଗ କରିଛନ୍ତି। ଘଟଣାର ତଦନ୍ତ ଜାରି ରହିଥିବା ପୋଲିସ ସୂଚନା ଦେଇଛି।
