ବେଙ୍ଗାଲୁରୁ,୧୪।୩: ସୁରକ୍ଷା ବଳୟ ଡେଇଁ ପୂର୍ବତନ ଭାରତୀୟ ଅଧିନାୟକ ବିରାଟ କୋହଲିଙ୍କ ସହ ସେଲଫି ନେବା ୪ ପ୍ରଶଂସକଙ୍କୁ ମହଙ୍ଗା ପଡ଼ିଛି। ୪ ଜଣଙ୍କୁ ହେପାଜତକୁ ନିଆଯାଇଥିବା ପୋଲିସ ପକ୍ଷରୁ ସୋମବାର କୁହାଯାଇଛି।
ପୋଲିସ କହିବା ଅନୁଯାୟୀ, କୁବନ ପାର୍କ ଥାନାରେ ସୁରକ୍ଷା ପ୍ରୋଟୋକଲ ଭଙ୍ଗ କରିବା ପାଇଁ ଏଫ୍ଆଇଆର ରୁଜୁ କରାଯାଇଥିଲା। ସେମାନଙ୍କୁ ଗିରଫ କରାଯାଇଛି ଏବଂ କୋର୍ଟରେ ହାଜର କରାଯିବ। ଉଲ୍ଲେଖଯୋଗ୍ୟ, ରବିବାର ପ୍ରାୟ ୧୦ଟା ୧୫ରେ ଅଭିଯୁକ୍ତମାନେ ହଠାତ୍ ସୁରକ୍ଷା ବଳୟ ଡେଇଁ କୋହଲିଙ୍କ ଆଡ଼କୁ ଦୌଡ଼ିଥିଲେ। କୋହଲିଙ୍କ ସହ ସେଲ୍ଫି ନେବା ପରେ ସେମାନେ ପଡ଼ିଆରୁ ଚାଲି ଯାଇଥିଲେ। ଏମ୍ ଚିନ୍ନାସ୍ବାମୀ ଷ୍ଟାଡିୟମରେ ଚାଲିଥିବା ଶ୍ରୀଲଙ୍କା ବିପକ୍ଷ ଦିବାରାତ୍ର ତଥା ଦ୍ୱିତୀୟ ଟେଷ୍ଟ ବେଳେ ଏହି ଘଟଣା ଘଟିଥିଲା। ଘଟଣାର ତୁରନ୍ତ ପରେ ଅଭିଯୁକ୍ତଙ୍କୁ କୁବନ ପାର୍କ ପୋଲିସ ହେପାଜତକୁ ନେଇଥିଲା।
