ଦାରିଙ୍ଗବାଡି,୧୫।୯(ଅରୁଣ ସାହୁ): ଓଡିଶାର କାଶ୍ମୀର ଭାବେ ପରିଚିତ ଦାରିଙ୍ଗବାଡି ଏକ ବୃହତ ବ୍ଲକ ଭାବେ ପରିଚିତ । ଏଠାରେ ବଣ, ଜଙ୍ଗଲ ଘେରା ଦୁର୍ଗମ ପାହାଡ଼ ଉପରେ ଅନୁସୂଚିତ ଜନଜାତି ଓ ଜାତି, ପଛୁଆ ବର୍ଗର ଜନ ବସତି ରହିଛି । ମୂଳ ଜୀବନଜୀବିକା ମଧ୍ୟରେ ହଳଦୀ, ଅଦା, କ୍ଷୁଦ୍ରଦାନା ଶସ୍ୟ, ମକା ଭଳି ଚାଷ ସହ ଜଙ୍ଗଲଜାତୀୟ ଦ୍ରବ୍ୟ ସଂଗ୍ରହ କରି ପରିବାର ଚଳାଉଛନ୍ତି । ଅଭାବ ଅନାଟନ ମଧ୍ୟରେ ବସବାସ କରୁଥିବା ଜନଜାତି ସମ୍ପ୍ରଦାୟର ପରିବାରରୁ ଆସିଥିବା ଛାତ୍ରୀଛାତ୍ରଙ୍କ ଶିକ୍ଷାର ବିକାଶ ହେବା ଏକ ପ୍ରକାର ସ୍ପଷ୍ଟ ହୋଇଛି । ଗତ ୩ ବର୍ଷ ମଧ୍ୟରେ ଉକ୍ତ ବ୍ଲକର ଦୁର୍ଗମ ଅଞ୍ଚଳର ଜନଜାତି ଛାତ୍ରୀଛାତ୍ରମାନେ ବହୁ ସଂଘର୍ଷ ଓ ଅଭାବ ଅନାଟନ ଓ ନେଟୱାର୍କ ଭଳି ସମସ୍ୟା ମଧ୍ୟରେ ଗତି କରି ମୋଟ ୮ ଜଣ ଛାତ୍ରୀଛାତ୍ର ନିଟ୍ ପରୀକ୍ଷାରେ ସଫଳତାର ସହ ଉତ୍ତୀର୍ଣ୍ଣ ହୋଇ ରାଜ୍ୟର ବିଭିନ୍ନ ମେଡିକାଲ କଲେଜରେ ନାମ ଲେଖାଇ ଏବେ ଡାକ୍ତରୀ ପାଠ ପଢୁଛନ୍ତି ।
ଆଗାମୀ ଦିନରେ ସେମାନଙ୍କ ଏହି ପାଠ ପଢ଼ା ସରିଲେ ସେମାନେ ଅଞ୍ଚଳରେ ଅଭାବ ଥିବା ଡାକ୍ତର ପଦବୀକୁ ପୂରଣ କରି ଅଞ୍ଚଳର ଲୋକଙ୍କ ସେବା କରିପାରିବେ । ପ୍ରକାଶ ଯେ ଚଳିତ ବର୍ଷ ଉକ୍ତ ବ୍ଲକ ରେ ଚାରିଜଣ ଡାକ୍ତରୀ ପଢିବା ପାଇଁ ନିଟରେ ଉତ୍ତୀର୍ଣ୍ଣ ହୋଇଛନ୍ତି । ୪ ଜଣଙ୍କ ମଧ୍ୟରେ ଗୋଟିଏ ପରିବାରରୁ ୩ ଜଣ ଡାକ୍ତରୀ ଛାତ୍ର ଭାବେ ନାମ ଲେଖାଇଛନ୍ତି । ସେମାନେ ହେଲେ ଉକ୍ତ ବ୍ଲକ ତାଜୁଙ୍ଗିଆ ପଞ୍ଚାୟତ ସିକବାଡି ଗ୍ରାମର ବୁର୍ଶୀ ପ୍ରଧାନଙ୍କ ପୁଅ ଏସରିୟ ପ୍ରଧାନ, ଝିଅ ସୁନେମି ପ୍ରଧାନ ଓ ବୁର୍ଶୀଙ୍କ ସାନଭାଇ ଜିସାୟ ପ୍ରଧାନଙ୍କ ଝିଅ ମିନାକ୍ଷୀ ପ୍ରଧାନ ।
ପ୍ରଥମ ବର୍ଷର ଡାକ୍ତରୀ ଛାତ୍ରୀଛାତ୍ର ଭାବେ ବିଭିନ୍ନ ମେଡିକାଲ କଲେଜ ରେ ନାମ ଲେଖାଇଛନ୍ତି । ସେହିପରି ଉକ୍ତ ବ୍ଲକ ଦାସିଙ୍ଗବାଡି ପଞ୍ଚାୟତର ଡଙ୍ଗାମାଲା ଗ୍ରାମର ମା’ପ୍ରେମିଶିଲା ପ୍ରଧାନ ଓ ବାପା ପ୍ରଧାନଙ୍କ ଝିଅ ରାଜଶ୍ରୀ ପ୍ରଧାନ ମଧ୍ୟ ସଫଳତାର ସହ ନିଟ୍ ରେ ଉତ୍ତୀର୍ଣ୍ଣ ହୋଇ ବୁର୍ଲା ମେଡିକାଲ କଲେଜରେ ନାମ ଲେଖାଇଛନ୍ତି । ସମସ୍ତ ଡାକ୍ତରୀ ଛାତ୍ରୀଛାତ୍ର ଅଭାବ ଅନାଟନ ଓ ମୋବାଇଲ ନେଟୱାର୍କ ନଥିବାରୁ ପାହାଡ଼ ଉପରକୁ ଯାଇ ସାମାଜିକ ଗଣମାଧ୍ୟମରୁ ଶିଖି ଜାଣି ବିନା କୋଚିଂରେ ନିଜ ଉଦ୍ୟମରେ ଅଧ୍ୟୟନ କରି ଏହି ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି । ସବୁଠାରୁ ଗୌରବର ବିଷୟ ସିକବାଡି ଗ୍ରାମର ବୁର୍ଶୀ ପ୍ରଧାନଙ୍କ ୪ ଜଣ ଝିଅ ଓ ପୁଅ ଡାକ୍ତର ପାଠ ପଢୁଛନ୍ତି । ଚଳିତ ବର୍ଷ ୨ ଜଣ ଉତ୍ତୀର୍ଣ୍ଣ ହୋଇଥିବା ବେଳେ ପୂର୍ବରୁ ୨୦୨୧ମସିହାରେ ବଡ଼ ପୁଅ ବିଭୀଷଣ ପ୍ରଧାନ ଉତ୍ତୀର୍ଣ୍ଣ ହୋଇ ଡାକ୍ତର ପାଠ ସାରି ସେ ଇଂଟର୍ନସିପ କରୁଛନ୍ତି ।
ସେହିପରି ଗତ ବର୍ଷ ଅର୍ଥାତ ୨୦୨୫ ରେ ଝିଅ ମୋନାଲିସା ପ୍ରଧାନ ସମାନ ସଂଘର୍ଷ କରି ନିଟ୍ ରେ କୃତିତ୍ୱ ପାରେ ଡାକ୍ତରୀ ପଢୁଛନ୍ତି ଓ ବୁର୍ଶୀ ଙ୍କ ସାନଭାଇ ଜିସାୟ ପ୍ରଧାନଙ୍କ ଝିଅ ମୀନାକ୍ଷୀ ପ୍ରଧାନଙ୍କୁ ମିଶାଇ ପରିବାର ରେ ୫ ଜଣ ଡାକ୍ତରୀ ଛାତ୍ର ହୋଇପାରିଥିବା ଓ ସେମାନଙ୍କ ବାପା, ମା ଦିନ ମଜୁରୀଆ ଓ ପାରମ୍ପରିକ ହଳଦୀ, ମକା ଆଦି ଚାଷ କରି ପିଲାଙ୍କୁ ଡାକ୍ତରୀ କରିବାର ସ୍ବପ୍ନ କୁ ସାକାର କରିବାକୁ ଅଣ୍ଟା ଭିଡ଼ିଛନ୍ତି । ସୂଚନା ଯୋଗ୍ୟ ଯେ ୨୦୨୪ ରୁ ୨୦୨୬ ଏହି ୩ ବର୍ଷ ମଧ୍ୟରେ ଉକ୍ତ ବ୍ଲକ ର ମୋଟ ୮ ଜଣ ଛାତ୍ରୀଛାତ୍ର ନିଟ୍ ପରୀକ୍ଷା ପାଇଁ ନିଜେ ସାମାଜିକ ଗଣମାଧ୍ୟମ ରେ ପଢି ବିନା କୋଚିଂରେ ଉତ୍ତୀର୍ଣ୍ଣ ହୋଇ ବିଭିନ୍ନ ମେଡିକାଲ କଲେଜ ରେ ଡାକ୍ତରୀ ପଢୁଛନ୍ତି । ୨୦୨୪ ମସିହାରେ ଦାସିଙ୍ଗବାଡି ପଞ୍ଚାୟତ ତାଡିମାହା ଗ୍ରାମର ମାତା ମାଧୁରୀ ପ୍ରଧାନ ପିତା କନେଶ୍ୱର ପ୍ରଧାନଙ୍କ ପୁଅ ସନାତନ ପ୍ରଧାନ, ସିଆଙ୍ଗବାଲି ପଞ୍ଚାୟତ ସିଆଙ୍ଗବାଲି ପଞ୍ଚାୟତ ସବେରେଙ୍ଗା ଗ୍ରାମର କଳାକାର ପ୍ରଧାନ ଏବଂ ବାଡାବାଙ୍ଗା ପଞ୍ଚାୟତ ଗର୍ଜେଡି ଗ୍ରାମର ଲୀନ୍ସା ପ୍ରଧାନ ଏବଂ ୨୦୨୫ ରେ ସିକବାଡ଼ି ର ମୋନାଲିସା ପ୍ରଧାନ ପ୍ରମୁଖ ଡାକ୍ତରୀ ପାଠ ପଢୁଛନ୍ତି । ଚଳିତ ୪ ଜଣଙ୍କୁ ମିଶାଇ ମୋଟ ୩ ବର୍ଷ ରେ ୮ ଜଣ ଡାକ୍ତରୀ ଛାତ୍ରୀଛାତ୍ର ରହିଛନ୍ତି । ଯାହା ପରିବାରଙ୍କ ସମେତ ଅଞ୍ଚଳପାଇଁ ସେମାନେ ଗୌରବ ଆଣିଛନ୍ତି ।