ଓଡ଼ିଆ ସିନେମାରେ ଏବେ ଆଗଧାଡ଼ିର ପ୍ରଯୋଜକ ରମେଶ ବାରିକ ନିଜର ମନଲାଖି ଯୋଡ଼ି ପାଇଯାଇଛନ୍ତି। ଅର୍ଥାତ୍ ବର୍ତ୍ତମାନ ମିଳିତ ଭାବରେ ଚଳଚ୍ଚିତ୍ରଟିଏ ନିର୍ମାଣ କରିବାକୁ ଲକ୍ଷ୍ୟ ରଖି ସେ ଆଗଉଛନ୍ତି। ଆଉ ସେତିକିବେଳେ ତାଙ୍କ ସହ ଯୋଡ଼ି ହୋଇଛନ୍ତି ନବାଗତ ପ୍ରଯୋଜକ କେ. ତମନ୍ନା। ଦୁହିଁଙ୍କର ମିଳିତ ପ୍ରଯୋଜନାରେ ପ୍ରସ୍ତୁତ ହୋଇଛି ଏବଂ ଭିନ୍ନ ଧରଣର ଓଡ଼ିଆ ଚଳଚ୍ଚିତ୍ର ‘କଟକ ଓ୍ବେଡ୍ସ ସମ୍ବଲପୁର’। କଟକ ଏବଂ ସମ୍ବଲପୁରର ଚାଲିଚଳଣି, ପରମ୍ପରାକୁ ଆଧାର କରି ଏହି ଚିତ୍ରଟି ନିର୍ମିତ ହୋଇଛି। ଏ ସମ୍ପର୍କରେ ରମେଶ କହନ୍ତି, ‘ଯେତେବେଳେ କେ. ତମନ୍ନାଙ୍କ ସହ ଭେଟ ହେଲା, ସେତେବେଳେ ତାଙ୍କର ଯୋଜନା ମୋତେ ବେଶ୍ ପ୍ରଭାବିତ କରିଥିଲା। ଆଉ ତା’ପରେ ଦୁହେଁ ଏକାଠି ସିନେମା ନିର୍ମାଣ କରିବାକୁ ନିଷ୍ପତ୍ତି ନେଇଥିଲୁ। ‘କଟକ ଓ୍ବେଡ୍ସ ସମ୍ବଲପୁର’ କାହାଣୀ, କଳାକାର ଚୟନ, ସଙ୍ଗୀତ, ସଂଳାପ ଏବଂ ଶୁଟିଂ-ସବୁ ଜିନିଷ ପ୍ରତି ସମାନ ଦୃଷ୍ଟି ଦିଆଯାଇଛି। ଦର୍ଶକ ଏଥିରୁ ଶତ ପ୍ରତିଶତ ମନୋରଞ୍ଜନ ପାଇବେ ବୋଲି ମୋର ଦୃଢ଼ ଆଶା ରହିଛି। ଆଗକୁ ଆମେ ମିଳିତ ଭାବରେ ଓଡ଼ିଆ ଚଳଚ୍ଚିତ୍ର ପ୍ରଯୋଜନା କରିବାକୁ ସ୍ଥିର କରିଛୁ। ଆର.ଆର. ଇଭେଣ୍ଟ୍ସ ଏବଂ ଷ୍ଟୁଡିଓ ୩୬୫ ବ୍ୟାନରରେ ତଥା ବାପି ଡେଭିଡ୍ଙ୍କ ନିର୍ଦ୍ଦେଶନାରେ ଏହି ଫିଲ୍ମଟି ଚଳିତ ମାସ ୧୯ରେ ପରଦା ଉପରକୁ ଆସିବାକୁ ଯାଉଛି। ସମ୍ବିତ ଏବଂ ନବାଗତା ସୁସ୍ମିତା ପ୍ରଧାନଙ୍କ ବ୍ୟତୀତ କୁନା ତ୍ରିପାଠୀ, ପିଣ୍ଟୁ ନନ୍ଦ, ପ୍ରଦୀପ ଦେବତା, ଗୁଡ୍ଡୁ, ମହାପ୍ରସାଦ କର (ରାଜା)ଙ୍କୁ ଏହାର ବିଭିନ୍ନ ଭୂମିକାରେ ଦେଖିବାକୁ ମିଳିବ।
