ସୁନ୍ଦରଗଡ଼/ସବ୍ଡେଗା,୨ା୮ (ଡି.ଏନ୍.ଏ.):ସୁନ୍ଦରଗଡ଼ ଜିଲା ତଳସରା ନିର୍ବାଚନମଣ୍ଡଳୀର ପୂର୍ବତନ ବିଧାୟକ ତଥା ରାଜ୍ୟ ବିଜୁ ଜନତା ଦଳର ବରିଷ୍ଠ ସାଧାରଣ ସଂପାଦକ ଡା. ପ୍ରଫୁଲ୍ଲ କୁମାର ମାଝିଙ୍କ କାର୍ ସୋମବାର ସକାଳେ ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରୁ ଡା. ମାଝି ଓ ତାଙ୍କ ଡ୍ରାଇଭର ଦୀପକ ରକ୍ଷା ପାଇ ଯାଇଛନ୍ତି।
ପ୍ରକାଶ ଯେ, ପୂର୍ବତନ ବିଧାୟକ ଡା. ମାଝି ସୁନ୍ଦରଗଡରୁ ତାଙ୍କ କାର ( ନଂ ଓଡି-୦୨ଆର୍ – ୬୨୪୦) ଯୋଗେ ସବୁଦିନ ପରି ତଳସରା ସ୍ବାସ୍ଥ୍ୟକେନ୍ଦ୍ରକୁ ରୋଗୀ ଦେଖିବା ପାଇଁ ଯାଉଥିଲେ। ତେବେ କରମଡିହି -ସବ୍ଡେଗା ରାଜ୍ୟ ରାଜପଥ ୨୪ର ବଡ଼ମାଲ ଛକ ନିକଟବର୍ତ୍ତୀ ବୁଲାଣିଆ ରାସ୍ତାରେ କାର୍ଟି ଭାରସାମ୍ୟ ହରାଇ ରାସ୍ତାରୁ ପ୍ରାୟ ୬ ଫୁଟ ତଳକୁ ଖସି ପଡିଥିଲା। ଏହି ଦୁର୍ଘଟଣାରେ କାର୍ ସମ୍ପୂର୍ଣ୍ଣ ଭାଙ୍ଗିଯାଇଛି। ଗାଡିରେ ଥିବା ମାଝି ଓ ଡ୍ରାଇଭରଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ଉଭୟେ ସୁସ୍ଥ ଥିବା ଜାଣିବାକୁ ମିଳିଛି। ରାସ୍ତାରେ ଯାଉଥିବା ବେଳେ ସାଇକେଲରେ ଆସୁଥିବା ଜଣେ ମହିଳାଙ୍କୁ ବଞ୍ଚାଇବାକୁ ଯାଇ କାର୍ଟି ଭାରସାମ୍ୟ ହରାଇ ରାସ୍ତା ତଳକୁ ଖସି ପଡିଥିବା ପୂର୍ବତନ ବିଧାୟକ ମାଝି କହିବା ସହ ସେହି ସ୍ଥାନରେ ରାସ୍ତା ଅବସ୍ଥା ଖରାପ ଥିବା ଜଣାଇଛନ୍ତି।
